نیویارک : امریکہ ءَ زرمبشے چست بوتگ ' ھزارھاں ورنا وال اسٹریٹ ءَ زھرشانی کنگ ءَ اِنت

زھرشانی کنوک گیشتر ورنا اَنت

نیویارک :امریکہ ءِ شھر نیویارک ءَ پولیس ءَ باپاری جاہ '' وال اسٹریٹ  دستیگ کن اِت '' [ آکوپائے وال اسٹریٹ ] باوست چست کنوکیں ھپت سد ھرجاپی دزگیر کرتگ ۔گوستگیں دو ھپتگ اِنت کہ ھرجاپیاں نیویارک ءِ معاشی سرگرمیانی بنجل وال اسٹریٹ ءَ کونڈ جوکینتگ ءُ پہ ھرجاپی نشتگ اَنت ۔ ھرجاپ کنوکانی تہ ءَ گیشتر ورنا اَنت ۔اے ھرجاپ مصر، تیونس ءِ پجیگ ءَ عرب جھان ءَ چست بیوکیں بازیں ملکاں بنا بوتگیں ھرجاپانی پیم ءَ امریکہ ءِ زرمبش ءِ نام دیگ بوگ ءَ اِنت ۔ کارپوریٹ لالچ ، بینکانی تہ ءَ لٹ پل ، بے لوگی ءُ بیروزگاری رنگیں جیڑھانی ھلاپ ءَ بے لوگیں امریکی چَہ گوستگیں ھپدہ ستمبر ءَ وال اسٹریٹ ءَ ھرجاپ کنگ ءَ اَنت ۔ ھمے رنگ ءَ سما بوگ ءَ اِنت کہ ھرجاپیاں یک ھرجاپی شھرے آباد کرتگ ۔ یک ھندی اھوالکارے ءَ گوشتگ کہ دکاناں نیویارک ءِ بازیں مردماں وتی کریڈٹ کارڈ ھم داتگ اَنت کہ ھرجاپ ءَ ھواریں مردماں آپ ءُ تام بہ دئے اَنت ۔ چارشمبے ءِ روچ ءَ ھرجاپیاں چَہ وال اسٹریٹ ءَ لوئر مینھیٹن ءِ نیمگ ءَ بروکلین برج ءِ سر ءَ مارچ کنگ بنا کرتگ اَت ۔ پولیس ءَ ٹریفک ءِ روانی دارگ ءِ بھتام ءَ ھپت سد ھرجاپی دزگیر کرتگ ۔اے دزگیری داں  بیگاہ ءَ برجاہ اَنت ۔ ھرجاپی ءُ پولیس ءِ مزنیں کساسے یک دومی ءِ دیم ءَ اَتکگ ءُ پولیس ءَ ھرجاپیاں گوشتگ کہ آ فٹ پاتھ ءِ سر ءَ بہ رو اَنت ۔ پولیس ءَ سداں  ھرجاپیانی ھلاپ ءَ ترندیں کاروائی کرتگ ۔ اے رد ءَ امریکی وکیل ءُ نیشنل لائرز گلڈ نامیں گلے ءِ باسک بینا احمد ءَ کہ وت ھم ھمود ءَ بوتگ گوشتگ کہ پولیس ءَ بازیں ھرجاپی سڑک ءِ سر ءَ گرینتگ چَہ ایشی ءَ بازیں مردمے ٹپی ھم بوتگ بلے نیویارک پولیس ءِ ڈپٹی کمشنر ءَ اے ھبر رد کرتگ۔ وال اسٹریٹ ءَ ھزارھاں کساس ءَ پولیس اوشتارینگ بوتگ ۔ گوستگیں دو ھپتگ اِنت کہ پولیس ھرجاپیاں دذگیر کنگ ءُ زندان ءَ کنگ ءَ اِنت ۔ نیویارک ءِ مالیاتی مژگ '' وال اسٹریٹ ءَ پہ ھرجاپی نشتگیں اے زرمبش ءِ ارزشمندیں ھبر اِیش اِنت کہ ایشی ءِ اولی روچ ءَ نیویارک ءِ میئر بلو مبرگ ءَ بیان داتگ کہ مئے ورنا چَہ کالج ءَ گریجوئٹ بوگ ءُ درکپگ ءَ اَنت پہ ایشاں روزگار نیست ءُ ما اے بھار ءَ کہ ھما مصر، تیونس ءُ میان رودرتک ءَ چاگردی زھرشانی گندگ ءَ اِنت آ مئے سڑکانی سر ءَ در ریتکگ ۔