ترکی ءَ شام ءِ سلاھانی منورے گیپتگ

نیویارک : ترکی وزیر اعظم طیب اُردگان ءَ ھال داتگ کہ آئی ءِ ملک ءَ پہ شام روکیں یک منورے [ آپی جھاز] گیپتگ کہ چَہ سلاھاں پر بیتگ ۔آئی ءَ گوشتگ کہ ترکی چَہ  وتی تیابی  ءُ بالی راھاں پہ شام ءَ سلاہ روگ ءَ نہ ھل اِت۔ ترکی شام ءَ ڈکٹیر شپ ءَ سک ایرجنگ ءُ بشار الاسد ءَ کڈن کنگ ءَ اِنت کہ آ زھرشانی کنوکیں مردماں شکنجہ مہ کنت ءُ سرکار ءَ لس ءِ دست ءَ بہ دنت داں اُستمانی سرکارے بے ٹھ اِیت۔ ترکی ءَ گوں شام ءِ سرکار ءَ توامیں سیادی سستگ اَنت ءُ ھژدار داتگ کہ شام ءِ سر ءَ پابندی جنگ بیت ۔ ترکی گوں شام ءِ سرکار ءِ ھلاپ ءَ پاد اَتکگیں گلاں انچوش ھمکار اِنت کہ ھمے ماہ ءِ بندات ءَ آئی ءَ گوں سرکار ءَ ھلاپیں  مردم دیوان ھم کرتگ ۔ طیب اُردگان ءَ اے پدر نہ کرتگ کہ مِنور چَہ کجام ملک ءِ نیمگ ءَ شام ءَ روگ ءَ بوتگ ۔ زانگ بہ بیت ایران گوں شام ءِ بشارالاسد ءِ سرکار ءَ  ھمتنگ زانگ بیت وھدے کہ سعودی عرب ھم شام ءَ بشار الاسد ءِ سرکار ءَ ناوش اِنت ءُ دومی نیمگ ءَ ایران بحرین ءِ شیخ ءِ ھلاپ ءَ چست بیوکیں مردمانی پلہ مرز ھم زانگ بیت اے چست ءُ ایر چوناھیا عرب ملکانی تہ ءَ چَہ وتی آمریں ھاکماں  دلسیاہ بوگ ءِ درانگاز اِنت بلے دمگ ءِ تہ ءَ بیوکیں گر ءُ چیل ءُ وتی اسرمندی ءِ برجاہ دارگ ءَ جھانی واکداراں ابید دمگ ءِ واکدار ھم دست ءُ پاد جنگ ءَ اَنت کہ چَہ آھاںی تہ ءَ ایران ءُ سعودی عرب سھرا اَنت بلے ھر دوانی لوٹ ءُ  ۔گزر سیاسی ءَ گیش مذھبی اَنت ایران شیعِاھانی پلہ مرز ءُ سعودی عرب سنیانی پلہ مرز کنوگ منگ بیت ۔شام ءَ بشار الاسد ءِ سر کار شیعیاھانی سرکار منگ بیت وھدے کہ شام ءِ آبادی گیشتر سنی اِنت۔