شال : یونیورسٹی چکاس ءَ بائیکاٹ ءُ کس ءَ چکاس دیگ ءَ نہ ھل اِیں ' بی ایس او [ م ] ءِ بیھار

شال : بلوچ اسٹوڈنٹس آرگنائنزیشن  [ محی الدین ] ءَ چَہ 5 اکتوبر ءَ بنا بیوکیں توامیں چکاسانی بائیکاٹ ءِ بیھار داتگ ۔ بی ایس او [ م ] ءِ سیکرٹری اطلاعات نذیر بلوچ ، منیر بلوچ ، شوکت بلوچ ءُ حمید بلوچ ءَ گوشتگ کہ نوکیں دور ءَ ھم بلوچستان یونیورسٹی بازیں جنجالاں دوچار اِنت ءُ وائس چاانسلر فورسزانی کمک ءَ وتی گپاں سر ءَ مشگ ءَ اِنت ۔کسے کہ گپے جنت پہ دارگ ءَ ئِے دزگیر کنائین اِیت ۔ آئی ءَ بھتام جتگ کہ کہ وائس چانسلر ءَ وتی دل تب ءِ 15مردم یونیورسٹی ءَ داشتگ ءُ بلوچستان یونیورسٹی ءِ بندبست ءَ پہ وتی مولاں ترینگ ءُ بدل کنگ ءَ اَنت ۔ آئی ءَ گوشتگ کہ   یونیورسٹی کرپشن سک باز بوتگ ۔آئی ءَ لوٹ کرتت کہ وائس چانسلر ءِ پجیگ ءَ سجھیں کرپٹیں مردم کشگ بہ بنت اگاں چوش نہ بیت گڑ اما چَہ 5 اکتوبر ءَ بنا بیوکیں بی اے ، بی ایس سی ءِ ھواری ءَ درسیں چکاسانی بائیکاٹ کن اِیں ءُ کس ءَ پہ چکاس ءَ نندگ ءِ اجازت ھم نہ دَئے اِیں ۔