شال: پہ بلوچ ڈاکٹر فورم ءِ اُگدھداراں سوگندواری مراگش برجم دارگ بوتگ

شال : بلوچ ڈاکٹر فورم ءِ بنجاھی کارداری ءُ  بنجاھی مجلس ءِ باسکاں پہ وتی اُگدہ ءَ سوگند وارتگ ، گوستگیں ڈی جی ہیلتھ ڈاکٹر پیرجان خواجہ خیل ءَ سوگند وارینتگ اَنت ۔ سوگندواری مراگش بولان میڈیکل کمپلکس ھسپتال ءِ آڈیوٹوریم ءَ برجم دارگ بوتگ ۔ فورم ءِ کماش ڈاکٹر عظیم بگٹی ، کمک کماش ڈاکٹر عبدالصمد مینگل ، کارگشاد ڈاکٹر آصف انور ، جارکش ڈاکٹر واحد بخش ، کمک کارگشاد ڈاکٹر نصیر کرد ۔ بنجاھی کمیٹی ءِ باسک پروفیسر ڈاکٹر علی دوست ، پروفیسر ڈاکٹر عادل ، پروفیسر ڈاکٹر ارشاد کھوسہ ،ڈاکٹر حمزہ ، ڈاکٹر احسان ، ڈاکٹر عبدالباقی عیسی زئی ، ڈاکٹرخرم لاشاری ،ڈاکٹر قادر عمرانی ، ڈاکٹر عبد المتین ءَ پہ وتی گلانی کارءَ گوں ستک ءُ دلپاک بوگ ءَ سوگند وارتگ ۔ اے دیوان ءَ پروفیسرز، ڈاکٹرز ، وکیل ، نودربرانی پجیگ ءَ دگہ یونین ءُ ایسوسی ایشن ءِ مردماں ھم بھر زورتگ ۔ مراگش ءَ پی ایم اے ءِ کماش ڈاکٹر مزار خان ، بی ایم اے ڈاکٹر فیض ھاشمی ، ڈاکٹر حکیم لقمان ، بلوچ بار ءِ ایڈوکیٹ شیھک بلوچ، بلوچ بلڈ بینک ءِ محمد انور ، بلوچ اسٹوڈنٹس ایکشن کمیٹی ءِ ڈاکٹر ابوبکر ، بلوچستان فارماسسٹ ایسوسی ایشن ءِ ڈاکٹر سلیم ، ڈاکٹر سید سلطان آغا، ڈاکٹر غلام محی الدین سمالانی ، ڈاکٹر مصطفی شاھوانی ، پیرامیڈیکس ءِ کماش مراد بگٹی ، کارگشاد سلام زھری ، کلرک ایسوسی ایشن ءِ  بی ایم سی ءِ باسک  باسط ءُ سراج ، بی ایس او آزاد بی ایم سی بنزہ ءِ باسک ، جمہوری وطن پارٹی ءَ ابید دگراں بھر زرتگ ۔ مراگش گوں قرآن ءِ تلاوت ءَ بنا کنگ بوتگ ۔ چَہ ایشی ءَ پد بلوچ بار ءِ شیھک بلوچ ءَ بلوچ داکٹر فورم ءِ باسک ساڑاتگ اَنت ءُ گوشتگ کہ بلوچ ڈاکٹر فورم ءِ جوڑ کنگ یک جوانیں گامگیجے ھمے رنگ ءَ کہ ھائی کورٹ ءُ سپریم کورٹ ءَ بلوچ وکیل ڈالگچار کنگ بوگ ءَ اَنت ھمے پیم ہیلتھ ڈیپارٹمنٹ ءَ بلوچ ڈاکٹر ڈلگچار اَنت ۔بلوچ بار ھرچ رنگ ءَ گوں بلوچ ڈاکٹر فورم ءَ ھمکاری کنت ۔ بلوچستان میڈیکل ایسوسی ایشن ءِ کارگشاد ڈاکٹر فیض ھاشمی ءَ گوشتگ کہ مارا وشی اِنت کہ بلوچ ڈاکٹر فورم ءَ پہ بلوچ ڈاکٹراں توار چست کرتگ بی ایم اے گوں بلوچ ڈاکٹر فورم ءَ ھمکاری کنت ۔ پی ایم اے ءِ  کماش ڈاکٹر مزار ءَ گوشتگ کہ بلوچ ڈاکٹر باید یکجاءُ تپاکی ءَ جھد بہ کن اَنت ۔ بلوچ ڈاکٹر فورم  ءِ جارکش ڈاکٹر واحد بخش ءُ کمک کماش ڈاکٹر صمد مینگل ءَ گوشتگ کہ بلوچ ڈاکٹرفورم  ءَ گوں سیاسی ، مذھبی ءُ ٹک ءُ تمنی گلاں ھچ رنگیں سیادی نیست ما ایوک ءُ ایوک پہ بلوچ ڈاکٹر ءُ بلوچ مھلوک ءَ جھد کنگ ءَ اِنت۔ زوت سرجمیں بلوچستان ءَ رواِیں ءُ بلوچ ڈاکٹر فورم  ءِ بنزہ جوڑ کن اِیں ۔ آئی ءَ چَہ ھرنائی ڈی ایچ کیو ءَ ڈاکٹر وزیر مری ءِ چَہ پاکستانی سیکورٹی ایجنسیانی دست ءَ آوار جنگ گوں ترندی ءَ ایر جتگ ءُ گوشتگ کہ اگاں آئی ءَ میارے کرتگ گڑا دادگس ءَ پیش کنگ بہ بیت اگاں چوش نہ بیت گڑا بلوچ ڈاکٹر فورم پہ آئی ءِ درکنگ ءَ سک زھرشانی کنت ءُ چَہ ایشی ءَ ابید ڈاکٹر دین محمد ءُ ڈاکٹرا کبر مری ءَ ھم دوسال اِنت کہ آوار جنگ بوتگ اَنت ءُ دنیگت درکنگ نہ بوتگ اَنت ۔ مراگش ءِ گچینی مھمان ڈاکٹر پیرجان خواجہ خیل ءَ گوشتگ کہ بلوچ یک چَہ مڈیاں سر ریچیں سرزمینے ءِ واھند اِنت بلے بلوچ انگت درپہ در اَنت ءُ ھرروچ بلوچ نودربر، دانشور ءُ سیاسی راھشونانی ءُ بلوچ اُستادانی دیم شریتگیں میت دز کپگ ءَ اَنت ءُ اگاں مروچی بلوچ راج تپاک ءُ ھمدست نہ بوت گڑا بلوچ راج ءِ نام ءُ نشان پشت نہ کپ اِیت ۔ آئی ءَ گوشتگ کہ ھر تک ءَ بلوچ ڈالگچار کنگ بوگ ءَ اِنت ءُ آھانی مڈی چوش کہ ریکوڈک ، سیندک ءُ سوئی گیس پلگ بوگ ءَ اَنت ۔