سلام ایڈوکیٹ ءُ آئی ءِ جنکو ءِ کوش چَہ دژمن ءِ گنوکی کارپدان اِنت 'بلوچ نیشنل موومنٹ

شال : بلوچ نیشنل موومنٹ ءِ بنجاھی جارکش ءَ گوشتگ کہ خضدار ءَ دژمنانی دست ءَ بلوچستان نیشنل پارٹی ءِ راھشون عبدالسلام ایڈوکیٹ ءُ آئی ءِ یک سالیگیں جنکو ءِ کوش یک انچیں جاورے پیش کنت کہ دری ءُ تھی جنجال ءُ زورا٘ں دژمن  گنوک کرتگ ۔یک نیمگے آل پارٹیز ءِ نام ءَ امریکہ ءِ بلیک میل کنگ ءِ ناٹک بوگ ءَ اِنت ءُ دومی نیمگ ءَ چَہ بلوچ جھد آجوئی ءَ پروش وارتگیں ریاستی فورسز ءُ آھانی کاسگ چٹ سلاہ بندیں گل بلوچ گلزمین ءِ ھمک کنڈ ءَ کشت ءُ کشار ءَ دزگٹ اَنت ۔ بی این پی ءِ راھشونانی نیمگ ءَ اے جاوراں گوں دژمن ءَ گلک کنگ یا چَہ دژمن ءَ انگت شھریت ءِ لوٹ کنگ رندگیری کرزیں کار ے نہ اِنت ۔ وھدے کہ سیادی گیش اِتگ اَنت بلوچ وتی باندات ءِ شورءَ گوں بے کساس ندریگانی پجیگ ءَ آجوئی ءِ مزنیں مراد ءَ رسگ ءَ سرگرم اِنت ۔ سیاسی ءُ جنگی پڑ ءَ جوانیں گلی ءُ آشوبی ادارھانی سبب ءَ سرجمیں دنیا ءَ وتی بستار ءِ منینگ ءَ سوبمند بوتگ ۔ میتانی ءُ چَہ آھاں ریچوکیں ھون ءَ گوں چَہ دژمن ءَ ھچ رنگیں سیادی ءِ واھگمند بوگ وت سیاسی ءُ دپتری زوراکی یے ۔ گھتری ھمیشی ءِ  تہ ءَ اِنت کہ وتی راجی ءُ دپتری ذمہ داریاں سرپد بہ بئے اِیں ءُ راستیاں دیم ءَ کنان آجوئی ءُ آشوب ءِ مزنیں مراد ءَ گوں ھمنگرنچی ءَ مھکم بہ کن اِیں پرچا کہ ریاکاری یک راجی تباھی یے ایوک جانی ندریگ ءَ گوں راج منزل ءَ سر نہ بنت ۔ آشوبی شوربندی اے ندریگانی راھشونی کنان منزل ءَ نزیک بوگ ءَ کمک بنت ۔