پاکستانی ایجنسیاں دگہ چار بلوچ کشتگ : وحید بالاچ ،غلام اللہ، سمیر رند ءُ عبدالمطلب پہ ڈیھ ءَ شھید بوت اَنت

خضدار +گوادر : پاکستانی ایجنسیاں چار بلوچ کشتگ ءُ میت دور داتگ اَنت ۔خضدار ءِ ھند باغبانہ ءَ دست کپتگیں میت کسان سالیں پنچمی کلاس ءِ نودر بر وحید بلوچ کہ وتی ھمسرانی میان ءَ بالاچ ءِ نام ءَ زانگ بوتگ ،اَت ئیگ اَت ءُ دگہ یک میتے کہ ھمد ءَ دست کپتگ آ بلوچ وطن موومنٹ سیکریٹری جنرل غلام اللہ بلوچ ءِ ئیگ اَت ۔ شھید بالاچ 8اگست 2011ءَ چَہ خضدار ءَ پاکستانی ایجنسیاں آوار جتگ اَت ءُ غلام اللہ 23اگست 2011ءَ آوار جنگ بوتگ اَت ۔ دگہ دو میت پسنی ءُ گوادر ءِ میان ءَ کلانچ ءِ ھند بیلار ءَ دست کپتگ کہ چَہ ایشاں یکے عبدالمطب ء اسحاق کہ جمیڑی ءِ نندوک بوتگ ءُ دومی سمیر رند ء عبدالکریم کہ مند ءِ نندوک اَت ۔ شھید عبدالمطب بلوچ ری پبلکن پارٹی ءِ باسک اَت کہ بیست ءُ پنچ روچ پیسر 14ستمبر 2011ءَ پاکستانی ایجنسیاں چَہ گوادر ءِ جیمڑی ءِ میان ءَ راہ ءَ انچوش بے تواری ءَ چست کرتگ کہ اے درگت ءَ کس ءَ بازیں سرپدی نہ بوتگ چَہ شھید عبدالمطلب ءِ موبائل ءِ سر ءَ مولوی عبدالخالق ء ملا حامد میسج کنگ ءُ لوٹائینگ بوتگ ءُ چَہ عبدالرحیم بازار پلیری ءَ آوار جتگ مولوی عبدالخالق دنیگت پاکستانی ایجنسیانی شکنجہ جاھاں بند اِنت ۔