شال : چَہ بلوچ سرمچارانی سومبندیں اُرش ءَ پد بلوچستان ءَ پاکستانی لشکر کشی بنا بوتگ

شال : بلوچ نیشنل وائس ءِ بنجاھی بیان ءِ تہ ءَ گوشگ بوتگ کہ بلوچستان ءِ دمگ ھرنائی ءَ پہ بلوچ مڈیانی لٹ ءُ پل ءَ سرگرمیں تیل ءُ گیس شوھاز کنوکیں درملکی کمپنی ءِ سر ءَ راج لشکر بلوچ آجوئی لشکر [ بلوچ لبریشن آرمی ] ءِ سرمچارانی سوبمندیں اُرش ءَ پد گوستگیں سئے روچ اِنت شاھرگ ، ھرنائی ءُ کش گوری دمگاں بلوچ آبادی ءِ سر ءَ اُرش بنا کنگ بوتگ ۔ دنیگت چَہ بازیں ھند ءَ چَہ چل ءَ گیش مری بلوچ آوار جنگ بوتگ ءُ ڈسگ نہ بوتگیں جاہ ءَ برگ بوتگ اَنت ۔ بازیں بلوچ چَہ شاھرگ ھرنائی ءِ روٹ ءَ گاڑیاں ایرکنگ ءُ آوار جنگ بوتگ ۔ بیان ءَ گوشگ بوتگ کہ ریاست ءِ زورگریں فوج ءِ مدام ھمے ھیل بوتگ کہ ھرجاہ ءَ کہ آھانی فوج ءِ سر ءَ اُرش کنگ بوتگ آھاں وتی دیم پہ بے سلاھیں بلوچاں داتگ ءُ میان اُستمانی دھشت گرد نامینتگیں بلوچ دشمن ریاست چَہ ھرسنگر ءَ پروش ورگ ءَ پد وتی زھر ءَ بلوچانی سر ءَ کشگ ءَ اِنت پمیشکا گوستگیں دو سال ءِ میان ءَ ریاستی دھشت گرد ءُ آھانی ایجنسیاں سداں بلوچ سیاسی کارکن ءُ انچائیں بلوچاں جتگ ءُ چپتگ ءُ آھاںی دیم شرینتگیں میت دور داتگ اَنت بلے دژمن ریاست ءَ سرپد بوگ لوٹ اِیت کہ ریاستی  کارروائیاں بلوچ راج لشکر گیشر مھکمیں ارادگ ءَ گوں دیم ءَ جنر اِیت  ءُ بلوچ زرمبش ءَ نامھکم کرت نہ کن اَنت ۔ بیان ءِ تہ ءَ گوں میان اُستمانی اُستمان دوستیں ملک ءُ انسانیت دوست ءَ گوں دزبندی کنگ بوتگ کہ آ ریاست ءِ بلوچ دژمن کارروائیانی نوٹس بہ زور اَنت ۔ پہ راج آجوئی ءَ برجمیں بلوچ جھد ءَ ھرچ نیمگ ءَ سیاسی ءُ اخلاقی پلہ مرزی کنگ بہ بیت ءُ میان اُستمانی ایمن ءَ ترسناکیں بلوچ دژمن ریاست ءَ دھشت گردانی لڑ ءَ ھوار بہ کن اِت ءُ ایشی ءِ سر ءَ فوج کشی بہ کن اَنت ۔ بیان ءِ گڈی ءَ گوشگ بوتگ کہ بلوچ گچینی ورنا وت ما وتی جیڑہ ، وت پسندی ، ءُ دگہ کسانیں اَڑ کڑاں بے ھیال بہ کن اَنت ۔ بلوچ راج کاروان انشاء اللہ زوت '' راج آجوئی '' ءِ منزل ءَ سر بیت ۔