شال : ایمنسٹی انٹرنیشنل پاکستان ءَ سلام ایڈوکیٹ ءِ کوش ءِ سر ءَ بے تاھیری درشانتگ

شال : ایمنسٹی انٹر نیشنل ءَ بلوچستان نیشنل پارٹی ءِ راھشون عبدالسلام ایڈوکیٹ ءِ کوش ءِ سر ءَ بے تاھیری درشانتگ ءُ گوشتگ کہ بلوچستان ءَ شھروندانی پھازگ المی کنگ بہ بیت ۔ پاکستانی سرکار ءَ مھکمیں گامگیج چست کنگ لوٹ اِیں ۔ پاکستان ءَ ایمنسٹی انٹرنیشنل ءِ پٹ ءُ پولکار مصطفی قادری ءَ بلوچستان ءَ انچائیں شھروندانی سر ءَ دو جتائیں اُرشانی بے سوبی پدر کرتگ ءُ گوشتگ کہ گوستگیں روچ ءَ خضدار ءَ پجارگ نہ بوتگیں سلاہ بنداں بلوچ سیاسی سروک عبدالسلام ایڈوکیٹ کشتگ ۔ عبدالسلام ءِ انسانی حقانی درگت ءُ پہ بیگواھیں مردمانی درکنگ ءَ کردار ستا کرز بوتگ اَنت چَہ ایشی ءِ کوش ءَ بازیں جستے پیداک بیت کہ بلوچستان ءَ پہ شھروندانی پھازگ ءَ سیکورٹی فورسز چِہ کچ ءَ سنگین اَنت یا اے کار کنگ ءِ گین ھست اِنت اِش ءُ گوشتگ کہ گوستگیں روچ ءَ رو درتکی بلوچستان ءَ تیل ءُ گیش شوھاز کنوکیں کمپنی '' بی جی پی '' ءِ کارمندانی سر ءَ  پہ بلوچستان ءِ گستاَئی ءَ جنگ کنوکیں گل بلوچ لبریشن آرمی ءَ اُرش ءِ ذمہ واری من اِتگ ءُ گوشتگ کہ سئے کارمند کشتگ ءُ یکے ٹپی کرتگ ۔ بیان ءِ تہ ءَ گوشگ بوتگ کہ پاکستانی فورسز ءُ لس سرکار ءِ سر ءَ بلوچستان ءَ برجاھیں جیڑھانی ذمہ واری لڈگ بیت کہ بلوچستان ءَ لس مھلوک ءِ حقانی پھازگ ءُ آھانی جانانی پھریزگ ءَ پھک ءَ بے سوب بوتگ اَنت ۔ بیان ءَ گوشگ بوتگ کہ مزنیں فوجی سروک ءُ راھبندانی ھاکمی ءَ المی کنوک اے ھبر ءَ ستک بہ کن اَنت کہ وتی نزوریاں دور کن اَنت ءُ ذمہ وارانی ھلاپ ءَ کارروائی کنگ لوٹ اِیت ۔