شال : سپریم کورٹ آف پاکستان ءَ پہ آوار جتگیں بلوچاں پٹیشن کرتگ بلے دادرسی نہ بوتگ ' وائس فار مسنگ پرسنز

شال :آوار جتگیں بلوچ جلیل ریکی ، سنگت ثناء ، ڈاکٹر دین محمد ، ذاکرمجید ۔ اصغر علی بنگزئی ، غفور بلوچ ، مشتاق رودینی ، سمیع مینگل ، حافظ سعید الرحمن ءِ کھولانی پریس کلب ءِ دیم ءَ جتگیں شدھرجاپی گدان ءَ 457روچ سرجم بوتگ ، شمس ، سمیر رند، ولید افضل ، نبیل ، حاجی صاحب خان ، عبدالغفار ، عطاءاللہ ، مھراللہ لانگو، ذاکر، حسن لانگو ، کبیر ءِ کھولاں395روچ ، بانک زرینہ مری ءِ کھول ءَ 384روچ ، نیازمحمد بنگلزئی ، نسیم افضل ، عطااللہ ، بابابوھیر ، آصف جھکرانی ، صابر بلوچ ءِ کھول ءَ 290روچ ، عرض محمد ، سفرخان ، ڈاکٹر محمد اکبر۔ منیر میروانی ایڈوکیٹ ءِ کھول ءَ 285روچ ، ماسٹر غلام قادر ، مزارخان ءُ الطاف بگٹی ءِ کھول ءَ 100روچ ، رحیم ، گھرام ، اقبال ، کریم جان ، غلام اللہ ءِ کھول ءَ 44روچ سرجم بوتگ ' شد ھرجاپ دنیگت برجاہ اِنت ۔ گوں پاکی سرکار آوارجتگیں مردمانی کھولاں ھمدردی کنگ ءَ بی ایس او [آزاد ] سوراب بنزہ ءِلھتیں باسک شد ھرجاپی گدان ءَ اَتکگ ۔آھاں اے رد ءَ گپ جنان ءَ گوشتگ کہ جلیل ریکی اے وھدی آوار جنگ جنگ بوتگ کہ پاکستانی ایجنسیاں آوار جتگ ءُ سئے سال اِنت کہ پاکستانی شکنجہ جاھاں بند اِنت ءُ جنگ ءُ چوپگ سگگ ءَ اِنت ۔ پہ گلزمین ءَ آئی ءِ پگر ءُ ھیال ءُ کردار ءَ سوراب ءِ مردمانی دل ءَ جاہ کرتگ ۔ھزارھاں رندگیر انگت آئی ءِ وادر ءَ اَنت ۔ وائس فار بلوچ مسنگ پرسنز ءِ چِیئرمین قدیر بلوچ ءَ گوشتگ انسانی حقانی لگتمالی ءِ سر ءَ توار چست کنان کن اِیں ۔بلوچستان ءَ ھمروچ چَہ راھبند ءَ ڈن دزگیر کنگ ، آوار جنگ ءُ آوار جنکونی در نہ کپگ ھمروچیگیں کارے جوڑ بوتگ ۔پہ آوار جتگیں مردماں سپریم کورٹ آف پاکستان ءَ پٹیشن کرتگ بلے دنیگت بیگواہ کرتگیں مردم در کنگ نہ بوتگ اَنت ناں دادرسی بوتگ۔