کمانڈر سمیر رند ءِ قُربانی بلوچ راج دپتر ءَ پہ مدامی یاد کنگ بیت۔۔بی۔ آر۔ اے
Wednesday, October 12, 2011

بلوچ سلاہ بندیں گل بی۔ آر۔اے ءِ جارکش سرباز بلوچ ءَ ھال دیان ءَ گوشتگ کہ سمیر رند بی۔آر۔اے ءِ باز جوانیں کمانڈرے بیتگ۔ آ گوستگیں سال ءِ دہ اکتوبر ءَ ماں بلوچستان ءِ ھند کیچ ءَ چہ وتی گس ءَ آوار جنگ بیتگ۔۔بازیں ٹارچر ءُ زلم ءَ وھدی پاکی ایجنسی آئی ءِ لیکہ ئے بدل کنگ ءَ بے سوب بیتگ انت ، تا گُڑا آ شھید کنگ بیتگ ءُ آئی ءِ جتگ ءُ چپتگیں لاش پسنی ءِ ھند کلانچ ءَ چگل داتگ ئے۔۔جارکش سرباز بلوچ ءَ ناشناسیں ھندی ءَ فون جنان ءَ گوشتگ کہ سمیر رند بی۔ آر۔ اے مکران ڈویژن ءِ سینئریں کمانڈراں گوں ھوار بیتگ۔۔سمیر رند عرف بالاچ خان ءِ مات ءُ پتاں ما ھزار سلام گُشیں ۔۔ چیاکہ آھانی بچ ءَ پہ ماتیں سرڈگار ءِ رکینگ ءَ پہ دلیری دُژمن ءِ ھلاپ ءَ جنگ کُتگ ءُ پہ ماتیں سر زمین ءَ وتی گھگیریں سر ندر کُتگ۔۔آئی ءِ اے قُربانی بلوچ راجدپتر ءَ پہ مدامی یاد کنگ بیت۔ بی۔آر۔اے کمانڈر بالاچ خان ءِ قُربانی سرا پھر بندیت کہ آئی ءَ گوں وتی ھوناں بلوچ راجی آجوئی ءِ مادنیں کِشکے رستگ۔۔ما بلوچ راجی شھیدانی مول ءُ مراد ءَ پیلہ کنیں ءُ اے جنگ بلوچستان ءِ آجوئی ءَ جاری مانیت۔۔۔
بنگپ:
راجدوست
Comments[ 0 ]
Post a Comment