بلوچ بزرگ سردار وتی گوشاں پچ بہ کن اَنت داں بلوچ مات ءُ گھارانی پُرعزمیں آواز آھانی گوشاں کپیت، بانک کریمہ بلوچ

خضدار: بی۔ایس۔او آزاد ءِ رھشون بانک کریمہ بلوچ ءَ بیان دیان ءَ گُشتگ کہ بلوچ ورناہاں سلاہانی چگل دیگ ءِ شؤر ءُ سلاہ دیوک وت چہ بلوچ سر زمین ءَ در بیایاں گُڑا ماں بلوچستان ءَ ایمنی اَتک کنت۔بلوچاں پنجاب ءُ پٹھانانی دیارانی سرا قبضہ نہ کُتگ کہ لھتے بہا زُرتگیں سپاہی بلوچ ورناہاں ھمے غیر اخلاقی ءُ غیر منطقی  سلاہ ءَ دینت کہ وتی سلاھاں چگل بِدے ئے۔ سلاہ ھما راجاں ھم بڈائیں وتی گُلزمین ءِ نگھپانی یے ھاترا کہ آ آجواں۔ سلاہانی دؤر دیگ ءُ گپ ءُ تران ءِ گپ جنوک اے بے سوبیں ریاست ءِ گاڑی ءَ کمو دیم ءَ کِنزینگ ءِ وابانی تھا زندگ اَنت۔ بلوچ وتی گُلزمین ءَ یک ماتے یے بستار ءَ دنت۔ سلاہانی چگل دیگ ءِ مشورہ دیوک یک رندی وتی پرشت ءُ پروشیں معیشت۔ عالمی درچ ءَ تنھائی ءُ وتی تھی ءُ توکی غیر اخلاقی کردانی سرا نظر ءَ شانک بِدیاں تا آھاں وتی حقیقت الم ءَ گندگ کئیت۔ زمین جُمب ءُ سیلابانی نام ءَ پنڈتگیں زرانی سرا ردوم زُرتگیں ملک دیر ءَ پش نہ کپ اَنت۔ پاکستان دُنیا ءِ ناکام تریں مُلکانی لڑا اوشتاتگ، پاکستان ءِ نگھپان گام گام ءِ سرا وتی جند ءِ الس ءِ لُٹ ءُ پل ءَ کنگایاں۔ ریاست بازیں وت گڑیں گلانی نام ءِ سرا بلوچ ورناھانی کُشت ءُ کوش ءَ کنگ اِنت۔ریاست دُنیا ءِ دیم ءَ وت ءَ سوب مند زاھر کنگ ءِ ھاترا وڑ وڑیں توجیل کارمرز کنگ اِنت۔ بلے بلوچ ورناہ دُنیا ءِ سرجمیں رد انقلابی ءُ دگہ سامراجی کردانی ریس ءُ پریس(تجزیہ) ءَ پد اے راجی جُنز ءَ ھوار بیتگ اَنت۔ ( آ ھچ وڑا پُشت ءَ نہ کنزاں) ۔۔جتگ ءُ چپتگیں لاشاں نہ ما دلپروشی یے آماچ بئیں۔ نہ مئے لُنٹ ھُشک بنت نہ مئے دست لرز اَنت۔( اے راجی جُہدانی بہر اَنت)۔ سامراجی دلار ءُ ایجنٹ اے گپ ءَ یاد بہ کناں کہ زُلم ءُ زوراکی یے دیم ءَ مدام با جمیریں فرزند اوشتاں۔ آ کسانی دل ءُ دماغ کہ سامراج ءِ غلامی ءَ ھُشک کُتگ اَنت آ نہ غیرت مندیں فرزندانی قُربانیاں زانت کن اَنت ءُ نہ اندازہ کُت کن اَنت۔ سامراجی ایجنٹانی زُلم ءُ زوراکی۔ نواب ءُ سردارانی ضمیر پروشی ءُ درباری ملا ءُ میاھانی فتویٰ نہ بلوچ راجی جنز ءَ داشت کناں او نہ ایرموش کُت کناں۔ آئی ءَ گُشتگ دُنیا ءِ تحریکانی تھا ردانقلابی کردانی بابت ءَ زانتکاری، آھانی سرا ریس ءُ پریس ءُ مثبت کردانی گچین کنگ ءَ چہ ، بلوچ راجی جنز ءِ پیشی دؤر ءِ ردی دیما کُتگ اَنت۔ بی۔ ایس۔ او یک انچیں رھبندی دیگ بیتگ، کہ مئے مول ءُ مراد بلوچ راج ءَ ھوار دُنیا ءِ سرجمیں راجاں چہ غلامی ءِ جپ جپیں آس ءَ  در کنگ ءِ جُہد اِنت۔ آئی ءَ گُشتگ بزرگ سردار وتی گوشاں پچ بہ کناں ، بلوچ مات ءُ گھارانی پُر عزمیں تواراں گوش بداں تا آھانی ذاتی کست ءُ کینگ وت ھلاس بیت۔