نیشنل پارٹی بلوچ کُش سرکار ءِ ھمراھداری کنگ ءِ درگت ءُ چہ راج ءَ پھلی بہ لوٹیت۔ دودا بلوچ۔۔بی۔ ایل۔ ایف یک ھاسیں سیاسی ٹولی ءِ گُشگ ءِ پدا کار کنگ اِنت۔۔جارکش این۔پی۔۔

کیچ(هالتاک توار) بلوچ سلاہ بندیں گل بی۔ ایل۔ ایف ءِ جارکش دودا بلوچ ءَ رسانکدر ءَ فون جنان ءَ گوشتگ کہ این۔پی ءِ جارکش بلوچ راجی جُنز ءِ بابت ءَ وتگڑ ءُ دروگیں زبان کارمرز کنگ اِنت۔ ایشی ءَ چہ ھمے پدر بیت کہ این۔پی ، بی۔ ایل۔ ایف ءِ مقابلہ کنگ ءِ سکت ءَ نہ داریت، بلکیں مکالمہ ءِ وتگڑیں نام ءِ سرا بد گُمانی پیدا کنگ ءِ جُھدا اِنت۔۔بلے نوں مکالمہ ءِ ھم ضرورت نہ انت۔ چیاکہ این۔ پی ءَ مرچی ءَ چہ بیست ءُ پنچ سال پیش گوں وتی بیان ءُ مکالمہ آں وتی بدیں کِرد پدر کُتگ۔دودا بلوچ ءَ ھال کنان ءَ گوشتگ کہ بلوچ راج این۔ پی ءِ گپاں چہ ھچ وڑیں بدگُمانے ءِ آماچ بیت نہ کنت۔چیاکہ زوراکیں مشرف ءِ وھد ءَھم این۔ پی ءَ بلدیاتی گچین کاریاں بھر زُرتگ ءُ مشرف سرکار ءِ بھر بیتگ ءُ مرچی ھم آ بلوچ کش سرکار ءَ گون ھمدست ءُ ھمگرنچ انت ءُ بلوچ نسل کُشی ءَ ھوار اِنت(این۔پی ءِ اے بدیں کرد چہ کس ءَ ھم چیر نہ اَنت۔۔بام)۔ھزاراں بلوچ شھیدانی خونانی رنگ این۔ پی رھشونانی پیشانیانی سرا چو روچ ءَ پدر اَنت۔ آ ایشاں چوں چیر دات کنت۔دودا بلوچ ءَ گوشتگ ھشدمی ترامیم ءِ توصیف ءُ ستا کنوک ءُ ترامیمانی نام ءِ سرا پاکستانی وتگڑٰیں ریاست ءِ بچارینگ ءِ بے سوبیں جُھد ءَ گوں ھواریں این چون وت ءَ بلوچ راجی جُنز ءِ دوزواہ گُشیت؟ البت اگاں این۔ پی گوں ما مکالمہ کنگ لوٹیت تا گُڑا آ درستاں چہ پیش مشرف سرکار ءُ ھنوگیں سرکار ءِ گُما ھوار بئیگ ءُ بلوچ ورناھانی کُشت ءُ کوش ءَ گوں ھوار بئیگ ءُ گوں پاکی ایجنسیاں ھمدستی ءُ ھمکاری ءِ سرا چہ بلوچ راج ءَ پھلی بہ لوٹیت۔پاکی سرکار ءِ گُما وتی سیادیاں بہ سندیت تا گُڑا بلوچستان ءِ کُجام ھندی ءَ آئی ءَ این۔پی ءِ رھشونانی گُم ءَ مکالمہ کنگ پہ ما اینچو گران نہ اِنت۔۔البت بلوچ راجی جُنز ءِ گُما ھمکاری ءُ ھمدستی مئے بُنکی شرطیں۔۔وھدیکہ بلوچ راجی جُنز ءِ ھلاپ ءَ وتگڑیں بُھتام بازی ءُ بیان بازی ءِ گپ ایں تا این۔ پی وتی شوق ءَ پیلہ بہ کنت۔۔چوشیں وتگر ءُ بے سریں بُھتاماں این۔پی بلوش راجی جُنز ءِ ھلاپ ءَ بلوچ راج ءِ تھا بد گُمانی ودی کُت نہ کنت۔ بی۔ ایل۔ ایف ءِ سرا بلوچ راج ءِ بھیسہ ءَ پروشت نہ کنت اے بے سریں ھیالے۔۔۔دومی نیمگ ءَ این۔ پی ءِ  ءِ جارکش ءَ رسانکدر ءَ ھال دیان ءَ گوشتگ کہ بی۔ ایل۔ ایف سیاسی کارندھاں کُشگ ءُ پدا آھاں راجی غدار نامینگ ءُ آھانی بدنام کنگ ءِ ھاترا دروگ بندگ اِنت۔ جارکش ءَ گوشتگ کہ شھید عارف بشیر ءِ سرجمیں کھول   چہ نیشنل پارٹی ءَ سیادی دارنت۔۔ آ بس نیشل پارٹی ءَ گوں ھمگرنچی ءِ نام ءِ سرا کُشگ بیتگ۔ بی۔ ایل۔ ایف سیاسی کارندھاں کُشیت ءُ پدا ھمے نشوندھی ءَ دنت کہ من ٹوھیں راجی ایجنٹے کُشتگ ءُ بلاھیں کارے کُتگ۔۔آئی ءَ گوشتگ کہ بی۔ایل۔ ایف یک ھاسیں سیاسی ٹولی ئے ءِ گُوشگ ءِ پدا مئے سیاسی کارندھاں کُشگ اِنت۔۔اے یک سِھرائیں حقیقتے راج ءِ دیم ءَ پدریں کہ بی۔ ایل۔ ایف چیا بس نیشنل پارٹی ءِ کارندھاں کُشگ اِنت۔ ایشی ءِ پُشت ءَ چونیں دستے ھواریں؟ آئی ءَ گوشتگ بی۔ایل۔ایف ءِ یک ھاسیں ٹولی ئے این۔پی ھلاپیں سیاسی گروپ ءِ گوشگ ءِ پدا مئے سیاسی کارندھاں گکُشگ ءُگار کنگ انت۔اے گروپ  وت ءَ آزادی ءِ چمپئن زاھر کنگ ءِ جُھد ءَ اِنت۔۔ھالتران ءَ گُشگ بیتگ کہ بی۔ ایل۔ ایف ءِ تھا ھمے ھاسیں ٹولی ھلاپداریں سیاسی گروپ ءِ کوپگانی سرا رُستگ ءُ مزن بیتگ ءُ این ۔پی ءَ ٹارگٹ کنگ انت۔ اے گل ءِ بے سریں کرد ءُ سیاسی کارندھانی کُشگ ءَ چہ ھمے گپ پدریں کہ آزادی ءِ نام ءِ سرا اے  گل  انچیں بے سریں کرداں گوں ھوار اِنت کہ نو ایشی ءَ آزادی ءِ جُنز ءَ گوں ھواریں گل ءِ گُشگ ھم پد نبودیں گپے۔۔آئی ءَ گوشتگ بی۔ایل۔ ایف وتی کردانی چیر دیگ ءِ ھاترا ھمے نشوندھی ءَ دیگ اِنت کہ بی۔ ایل۔ ایف ءِ سرجمیں فیصلہ آں مشترکہ کمانڈ بازیں چار ءُ بچار ءَ رند کنگ اِنت، بلے اسل گپ اِش انت کہ مشترکہ کمانڈ ھچ جاہ گندگ ءَ آیگ ءَ نہ اِنت۔آئی ءَ گوشتگ بی۔ ایل۔ ایف ءِ اے کردانی پُشت ء۔ بی۔این۔ایم خلیل گروپ ھوار انت کہ اے گروپ بلوچستان ءِ ھر ھند ءَ نیشنل پارٹی ءِ دیم ءِ دیوال اِنت۔ جارکش ءَ گوشتگ پدا بی۔ ایل۔ ایف یک اَنچیں سیاسی پارٹی ءِ گُشگ ءً پدا کار کنگ انت اے سیاسی پارٹی بلوچستان ءَ فوجی آپریشن ۔بلوچ ورناھانی کوش ءَ ھوار اِنت۔