پہ آوار جتگیں مردماں ھرجاپ کنگ ءَ زوت اسلام آباد ءَ رو اِیں ءُ داں ھما وھد ءَ واتر نہ بئے اِیں کہ آوارجتگیں مردم یلہ کنگ مہ بنت ' بلوچ مسنگ پرسنز

شال : بلوچ مسنگ پرسنز ءِ چیر مین نصر اللہ بلوچ ءَ گوشتگ کہ سرکار ءَ آوار جتگیں مردماں مز دیگ ءِ  پیشکش کرتگ آ ما رد کرتگ ءُ مئے لوٹ اِنت کہ ھمینکس مردم آوار جنگ بوتگ آ دَرا کنگ بہ بنت اگاں شھید کنگ بوتگ اَنت میت آھاںی کسانی دست ءَ دیگ بہ بنت ما ھچ وڑ ءَ چَہ آوار جتگیں مردمانی بدل ءَ سرکار ءَ مزنہ گِر اِیں ۔ آئی ءَ اے ھبر دوشمبے ءِ روچ ءَ شال پریس کلب ءِ دیم ءَ گوں بلوچ آوار جتگیں مردمانی کھولاں ماں شد گدان ءَ گپ جنان ءَ گوشتگ ۔آئی ءَ گوشتگ کہ دنیگت دوسد ءُ سی ءُ پنچ آوار جتگیں مردمانی میت دزکپتگ ءُ یک سد مردمانی درگت ءَ سپریم کورٹ ءَ کیس کنگ بوتگ اَنت ۔ آئی ءَ گوشتگ کہ ما پیسر ءَ ھم اسلام آباد ءَ پارلیمان ءِ دیم ءَ پہ آوار جتگیں مردمانی ھرجاپ کرتگ بلے چَہ سرکار ءِ مسام ءُ کراراں پد ما وتی ھرجاپ مھتل داشتگ ۔ اگاں سرکار وتی زبان ءَ مہ موک اِیت ما پد ءَ زوت اسلام آباد ءِ نیمگ ءَ لانگ مارچ کن اِیں ءُ پارلیمان ءِ دیم ءَ ھرجاپ کن اِیں پرچاکہ ما ھچ رنگ ءَ سرکار ءِ پیش کشاں نہ من اِیں ما ایوک آوار جتگیں مردمانی درائی ءَ لوٹ اِیں اگاں آ شھید کنگ بوتگ اَنت گڑا مارا آھانی میت دیگ بہ بنت ۔آئی ءَ گوشتگ کہ مردم کہ آوار جنگ بنت آ ھانی آوار جنگ ءَ ایف سی ءُ پاکستانی ایجنسیانی دست مان اِنت کہ سیاسی جھدکاراں چست کنگ ءَ پد شھید کن اَنت ۔ آئی ءَ گوشتگ کہ مئے اُوپار نوں  سرریچ بوتگ ءُ نوں ما شورکرتگ کہ ما پہ ھرجاپی ءَ اسلام آباد ءَ رو اِیں ءُ داں ھما وھد ءَ آ اُود ءَ نند اِیں کہ مئے آوار جتگیں مردم درا کنگ مہ بنت ۔