ھارءَ مل اِتگ ءُ پنجاہ ءُ پنچ لکھ سندھی بے لوگ کرتگ

کراچی [ اھوالکار ] پاکستان ءِ زرباری اُستان سندھ ءَ چَہ انوگیں ھور ءَ اسرمندبوتگیں مردمانی کساس روچ پہ روچ گیش بیان اِنت ءُ اُستان سرکار ءِ ھساب ءَ اے کساس پنجاہ ءُ پنچ لکھ ءَ ھم برزشتگ ۔اُستان ءِ دگہ دمگاں ھم ھور گورگ ءَ اِنت ءُ اے میان  ءَ بیران بیوک چَہ دوسد ءَ گوستگ اَنت ۔ مرتگیںانی تہ ءَ پنجاہ ءُ پنچ جنین ، سی ءُ یک چک ھم ھوار اِنت اُستان ڈزاسٹر مینجمنٹ اتھارٹی ءِ مچ کرتگیں ھالانی رِد ءَ میر پور خاص ءَ سی ءُ ھشت ءُ بدین ءَ یک ماھے ءِ تہ ءَ بیست ءُ شش مردم بیران بوتگ ۔ چَہ بدین ءِ شھر نندو ، کھوسکی ، شادری لارج ، کڈھں ءُ سیرانیءَ مردم درکپگ ءَ اَنت ۔  بی بی سی ءِ ھالانی رد ءَ پہ مردمانی کمک ءَ بندش جتگیں مذھبی گل جماعت الدعوۃ ھم کار کنگ ءَ اِنت ۔ چَہ گولارچی ءَ گل ءِ راھشون یحیِ مجاھد ءَ گوشتگ کہ ملکی ءُ میان اُستمانی گل اد ءَ کار کنگ ءَ گندگ نہ بوگ ءَ اَنت ۔ھمے رنگیں تباھی یے اَتکگ کہ درسیں ادارھانی کار کنگ المی اِنت ۔ آئی ءَ گوشتگ کہ آ بیست ھزار مردمانی ورگ ءِ بندبست کنگ لوٹ اَنت بلے آھاں جاہ دست کپگ ءَ نہ اِنت ۔ آئی ءَ گوشتگ کہ پٹ ءِ سر ءَ کار کنگ نہ بیت پرچا کہ ھور دنیگت بند بوگ ءِ وڑءَ نہ اِنت ۔