بلوچ آجوئی ءِ جھدکار ءُ پلہ مرزانی دیم ءِ دارگ ءَ چمالنگ آرمی کنوٹمنٹ ءِ سوڈگ ءُ پہ اے کارانی سوبمندی ءَ بلوچ ءُ پشتون کاسگ چٹ دارگ بیت ' بلوچ نیشنل وائس

شال : بلوچ نیشنل وائس ءِ جارکش ءَ وتی بیان ءِ تہ ءَ گْوشتگ کہ کوھستان مری ءِ ھند چمالنگ ءَ چَہ بلوچ سرمچارانی اُرش  ءَ پد ریاستی تَک ءَ بیوکیں ٹپ ءَ ما ٹپ دیوانانی پد اے شَور کنگ بوتگ کہ بلوچ آجوئی لوٹوک ءُ آھانی پلہ مرزانی دیم ءِ دارگ ، لگتمالی ءُ بلوچ مڈیانی لٹ پل ءِ دگہ کارانی بنا کنگ ءَ چمالنگ ءَ یک نوکیں  ملٹری کنوٹمنٹے اڈ کنگ ءُ آ اُود ءَ مزنیں لشکرکشی یے بنا کنگ بیت ۔ جارکش ءَ گْوشتگ کہ باوریں تک ءَ ھال کرتگ کہ چمالنگ ءَ ملٹری کںونمنٹ ءِ جوڑ کنگ ءِ شَور گْوستگیں روچاں رحمن ملک ءِ شال ءِ سواد ءِ میان ءَ ھمائی ءِ پاگواجھی ءَ بوتگیں دیوان ءَ کنگ بوتگ چَہ ایشی ءَ پد یک دیوانے آئی جی ایف سی ءَ چمالنگ ءَ کرتگ ءُ چَہ ایشاں ابید پاکستان آرمی چیف جنرل کیانی ءُ آئی ایس آئی ءِ سروک جنرل شجاع پاشا ءِ پاگواجھی ءَ اسلام آباد ءَ ھم دیوان کنگ ءُ ھمے ھبر گیشینگ بوتگ ۔ چمالنگ ءَ بوتگیں بلوچ سرمچارانی اُرش ءَ پد شال ، چمالنگ ءُ اسلام آباد ءَ ھمے درگت ءَ ٹپ ماں ٹپ بوتگیں دیوانانی تہ ءَ کوھلو ءِ پندل ساچیں مردماں ابید پشتون تمنانی لھتیں پندل ساچیں مردماں ھم مزنیں کچے ءَ بھر زرتگ ۔ بوتگیں دیوانانی تہ ءَ فوج ءِ مزنیں اُگدہ دار ءُ دگہ انٹلی جنس سروکاں ھَندی پندل ساچیں ٹَکاں زورپرداتگ کہ بلوچ سرمچار ءُ آھانی پلہ مرزانی چاریگی بہ کن اَنت ءُ ریاستی ادارھاں اے درگت ءَ ھال بہ دئے اَنت ۔ اے درگت ءَ سئے سد ریاستی کاسگ چٹاں ریاست ءِ وفادار بوگ ءِ کارڈ ءُ دگہ لب دیگ ءِ جارجنگ بوتگ ءُ ایشانی پجیگ ءَ دگہ ریاستی کاسگ چٹیں کمکاراں گوں تیزی ءَ کار کنگ ءِ پرمان دیگ بوتگ ۔ آھاں چَہ بلوچ سرمچارانی بیم ءَ دلپٹیں چاریگاں باورکنائینتگ کہ سیکورٹی فورسز پہ آھانی پھریزگ ءَ اُوشتاتگ بلکیں پہ آھانی پھازگ ، بلوچ مڈیانی لٹ پل ءِ دیم ءَ میلانکیں مردمانی دور کنگ ، بلوچ لٹ پل ءِ دگہ کارانی بنا کنگ ءُ پہ لشکرکشی ءِ کارانی سوبمندی ءَ لھتیں بلوچ ءُ پشتون ءِ ریاستی فورسزانی تہ ءَ بھرتی کنگ ءِ ھم مسام کنگ ءُ سوگند ورگ بوتگ ۔ بیان ءِ تہ ءَ گْوشگ بوتگ کہ ھالانی رِد ءَ بلوچ سرمچارانی سر ءَ بیوکیں لشکرکشی ءِ تہ ءَ گیشی آرگ ءِ سوڈگ ءُ شَوربندی ءِ تہ ءَ لھتیں پشتون چَہ شاہ ءَ گیش شاہ ءِ وفادارے ءِ کرد ءَ پیلو کنگ ءَ اَنت ءُ چمالنگ ءَ ھما سیکورٹی فورسز ءِ مردم کہ کشگ بوتگ اَنت آ ھم چمالنگ ءَ پہ چوکی اڈ کنگ ءَ روگ ءَ بوتگ اَنت ۔ بلوچ جھدکاراں مدام زورگریں فوج ءِ ایرجیگی ءَ پشتون ءِ ھمساھگی ءِ ھیالداری کرتگ بلے پشتونانی لھتیں باندات ءَ ناسرپدیں ءُ پندل ساچیں مردم ریاستی سْرپاں ھوار بوتگ ءُ بلوچ سرمچارانی ایرمادی  ءَ کارکنگ ءَ اَنت آھاں سرپد کنگ لوٹ اِیں کہ بلوچ راجی کاروان ءِ دیم ءَ ڈنگر دیوکیں مردمانی ھچ پیمیں اُوپار کشگ نہ بیت توری آ بلوچے بہ بیت ، پشتون یا دگہ کسے ۔ جارکش ءَ گْوشتگ کہ ما وتی بیان ءِ تہ ءَ یک رندے پد ءَ ھمے پشتوناں گْوشگ لوٹ اِیں کہ آ بلوچ راج ءُ زورگرانی میان ءَ جنگ ءِ تہ ءَ مان مہ دئے اَنت اگاں ناں دژمن ءِ کیمپ ءِ تہ ءَ نشتگیں بلوچ راج ءِ دژمن منگ بنت ۔ سیکورٹی فورسز ءِ مردمانی کشگ ءَ پد چَہ ریاستی ادارھانی نیمگ ءَ میان اُستمانی چارٹرءُ میان اُستمانی راھبندانی گپ جنگ باز بژنی ھبرے پرچا کہ سرجمیں جھان سرپد اِنت کہ ریاست چَہ گْوستگیں شش دھک ءَ نہ ایوک یواین ءِ چارٹر ءُ میان اُستمانی راھبنداں سرگْوز کنگ ءَ اِنت ب، بلوچ گلزمین ئِے دستیگ کرتگ بلکیں میاں اُستمانی ایمنی ءَ تاوان دھیں ریاست بلوچ زمین ءِ سر ءَ وتی زورگری ءَ دائمی کنگ ءُ بلوچ آجوئی ءِ جھد ءِ دارگ ءَ بلوچ راج ءَ چکچین کنگ ءَ اِنت ۔ بلوچ راج ءِ ھزارھاں پسگانی آوار جنگ ، جنگی زندانیانی ماں زندان ءَ کشگ ، بلوچ سول آبادیانی سر ءَ کیمیای ، جراثیمی ءُ نیپام بم ءَ گوں اُرش کنگ ،سرجمیں میتگ ءُ بازراں آس دیگ ءُ ھلاس کنگ ۔آپ ءِ ھوٹگ ءُ شیپاں زھر مان کنگ رنگیں کارپد کنوکیں ریاست ءُ آئی ءِ ادراھانی نیمگ ءَ میان اُستمانی راھبند ءُ چارٹر ءِ ھبر دنیا ءِ چماں بندگ ءِ بسات اِنت ۔ بلوچ راج ءِ گْوستگیں بازیں دھک ءَ ھمے گْوشگ بوتگ کہ ریاست مذھبی ترندگیری ءِ ردوم دیوک ءُ دنیا ءِ ایمنی ءَ ارجان جنوک اِنت بلے جھان ءَ پہ وتی ادارکی سوتاں بلوچ ءِ توار گوش نہ داششتگ بلے مروچی وھد ءُ جاوراں بلوچ راج ءِ ھبر سددرسد راست کرتگ ءُ پیش داشتگ ۔برٹش ھال شنگ کنوکیں ادارہ [ بی بی سی ] ءِ یک ڈاکومنٹری فلمے ءِ تہ ءَ ریاست ءِ ھما کارپد  ڈسگ بوتگ  کہ ریاستی واکدار ءُ طالبان یکیں تَلُو[ سکہ ] ءِ دو نیمگ اَنت چَہ ایشی ءَ سرجمیں دنیا ءَ ریاست ءِ کردگار پدر بوتگ ۔جارکش ءَ گوں میان اُستمانی ادارھاں دزبندی کرتگ کہ آ بلوچ راج آجوئی ءِ جھد ءِ سیاسی ءُ اخلاقی پلہ مرزی بہ کن اَنت داں بلوچ راج زوت چَہ زورگریں ریاست ءَ وت ءَ بہ سند اِیت ۔