شھید جاوید نصیر رند : تو ھم چَہ ما وشیں دلے نہ سست ئے

شال : راج پھاز ءُ راستگوشیں اھولکار جاوید نصیر رند ھم پہ وتی ڈیھ ءَ شھید بوت ۔شھید جاوید نصیر جان درکسانی بلوچ راجدوستیں گل ءَ گوں نزیک ءُ ھمگرنچ بوتگ ۔ بی این ایم ءِ چَہ ھما بنکی باسکاں یکے اَت کہ آھاں شھید واجہ غلام محمد ءِ توار ءَ گوں توار یک کرتگ ءُ ماں سیاسی پڑ ءَ بلوچ آجوئی ءِ جھد ءِ دیم ءَ برگ ءَ کوپگ چیر داتگ ۔ شھید جاوید نصیر بلوچ نیشنل موومنٹ ءِ حب ءَ اولی چارگزار اَت ۔آ  یک  نیزگاریں کھولے ءِ تنگدستیں مردمے اَت پمیشکا زند ءِ بازیں گپچل ءُ جنجال پہ آئی ءَ کوہ ءَ میلانک اِت اَنت بلے ھما نوبت ءَ کہ ورنا پہ وتی وشیں باندات ءَ کار ءُ روزگار شوھاز کن اَنت آئی ءَ دیم پہ راجکاری ءَ دات ۔ پہ جاوید ءَ ھم آسراتی ھست اَت ، آ ھم بندات ءَ چوش دگراں پہ لاپ ءِ کشگ ءَ گوں این جی اوزاں ھمگرنچ بوت بلے وھدے روتاک توار ءِ شنگ کنگ ءِ چنلانچ بوت اَنت ءُ پہ اے کارانی دیم ءِ دارگ ءَجاوید نصیر گچین کنگ ءُ ذمہ وار کنگ بوت ۔ آئی ءَ یک کسانیں دزمزے ءِ سر ءَ وتی رژناھیں باندات گوں راج پھازیں اھواکاری ءَ ھمگرنچ کرت ۔ شھید جاوید نصیر بلوچانی ھالاں شنگ کنوکیں اولی ءُ ایوکیں تاک روتاک توار ءِ نیوز ایڈیٹر ٹھینگ بوت۔ شھید ءَ وتی اے ڈبو ایوک یک انچائیں کارے ءِ رنگ ءَ نہ کرتگ چوش کہ آ دگر اِت اَنت بلکیں آئی ءَ ایشی ءَ یک راجی ذمہ واری یے زانتگ اَت ۔ بنداتی دور ءَ پہ توار ءَ نوشتہ کار ءُ وانوک نیست اَت ۔ شھید ءَ اے تَک ءَ تکانسری کش اِتگ ۔چَہ بلوچستان ءِ کنڈ کنڈ ءَ پہ توار ءَ جھگیر اَڈ کرتگ ءُ گوں آھاں سکیں نزیکی کرتگ چَہ اے نزیکی ءَ ھمکاری ءَ  چَر آھاں انچیں کار گیپتگ کہ چَہ آئی ءِ توار ءَ یلہ دیگ ءَ پد آ کنڈ  ھورک  ءُ ابیتک مان اِتگ اَنت ۔ شھید ءَ زانتگ کہ توار ءَ بندوکیں توامیں جھگیر ءُ ھالکار یک باوست ءُ جھدے ءَ گوں بندوک اَنت ۔ آ چَہ کار ءَ بِھ بیزار نہ بوتگ اَت آ توارے چَہ درساں نامدار تریں نیوز ایڈیٹر پمیشکا نہ اَت کہ بازیں ڈبوے آئی ءَ گون اَت بلکیں چَہ ایشی ءَ ابید آ یک مِھروان ءُ بلوچی دود ءَ گوں ھم بستگیں مردمے اَت ۔ آئی ءِ نیوزایڈیٹر ی نوبت ءَ چَہ بلوچستان ءَ بازیں نامی ئیں  اھوالکار گوں توار ءَ ھمگرنچ بوت اَنت ۔ چَہ آھاں اسماعیل بلوچ ، غوث بھار ،صورت خان مری ، شھید لالہ حمید ءُ قاضی داد محمد ریحان ھوار  اِت اَنت ۔ آئی ءَ نوشتہ کاراں مدام سکین داتگ ءُ پہ نوشتہ کنگ ءَ کڈن کرتگ ءُ ٹوھینتگ  ءُ آھاںِ نوشتانکانی چاپ بوگ ءَ پد دلبڈی ءُ سکین دیگ ءَ شموشکار نہ بوتگ ۔ آئی ءَ چَہ زباد سنگر ءَ اُورماڑہ نیول بیس ءُ اُورماڑہ ءِ سر ءَ پاکستانی قبضہ گیری پندلانی پدر کنگ ءَ بازیں نوشتانک نوشتہ کنائینتگ ھمے پیم چَہ مھراللہ مھر ءَ ھپتگی ڈائری ' احوال بولان ' ءِ نام ءَ نوشتہ کنائینتگ کہ توار ءِ وانوکاں سک باز پسند بوتگ اَت ۔ اے نوشتانک ءِ ھیال ءُ سکینکار شھید جاوید نصیر اَت ۔ چَہ سکینکاری ءُ شونکاری ءَ ابید شھید ءَ بلوچستان ءِ جاروانی سر ءَ وت ھم جوانیں نوشتانک نویس اِتگ ۔ وتی جند ءِ نام ءَ ابید آئی ءَ یک کسانیں مدتے ءَ '' مھلب '' ءِ ندنام ءَ ھم

نوشتانک نویس اِتگ داں بلوچ جنین آدماں ھم سکین بہ رس اِیت ۔ مھلب ءِ نام ءَ نوشتگیں آئی ءِ نوشتانک ھم سک باز دوست کنگ بوتگ اَنت ۔ شھید جاوید بلوچ ءَ راج ءِ تہ ءَ ٹکانی کسان مزن کنگ ءِ سر ءَ سک باز ایراد گیپتگ ۔آئی ءَ مدام وت ءَ لاسی ، گوشتگ پرچا کہ آ لس بیلہ ءِ جاہ مند اَت ءُ ھمے پنام ءَ ھم آئی ءَ بازیں نوشتانک نویس اِتگ داں بلوچستان ءِ اے ٹِک بلوچ راجی جھد ءُ جوزگ ءَ ھم بستگ سما کنگ بہ بیت ۔ شھید جاوید نصیر بلوچ نیشنل موومنٹ ءِ دلستکیں باسکاں یکے اَت بلے وھدے کہ گوں توار ءَ ھمگرنچ بوت سیاسی چست ءُ ایرانی تہ ءَ آئی ءَ بِھ بھر زرت نہ کرت ھمے پیم2008ءِ بی این ایم ءِ سیشن ءَ ھم شھید ءَ بھر نہ زرت ۔ داں آئی ءِ سر ءَ کس اے بھتام ءَ جت مہ کنت کہ آ یک گچینی گلے ءَ گوں بستگ ۔ شھید جاوید جان ءِ زندمانی یک دلستگ ءُ دلپاکیں مردمے ءِ زندمان اِنت یک انچیں مردمے ءِ کہ آئی ءِ سنگت ءُ ھمکار آھانی زند ءَ آھانی شریان اَرزش دیگ ءَ ساڑی نہ بنت ۔ ھمے پیم  شھید جاوید نصیر جان ھم گوں توار ءَ وشیں دلے نہ سستگ ۔ باز بر ءَ پہ ادارھانی پھریزگ ءَ وتی جھد ءُ واھگ ءَ ھم گٹگیر کنگ لوٹ اَنت ۔شھید ءَ ھم انچوش کرتگ ۔بلے پاکستان یک  ھونواریں رسترے جوڑ بوتگ یا کہ آ نوں شر سرپد اِنت بلوچ ءِ اَجگیں کشار ھم پہ آئی ءَ زھراپیں کنٹگ جوڑ بوتگ  اَنت پمیشکا جاوید نصیر رند دہ ستمبر دو ھزار یازدہ ءَ چَہ حب ءَ پاکستانی ایجنسیانی کارندہ ھاں آوار جتگ ءُ پُریں پنجاہ ءُ شش روچ وتی شکنجہ جاھاں دارگ ءَ پد پنچ نومبر دوھزار یازدہ ءَ کشتگ ءُ آئی ءِ پاکیں میت خضدار ءَ چگل داتگ ۔شھید جاوید نصیر رند وتی ماتیں ڈیھ ءِ ھاکانی میار کنگ بوت بلے آئی ءِ لیکو
ءُ زندمان پہ آیوکیں پدریچ ءُ آئی ءِ سنگتاں راھشون اَنت ۔




Human Rights Watch