اُچکزئی نفسیاتی نادراہ اِنت یا جِناں گیپتگ؟ گنوکانی ھبر پسو نہ بنت بس کندگ کیت

شال : وت ءَ شیوار ءُ پلک شودیں پشتون راھشون سرپد بیوکیں مردک محمود خان اُچکزئی ءَ وتی پہ بلوچاں کینگ پدر کرتگ اَنت ۔ آئی ءَ وتی کست ءُ کینگی ھبر گوں بی بی سی اُردود ءِ اھوالکار ءَکرتگ اَنت ءُ وتی لگوری ھم من اِتگ کہ آ  بلوچانی دیم شرینتگیں میتانی دور دیگ ءَ ایرجنگ ءُ اسٹبلشمنٹ ءُ بلوچانی جنگ ءَ دست مان کنگ نہ لوٹ اِیت ابید چَہ اے بے بن ءُ چَہ انسانی ، سیاسی ، ھمساھگی ءُ گوستگیں دور ءِ گوں بلوچ راھشوناں سنگتی ءَ سرگوز کنوکیں ھبر ءَ آئی ءَ لھتیں بے سریںءُ سبکیں ھبر دگہ ھم کرتگ ءُ بازیں بٹاکے ھم جتگ ۔آئی ءَ اے سیاھیں دروگ ھم بستگ کہ بلوچستان ءَ پشتون اسٹبلشمنٹ ءُ بلوچ دوِئینانی دست ءَ کشگ بوگ ءَ اَنت ۔ بلوچستان ءِ انوگیں سیمسراں ما نہ من اِیں اگاں بلوچستان ءَ پشتون گوں بلوچ ءَ برابر کنگ نہ بیت اَنت گڑا پشتون دمگ گوں خیبر پشتونخواہ ءَ ھوار کنگ بہ بنت یا گستا اُستانے جوڑ کنگ بہ بیت ۔فوج ، ادارہ ءُ پارلیمان مئے لوٹ ءَ بہ من اَنت ۔ سئے ماہ ءِ تہ ءَ سرکار ءَ دور دات کن اِیں بلے ما اُستان ءُ ملک ءِ تہ ءَ جنجال ودی کنگ نہ لوٹ اِیں ۔ آئی ءَ گوشتگ کہ چَہ ڈیورنڈ لائن ءَ پیش چَہ دریائے آمو ءَ بہ گر داں اباسین ءَ اوگانستان ءِ بھر بوتگ اَنت ۔آئی ءَ گوشتگ کہ مرتگیں اپس ناں بلکیں راجدوستانی تپاکی ءِ یک ایجنڈھے بوتگ ، ملکی سیاست ءِ تہ ءَ فوج ، چیریں داراھانی دزمانجنی نہ کنگ ءُ پارلیمان ءِ برزدستی ءِ پجیگ ءَ دگہ بازیں گپانی سر ءَ مئے گوں متحدہ مجلس عمل ، پیپلز پارٹی ، عمران خان ءُ دگہ پارٹی ءَ گوں تپاکی بوتگ ۔ ھمے ھبر ءِ سر ءَ لندن ءَ مزنیں یکجاھی یے اے پی ڈی ایم ھم جوڑ کنگ بوتگ ۔محمود خان اچکزئی ءِ اے ھبر ءِ پسو ءَ کہ پرویز مشرف ءِ دور ءَ بیوکیں فوجی آپریشن ءِ وھد ءَ پونم ءِ پروشگ ءَ تئی دست مان بوگ ءِ گپ جنگ بیت ،اُچکزئی ءَ گوشتگ کہ اے ھبر راست نہ اِنت بلوچستان ءَ آپریشن یک نازرکیں جیڑھے مئے وتی یک ھیالے بوتگ ۔راھبندی ، سیاسی ءُ براتانی پیم ءَ ما چَہ پونم ءِ جوڑ بوگ ءِ اول روچ ءَ گوں کماشاں گوشتگ اَت کہ بلوچستان ھما نیمگ ءَ روگ ءَ اِنت اے رنگ ءَ نہ مان اِیت اے رنگ ءَ بلوچستان ناں دارگ بیت نہ کسے داشت ئِے کنت ۔مروچی ھم مئے ھبر ھمیش اِنت کہ مروچی ھم پشتون ءُ بلوچ یک دومی ءَ سرپد بہ بنت کہ ایشی ءِ تہ ءَ بلوچ براتانی بھر گیشتر اِنت گڑا اد ءَ تپنگ چست کنگ ھژدری نہ بیت ۔ ما بلوچ ءُ پشتون ھمینکس زورمند اِیں کہ ابید چَہ تیر جنگ ، کسے ءَ زاہ دیگ ءُ کشگ ءَ ما اُستان ءِ بندبست جام کرت کن اِیں ۔ اے ھما وھد ءَ بوت کنت کہ وھدے پشتون بلوچ یک دومی ءَ برات سرپد بہ بنت ۔آھاںی گلزمین ءِ سیمسر گیش اِتگ اَنت آھاں کس بدل کرت نہ کنت ۔بلوچ ءُ پشتون پرچا یکجا نہ بنت ، ایشی ءِ پسو ءَ آئی ءَ گوشتگ کہ اے سوال گوں بلوچ راھشوناں کنگ بہ بیت ما اے درگت ءَ جھد کرتگ ۔ پشتونخواہ میپ ءِ سروک ءَ بلوچستان ءِ دپتر چَہ نوری نصیر خان ءِ باریگ کہ پشتون ءُ بلوچستان ءِ میان ءَ چَہ جنگ ءُ چوپاں پد ھمساھگی ءُ ھمکاری ءِ دور اَت ، زورگ ءِ بدل ءَ زورگریں انگریز سرکارانی دور ءَ بنا کرتگ ءُ گوشتگ کہ برٹش بلوچستان وھدے کہ چیف کمشنری اُستان جوڑ کنگ بوت گڑا سندھ بمبئی ءِ بھر ءُ خیبر پشتونخواہ پنجاب ءِ بزاں اول رند ءَ برٹش بلوچستان کمشنری اُستان جوڑ بوتگ کہ آئی ءِ تہ ءَ ایوک بگٹی ءُ مری ھوار بوتگ اَنت ۔ دس سال ءَ رند پہ نو ھزار روپیہ ءَ انگریزاں چَہ خان ءَ نوشکے ھم لوٹ اِتگ ءُ برٹش بلوچستان ءِ بھر جوڑ کرتگ ۔چاردہ مئی ءَ 1930 ءَ نصیرآباد یک لکھ ءُ ھپدہ ھزار ءَ چَہ بلوچ خان ءَ زرتگ ءُ گوں ما ھوار کرتگ ۔ مئے گلو اِیش اِنت کہ چیف کمشنر اُستان گار کنگ ءُ بلوچ دمگ ءَ گوں ھوار کنگ بوتگ ایشی ءَ ما نہ من اِیں ۔ سبی مئے بھر اِنت ، مری بگٹی گوں ما بوتگ اَنت ،نوشکے چَہ خان کلات ءَ زورگ بوتگ کہ آئی ءِ تہ ءَ پشتون دمگاں ابید نصیر آباد ءِ پجیگ ءَ دگہ دمگاں بلوچ بہ زان اَنت ءُ آھانی تیاب ءُ مڈی ، ھدا ءِ باھوٹ ۔ آئی ءَ گوشتگ کہ ما وتی دمگانی یک نوکیں اُستانے جوڑ کن اِیں اگاں بلوچ گوش اَنت کہ براتانی پیم ءَ نند اِیں گڑا درس ففٹی ففٹی ، آبادی ءِ جیڑہ ءَ ما کپگ نہ لوٹ اِیں ۔