دبئی : القاعدہ ءِ راھشون ءِ نوکیں ویڈیو کلو

دبئی : [ ریوٹرز]القاعدہ ءِ نوکیں راھشون ایمن الظواھری ءَ یک انٹر نیٹ ویڈیو کلوے ءِ تہ ءَ میان رودرتک ءَ سرچست کنوکیں یاگیانی پلہ مرزی کنان ءَ گوشتگ کہ  آئی ءِ سر ءَ جنگولانی نیٹورک ءِ کمک ءَ  گوں اُرش ءِ دہ سال ءَ پد نوں عرب چَہ امریکہ ءَ نہ ترس اَنت ۔  دہ سال نیویارک ءُ واشنگٹن ، پنسلونیاءِ سر ءَ بوتگیں بابرکتیں اُرشاں گوستگ کہ آھاں جھانی صلیبانی پلپا [ ستون ] سُرینتگ ءُ دنیگت سرینگ ءَ اَنت اِش ۔ایمن الظواھری ءَ سئے شنبے ءِ روچ ءَ یک اسلامی ویب سائٹے ءَ اے ویڈیو پوسٹ کرتگ ۔ اے ویڈیو یازدہ ستمبر دوھزار یازدہ ءِ سالروچ ءِ درگت ءَ شنگ کنگ بوتگ ۔ایمن الظواھری  ءَ کہ یک مصری یے جون ءَ اُسامہ بن لادن ءِ کشگ ءَ پد القاعدہ ءِ ذمہ واری وتی سر ءَ زرتگ اَنت ، نامداریں بغاوت کہ آھاں مصر، تیونس ، لیبیا ءَ سرکار بدل کنائینتگ اَنت ساڑاتگ اَنت ءُ دگہ مسلماناں ھم زور داتگ کہ وتی سرکاراں بدل بہ کن اَنت ۔ آئی ءَ گوشتگ کہ عرب چَہ ترس ءُ دھشت ءَ آجوبوتگ اَنت ، گڑا نوں کئے ءَ باج برتگ ءُ کے ءَ پروش وارتگ ؟ بازیں تجزیہ نگار گوشگ ءَ اَنت کہ میانی رودرتک ءُ گوریچانی افریقہ ءَ مردم  پہ اُستمانی تک ءَ گھتری آرگ ءَ جھد ءَ اَنت۔ آ اُود ءَ سیاسی بودناکی ءِ گیش بوگ ءِ سبب ءَ القاعدہ ءِ اسر کم بوتگ ۔اے زرمبشانی تہ ءَ القاعدہ ءِ کردار سک کم اِنت یا نیست ۔ یک کلاکے ءِ کساس ءَ  دراجیں اے ویڈیو کلوءِ کہ سرھال ئِے '' نزیک رستگیں باج [ فتح ]ءِ بام ''ایرکنگ بوتگ ، ءِ تہ ءَ آئی ءَ عرب ھاکمانی زوال ءِ سر ءَ اے اُوست  درشانتگ ءُ گوشتگ کہ اے پہ روایرشتی ملکاں چیر دستی ءُ یک راستیں اسلامی شریعت ءِ بنچک ءَ جوڑ بیوکیں سرکار ءِ بن ھشت بیت ۔عرب زمین چنڈ ءَ امریکہ ءِ اُوست شکوندیم کرتگ اَنت ۔آئی ءَ گوشتگ کہ امریکہ ءَ دمگ ءِ تہ ءَ وتی نزیکیں ھمراہ ءُ گوں وت تپاک داروک ببا داتگ اَنت ۔ھمے ویڈیو کلپ ءِ تہ ءَ اُسامہ بن لادن ءِ ھم کلوے ھوار اِنت کہ الظواھری گوشگ ءِ رِد ءَ چد ءُ پیش شنگ کنگ نہ بوتگ ،  ویڈیو ءِ رمس زانگ نہ بیت ۔ھمیشی ءِ تہ ءَ اُسامہ ءَ  جبراکیں سرمایہ داری ءُ مزنیں کارپوریشنزانی امریکہ بیھار داتگ ۔ آئی ءَ گوشتگ کہ جنگ ءِ بن جبراکی ءِ ھلاس کنگ بوتگ کہ امریکہ دیوالہ بوگ ءِ نزیک ءَ رسینتگ ئِے ۔