خضدار : امریکہ ءَ پاکستان پکار اِنت ' بلوچ آجوئی گوں پاکستان ءِ پروشگ یا پروشائینگ ءَ نہ بستگ ' بی ایس او آزاد

خضدار : بلوچ راج آجوئی گوں پاکستان ءِ پرشگ یا آئی ءِ پروشائینگ ءَ بندوک نہ اِنت ءُ نہ کہ امریکہ یا دگہ واک بلوچاں آجوئی دات کن اَنت ۔ سامراج ءُ آئی ءِ کاسگ چٹاں گوں دین ، مذھب ءُ انسانیت ءَ کارنیست ۔ آجوئی زرمبش ھما وھد ءَ سوبمند بنت کہ راج پہ مِرگ ءُ کشگ ءَ سرگراَنت ۔اے جھان ءَ کس ءَ پہ مدامی دوست نیست ۔ بلوچ راج ءَ جھانی تک ءَ بدل بوتگیں جاورچارگ ءُ وتی بردستانی سر ءَ بیھسہ کنگ ءُ وتی جھد دیم ءَ برگی اِنت ۔اے ھبر چَہ بی ایس او آزاد ءِ نیمگ ءَ رستگیں پریس ریلیز ءِ تہ ءَ کنگ بوتگ اَنت ۔ دیمتر ءَ گوشگ بوتگ بی ایس او آزاد ءِ بنجاھی باسکانی دیوان بنجاھی چِیئر پرسن بانک کریمہ ءِ چیردستی ءَ خضدار ءَ آسر بوتگ ۔آئی ءِ تہ ءَ گل ءِ گوستگیں کارکردگی ، سیاسی جاوراں ابید دگہ بنگپانی سر ءَ گپ جنگ بوتگ ءُ گل ءِ کارانی دیم ءَ برگ ءُ گشادکاری ءَ لھتیں کمیٹی جوڑ کنگ بوتگ ۔ وحیدعیدو چَہ بنجاھی باسکے ءَ ءُ بانک فریدہ چَہ گل ءَ کشگ بوتگ ۔ دیوان ءِ تہ ءَ اے جاورانی سر ءَ ھم گپ جنگ بوتگ کہ بلوچ راج آجوئی گوں پاکستان ءِ پرشگ یا پروشائینگ ءَ نہ بستگ ۔ دیوان ءَ راھشوناں گپ جنان گوشتگ کہ میان اُستمانی جاورانی تہ ءَ آیوکیں بدلی بلوچ جھد ءَ ھم اسرمند کنگ ءَ اَنت ءُ اے میان ءَ اگاں بلوچ راج ءَ گھتر ءُ پائیداریں شوربندی نہ کرتگ گڑا زانگ بہ بیت اے دنیا ءَ کس کسی دوست نہ اِنت ۔آھاں گوشتگ کہ چَہ گوستگیں دھکاں جھانی سامراج گوں وتی کاسگ چٹیں پاکستان ءِ کمک ءَ یک انچیں رنگے ءَ اے دمگ ءَ مذھبی گنوکی ءُ مذھبی لیکوانی بنیاد ءَ گرءُ چیلاں دیمروی داتگ ءُ بلوچ زرمبش ءِ بے سوب کنگ ءِ جھد کرتگ آ درسیں دنیا ءِ دیم ءَ اِنت ۔آھاں گوشتگ جھانی سامراج ءُ آئی ءِ کاسگ چٹاں اد ءَ ھروھد ارزان نھاد ءَ نام ءِ مذھی سروک ، نیشنلسٹ ، ءُ سنڈیمن ءِ وتساچیں سردار دستیاب بوتگ ۔ بنجاھی راھشوناں گوشتگ کہ سامراج ءَ ھچ دین ،انسانیت ءُ دودمان ءَ گوں کار نیست آئی ءِ کار ایوک ءَ چیردستیں راجاں دزبند کنگ ءُ آھانی مڈیانی لٹ پل اِنت پمیشکا بلوچاں وتی زور ءِ سر ءَ بھیسہ کنگ لوٹ اِیت وت وتی جھد دیم ءَ برگ لوٹ اِیت ءُ دنیا ءَ ھما زرمبش سوبمند بوتگ اَنت کہ لس مَرگ ءُ کشگ ءَ سرگیپتگ ءُ اے جاوراں ھچ واک راجاں داں دیراں دزبند کرت نہ کنت ۔ دیوان ءَ گوشگ بوتگ کہ بلوچ مھلوک ءِ گوستگیں دہ سال ءِ جھد ءُ ندریگاں ھمینچک سیاسی پھتوی آورتگ کہ مروچی آ وتی دوست ءُ دژمناں جوانی ءَ زانت ۔ سامراج ءُ آئی ءِ ھندی کاسگ چٹاں آجوئی ، دادرسی ءُ برابری ءَ گوں ھچ رنگیں سیادی نیست پمیشکا بلوچ راج اے ودار مہ کنت کہ پاکستان پروشگ ءَ پد ما آزات بئے اِیں یا امریکہ ءُ دگہ واکے مارا آزاتی دنت بلکیں مارا دنیا ءِ دگہ راجانی رندگیری کنگ ءُ آزاتی گرگی اِنت کہ آھاں نیزگاری ، بے دزرسی ءُ بے کسی ءَ ابید جبر برداشت کرتگ ۔آسیدگی ءُ وت پسندی نہ چار اِتگ ءُ آجوئی ءُ وژھالی ءِ جھد کرتگ ۔ دیوان ءَ گوں تپاکی ءَ گوشگ بوتگ کہ جھانی واکاں دنیگت پاکستان پکار اِنت پرچا کہ پاکستان آرمی کرایہ ءِ آرمی اِنت ءُ جھانی واک چَہ ایشی ءَ ھر جاہ ءَ کار گیپت کن اَنت ۔اُردن ءَ فلطینیانی کشت ءُ کشار دنیا ءِ دیم ءَ یک زندگیں درورے ۔