بلوچستان ءَ نند ئے گڑا سندھی ءَ گپ کنگی اِنت ' اسلم بھوتانی

بلوچستان اسمبلی ءِ اسپیکر اسلم بھوتانی ءَ وش نیوز ءِ ھالکار جی،ایم ھمدانی یے اے جُست ءِ کہ ””ترا بلوچی زبان ءَ جُست بہ کناں یا۔۔۔۔۔۔۔۔۔۔۔۔۔۔۔۔۔ ”” برانز گران ءَ گوشتگ کہ ””ترا اگاں بلوچستان ءَ نندگی اِنت تا سندھی زبان ءَ گپ جنگی اِنت،اینچو بلوچی بلوچی مکن””” آئی ءَ ھالکار ءِ گُما بدیں زبان کارمرز کنان ءَ گوشتگ کہ وش نیوز چی کنت؟ مئے سرکار ءَ چپی کنت، شما ھچ کُت نہ کنئے، بھوتانی ءِ بلوچی زبان ءِ ھلاپ ءَ بدیں زبان  کارمرزگ ءِ پژدر ءَ وش ٹی، وی ءِ سروک احمد اقبال ءَ تران کُتگ ءُ گوشتگ کہ ””من ءُ وش نیوز ءَ گوں سیادی داروکیں سرجمیں ھالکار مرگ ءِ گورامبازگ ءَ تیار انت بلے بلوچی زبان ءِ دیمروئی ءِ کار ءَ چہ دزکش نہ بئیں،،، ما دُراھیں زبانانی احترام ءَ کنیں، بلے بلوچی زبان ءِ ھلاپ ءَ ھچ وڑیں کرد ءَ برداشت نہ کنیں، بلوچ وائس فار مسنگ فرسنز ءِ رھشون قدیر بلوچ ءَ گوشتگ کہ پہ بلوچی زبان ءُ بلوچ سر ڈگار ءِ پھریز ءَ ھاترا ھزاراں ورناھاں وتی گھگیریں سرانی قُربانی داتگ، بھوتانی وتی زبان ءَ لگام بدنت،، بلوچستان ءِ سرجمیں لبزانکی ءُ رسانکی گلاں بھوتانی ءِ گوں بلوچی زبان ءِ ھلاپ ءَ بدیں زبان کارمرزگ ءِ سرا ایراد گپتگ ءُ گوشتگ کہ بلوچ وتی ماتی زبان ءِ لگتمال کنوکاں ھچ وڑا معاف نہ کنت، بھوتانی ءِ وڑیں مکار باز گوستگاں کہ آھاں وتی سرڈگار ءُ زبان ءِ گُما دغا کُتگ، اے ردا بی، این، پی ءِ رھشون واجہ اختر مینگل ءَ گوشتگ کہ بلوچی زبان ءِ ھلاپ ءَ بدیں زبان کارمرز کنگ بلوچ قوم ءِ سرا ارش کنگ ءِ درچ ءَ کئیت، ھچ وڑا برداشت کنگ نہ بیت، بھوتانی ءِ سوب مندی یے ھاترا ووٹ دیوکیں بلوچ اے گپ ءَ بیھال  مہ بنت کہ آھانی ماتیں زبان ءِ گُما چی بیئگ اِنت، آئی ءَ گوشتگ اے پت داں پیرُکاں ایجنٹاں ، ایشاں ناں بلوچی زبان ءِ گُما حُب ءُ دوستی اَست ناں سندھی زبان ءِ

دلگوش: قبضہ گیریں ریاست ءِ مستریں توجیلاں یکے ھمیش اِنت کہ قبضہ کُتگیں راج ءِ ماتی زبان ءَ لگتمال کن، وھدیکہ زبان ھتم بیت تا راج ھم نہ مانیت، چیاکہ راجانی مستریں پجار آئی یے ماتی زبان ایں، زبان ھتم ، راج ھتم، ما ھمے سرپد بئیں بھوتانی ءَ اے عمل قبضہ گیر ریاست ءِ گوشگ ءِ پدا کُتگ، آئی ءِ اے عمل ءَ ما چون ایر بہ جنیں، آ وا ایجنٹے ، ایجنٹ ءِ مستریں کار ھمے بیت کہ ھما کار ءَ واجہ گُشیت اے ھمائی ءَ کنت،، البت مئے گوں بلوچ راج ،بلوچ دانشور، بلوچ ھالکار ءُ شاعراں دزبندی انت کہ آ وتی ماتی زبان ءِ رکینگ ءِ ھاترا تپاک ءُ یکجاہ بہ بنت ءُ دیم ءَ بیاینت، اے ردا ھچ وڑیں قربانی دیگ ءَ چک ءُ پد مہ باں،، چیاکہ مئے مستریں مڈی ھمے ماتیں زبان ایں، زبان کہ مئے دست ءَ شُت تا ما گار بئیں ، بلوچی سبز بات، بلوچستان آجو بات، بلوچی ءُ بلوچستان ءِ دُشمن گار ءُ بیگواہ باتاں

(بام هال)