نوکنڈی : ایران ءَ روکپتی ءُ رودرکتی بلوچستان ءِ سیمسر بستگ

نوکنڈی: مستونگ ءَ کشگ بوتگیں شیعہ زیارتیانی پُرس ءَ '' دوستی دروازگ '' ءَ باپاری سرگرمیانی داں پانزدہ روچ مھتل بوگ ءِ گمان اِنت ۔ اد ءَ ھال ھست کہ ایرانی سرکار پہ باپاریانی آسراتی ءَ لھتیں کار کنگ لوٹ اِیت پمیشکا داں پانزدہ روچ ءَ سیمسر بند بیت ۔ ھندی مردمانی گوشگ اِنت کہ سمیسر ءِ بند بوگ ءَ بازیں معاشی جنجال ودی بیت ۔اد ءَ کارکنوکیں ھمالاں وتی شھر ءُ ھندانی نیمگ ءَ برگشت بنا کرتگ پرچا کہ اد ءَ گیشتر کاربار گوں سیمسر ءَ بندوک اِنت ۔ ھندی مردماں لوٹ کرتگ کہ ایران زوت سیمسر ءَ پچ بہ کنت داں باپاری کار بندات بہ بنت ۔ چَہ ایران سرکار ءِ نیمگ ءَ سیمسر ءِ بندش ھمروچگیں کارے جوڑ بوتگ ایرانی واکدار کسان کسانیں ھبرانی سر ءَ روکپتی ءُ رودرکتی بلوچستان ءِ سیمسراں بند کن اَنت چَہ ایشی ءَ  نہ ایوک سیمسر ءَ نندوکیں  بلوچانی کاربار اسرمند بنت بلکیں ھردو نیمگ ءِ بلوچ یک دومی ءِ گندک ءَ ھم لاچار بنت ۔