گیشتر وانگ بوتگیں
شھید امین بلوچ ءُ آئی ءِ شھیدیں سنگت ،،، نمیران اَنت
Wednesday, December 28, 2011
سگمنڈ فرائیڈے گوشیت مردم ھر وڑیں کارے کنت تا آ کار ءِ پُشت ءَ الم یک ذاتی واھگے چیر بیت، شاعر شعر پِر بندیت، سیاستکار سیاست کنت،، اے کارانی پُشت ءَ الم ھمے ذاتی واھگ اَستیں، بزاں ھر کسی دل ءَ ھمے واھگ چیر اِنت کہ منی راج ءِ یا دُنیا ءِ دیم ءَ یک جُتائیں پجارے بہ بیت،، رندا ھمے واھگ لھتے کسانی مقصد جوڑ بیت،،، او لھتے گوں وتی واھگاں جھان ءِ دنز ءُ مجانی تھا گار بیت،، فرائید ءِ اے لیکہ وتی جاہ ءَ چنکہ راست ءُ چنکہ دروگ اِنت،،،،،بلے،،،،،بلے من گُشاں راجانی تھا انچیں جوانیں سر ھم ودی بنت کہ آ ھچ چوشیں نام ءُ پجار ءِ پُشت ءَ نہ تچ انت،،، آھانی دیم ءَ ھچ وڑیں ذاتی نپ نیا انت،،، چوشیں ٹوھیں انسان ماں اے زندگی ءَ نام ءُ نمود، ذاتی پجار ءُ واھگ ءِ تصور ءَ ھم نہ کن اَنت، آھانی دیم ءَ بس راجی مقصد بنت،، اصول بنت،،پمیشا چوشیں عظیمیں انسان تاں زندگ اَنت گُمنام اَنت،، بلے مرگ ءَ پد ھمے مقصد، ھمے اصول آھانی پجار جوڑ بنت، آ نمیران بنت،،،، بزاں چوشیں ٹوھیں انسان چو منی ءُ ایدگرانی وڑا لبزانی گُما لئیب کنگ ءَ ابئید کردانی بستار ءَ وتی پجار ءَ کن اَنت،، پدا آھانی جند کرداری جوڑ بیت ءُ مرگ ءَ پد ھمے کردار راجدپتر ٹھین اَنت
بلوچ راجدوست شھید امین بلوچ گوں ھمے کرداراں ھواریں ،، بیت کنت پہ دگرا ناں،، بیت کنت کسی منی گپاں تپاک مہ کنت،،، بلے منی وتی لیکہے،،چیاکہ من آ کدی ھم نہ دیستگ،، پمیشا من آئی ئے تاریخ پیدائش ءَ ورد نہ کناں،، او ناکہ من سرپداں کہ آئی ءَ سیاست کدی بندات کُتگ،، کئی کئی ھمراہ بیتگ،،،، من بس آئی ئے ھمے بستار ءَ پوھاں کہ آ مرگ ءَ پد وت کرداری جوڑ بیتگ،، پہ من آئی ءَ اے زند ءِ چاریں روچاں گوں وتی شھیدیں ھمگنگل ءُ دوستاں پہ گُمنامی وت یک انچیں راجدپترے ٹھینتگ کہ آھانی ستاہ ءُ توصیف کنگ منی چرپیں زبان ءِ محتاج نہ اِنت،،، راستیں گپ اِش اِنت آئی ءِ جند لبزانی بازی گری نہ بیتگ،، آئی ءَ لبزانی شوپچ ءَ کپگ ءِ شوق ھم نہ بیتگ،، چو منی وڑا ، چو بازینانی وڑا،،، پمیشا مرچی منی اے چاریں بے سر ءُ پادیں لبز آئی یے ءُ آئی ھمگنگل ءُ آئی یے گُما شھید بیتگیں سنگتانی پجار ءُ کردانی توصیف ءُ ستاہ کنگ ءَ بے وس اَنت،،، گُشنت کہ اے جھان ءَ باز انچیں کس ودی بنت کہ پر آھاں پہ راجی ذمہ واریانی پیلہ کنگ ءِ ھاترا،، پہ وتی مقصد ءُ رھبند ءِ سرا پہ راجی آجوئی یے رھبند ءَ سوب مندی یے ھاترا مرگ ءُ زند ھچ وڑیں کلائمکس یا بستار نہ دارنت،،، پہ شعوری ءُ لاشعوری درچ ءَ چوشیں انسان یک انچیں مرحلہے ءَ سر بنت کہ پر آھاں ھچ وڑیں ذاتی نپ پش نہ کپیت،، بس اجتمائی ءُ راجی نپ دیم ءَ کاینت،، اے مرحلہ ءَ چوشیں انسان پہ وتی مقصد ءِ ھاترا ھر وڑیں قُربانی دیگ ءَ تیار بنت،، آ پہ اجتمائی انسانی یا راجی نپانی ھاترا وتی زند ءُ کُلیں چیزانی قُربانی دیگ ءَ تیار بنت،، اے راجی شعور ءِ آخری منزل اِنت۔۔۔۔پمیشا چوشیں انسان پہ وتی راجی مقصد ءِ ھاترا زند ءِ کُلیں آسراتیاں سر گوز اَنت،، تاں کہ مرگ ءِ گورامبازگ ءَ تیار بنت ءُ مرگ ءَ پد زندگ ماننت ءُ راجدپتر ٹھین اَنت،،،،،،،، بلوچستان زندگ بات،، بلوچی سبز ءُ میزران بات،،، بلوچ راجی جُھد سوب مند بات،،،،
Comments[ 0 ]
Post a Comment