پاکستانی فوج ءَ من اِتگ کہ آئی ایس آئی ءِ گوں حقانی نیٹورک ھال اھوال ھست

روالپنڈی : پاکستانی فوج ءَ من اِتگ کہ آئی ءِ گوں حقانی نیٹورک ءَ ھال ءُ اھوال ھست اِنت ۔ پاکستانی فوج ءِ جارکش اطہر عباس ءَ امریکن ٹی وی سی این این ءَ انٹرویو داتگ ءُ من اِتگ کہ آئی ایس آئی ءِ گوں حقانی نیٹورک ءَ ھال ءُ اھوال ھست ۔ آئی ءَ گوشتگ کہ ھرچ  انٹلی جنس ایجنسی یے سرکار ءِ ھلاپ ٹک یا دھشت گرد گل یا چوناھیں ھم نامے بہ دئے ءَ گوں ھال ءُ اھوال کنگ لوٹ اِیت  داں جوانیں آسرے در بئیت ۔اگاں کسے مارا اے بھتام ءَ بہ بند اِیت کہ ما گوں حقانی نیٹورک ءَ ھال  ءُ اھوال کنوکیں ایوکیں ملک اِنت گڑا آھانی ھم گوں دگراں گپ ءُ تران ھست اَنت بلے ایشاں مراد اے نہ اِنت کہ آئی ایس آئی اے گلانی کمک کنگ ءَ اِنت یا آھاں سکین دیگ ءَ اِنت ۔ آئی ءَ گوشتگ کہ امریکہ ءَ ھچ رنگیں گواچن نہ داتگ کہ آئی ایس آئی حقانی نیٹورک ءَ کمک کنگ ءَ اِنت ۔آئی ءَ ایڈمرل مائیک مولن ءِ اے ھبر ءِ سر ءَ ھم بد برتگ کہ پاکستان کابل ءَ امریکہ ءِ سفارتجاہ ءُ دگہ ماڑیانی سر ءَ اُرش کنگ ءَ کمک کنوک بوتگ ۔آئی ءَ گوشتگ کہ حقانی نیٹورک ءِ پاکستان ءَ ھچ رنگیں گل کاری [ تنظیمی ڈھانچہ ] نیست آ چَہ رودرتکی اوگانستان ءِ دمگ کنر ءُ نورستان ءَ کارروائی کنت ۔