ورنائیں بچ ءِ شھادت ءِ سر ءَ پھربند آں ' شھید آصف یوسف ءِ مات

تربت : بلوچ نیشنل موومنٹ ءِ شھیدیں باسک آصف یوسف ءِ مات ءَ گوشتگ کہ من ءَ وتی ورنائیں بچ ءِ شھادت ءِ سر ءَ پھر اِنت ءُ پہ وت ءَ آصف ءِ شھادت ءَ یک مزنیں دادے سرپد بئے آں ۔ آئی ءَ گوشتگ کہ راج آجوئی زرمبش ءِ تہ ءَ ندریگ ءُ شھادت المی اَنت پرچاکہ ھچ آشوب ابید چَہ ھون ءُ ندریگاں سوبین نہ بیت ۔ مروچی اگاں آصف راج آجوئی ءِ راہ ءَ شھیدانی کاروان ءِ بھر جوڑ بوتگ گڑا پہ من ءَ چَہ ایشی ءَ وشتریں گپ دگہ چی بوت کنت پرچا کہ آصف جان پہ یک مول ءُ راج مرادے ءَ ندر بوتگ من ءَ پھر اِنت کہ بلوچ دپتر ءِ تہ ءَ آصف دز ، ڈنگ ءُ گوں دگہ بدیں نامے ءَ یات کنگ نہ بیت بلکیں آیوکیں پدریچ ایشی ءَ یک راجی شھیدے ءِ بستار ءَ یات کنت ءُ بلوچ ءِ آیوکیں پدریچ شھید آصف ءُ شھید ابوبکر ءَ ھما شھیدانی رنگ ءَ یات کن اَنت کہ پہ ماتیں گلزمین ءِ آجوئی ءَ  ءُ ایشی ءَ چَہ زوگراں پچ گرگ ءَ وتی سر اِش ندر کرتگ ۔ آئی ءَ گوشتگ کہ اے وھد ءَ بلوچ گلزمیں سکیں نہ گیگیں جاوراں دوچار اِنت بلوچ سیاسی جھدکار ، شاعر ، نوشتہ کار ءُ بلوچ اھوالکارانی سر ءَ زور سرکار ءَ بیڑ آئورتگ ۔ چَہ لوگاں ءُ بساں آوار جنگ ءُ راجی سنچ ءُ پگر  دارگ ءِ سبب ءَ جنگ ءُ شھید کنگ بوگ ءَ اَنت بلوچ گلزمین ءِ سر ءَ آوار جتگ ءُ دیم شرینتگیں میتانی درچ دراج بیان اِنت بلے بلوچ راج ءَ باور اِنت کہ اے دیم شرینتگیں میت ءُ آوار جنگ پہ منزل ءَ سر بوگ ءَ کمک کن اَنت پہ اے مراد ءُ منزل ءَ سداں برز ورناھاں وتی جان ءُ زند پہ گلزمین ءِ پھازگ ءَ ندر کرتگ ۔اگاں انوں مئے جوان ءُ بچ چَہ ندر ءُ شنک بوگ ءِ لیکو ءَ بے سما بہ بنت گڑا باز تاوان رست کنت بلے من ءَ پھر اِنت کہ آصف ءُ ابوبکر رنگیں ورناھانی اے سرزمین ءَ ھچ رنگیں کمی نہ اِنت کہ آھاں شھید اکبر، بالاچ مری ءُ شھید غلام محمد ءِ راہ دوست کرتگ ۔ آئی ءَ شھید آصف ءُ شھید ابوبکر ءِ شھادت ءَ یک دادے نامینتگ ءُ گوں توامیں ورناھاں گوشتگ کہ آ پہ راج آجوئی ءَ مدام چَہ مستر ءَ مستریں ندریگ دیگ ءَ چک ءُ پد مہ بنت ءُ ستک بہ کن اَنت کہ چَہ اے ندریگاں مارا مئے منزل الم رس اِیت ۔