کابل ' طالباناں گوشتگ کہ آھآں پہ نیٹو ھیلی کاپٹرانی پرینگ ءَ میزائل رستگ

کابل [ ھالچار ] طالباناں اے ھبر جار کرتگ کہ آھاں نوکیں میزائل رستگ کہ چَہ آھانی کمک آ نیٹو ھیلی کاپٹراں دور دیگ ءَ اَنت بلے اوگان ءُ نیٹو واکداراں طالبان ءِ اے ھبر رد کرتگ ءُ گوشتگ کہ گیشتر ھیلی کاپٹر  ھرابیانی سبب ءَ یا وھیل آماچ بوگ ءَ پد اشتاپی نندگ ءَ ترک اِتگ اَنت ۔ طالبان ءِ ربال ذبیح اللہ مجاھد ءَ گوں یک درملکی رسانکدرے ءَ گپ جنان ءَ گوشتگ کہ  طالبان جنگولال پمیشکا گیشتر نیٹو ھیلی کاپٹردور دیگ ءَ اَنت کہ آھاں نوکیں میزائل دزکپتگ بلے آئی ءَ اے میزائلانی ماڈلانی بابت ءَ ھچ رنگیں گپ نہ جتگ ۔ طالبان ربال ءَ گوشتگ کہ اے میزائل سرجمیں ملک ءَ طالبان جنگیاں سر کنگ بنت دنیگت ملک ءِ نیم اُستاناں اے سر کنگ بوتگ اَنت ۔ ربال ءَ  گوشتگ کہ اے سکیں سوبمندیں سلاھے بلے آئی ءَ اے ھم پدر نہ کرتگ کہ اے سلاہ آھاں چَہ کجام ملک ءِ نیمگ ءَ دیگ بوگ ءَ اَنت ۔ھال رسانک ءِ رد ءَ اے جست ءِ پسو آئی ءَ گوں پر کندگیں دپے ءَ دیان ءَ گوشتگ کہ امریکہ روچ پہ روچ پہ وت ءَ نوکیں دژمن جوڑ کنگ ءَ اِنت ما ھرچے بہ لوٹ اِیں چَہ اللہ ءِ واھگ ءَ رست کنت ۔