طرابلس : نوکیں لیبیا میانرویں اسلام ءِ بنچک ءَ اُستمانی ریاستے بیت

طربلس : لیبیا ءِ ادارکی راج کونسل ءِ سروک مصطفی عبدالجلیل ءَ گوشتگ کہ آ لیبیا ءَ  یک انچیں نوکیں اُستمانی ریاستے جوڑ کنگ لوٹ اَنت کہ آئی ءِ بنیاد میانرویں اسلام ءِ سر ءَ بہ بیت۔ اے ھبر  آَئی ءَ قذافی ءِ سرکار ءِ ھلاس کنگ ءَ پد اولی رند ءَ ھزارھاں مردمانی دیوان ءَ گوں تران ءِ تہ ءَ گوشتگ ۔ دومی نیمگ ءَ کرنل قذافی ءَ ھم یک ٹی وی کلوے تہ ءَ گوشتگ کہ آ داں سوبمندی ءَ جھد ءَ برجاہ دار اِیت بلے دنیگت مالوم نہ بوتگ کہ آ کجا اِنت ۔ ادارکی کونسل ءَ دہ روچ ءِ تہ ءَ ادارکی سرکار ٹھینگ ءِ جار جتگ بلے دنیگت پہ ملک ءِ مھکم کنگ ءَ بازیں جنجال دیم ءَ اِنت اِش ۔ لیبیا ءِ گیشتر بھریاگیاں گیپتگ بلے دنیگت سرت ءُ بنی ولید رنگیں شھر قذافی ءِ منوگرانی دست ءَ اَنت ءُ آ اُود ءَ جنگ بوگ ءَ اِنت ۔ مصطفی عبدالجلیل ءِ تران ءِ گوش دارگ ءَ شھید چوک ءَ ھزارھاں مردم مچ بوتگ آئی ءَ گوشتگ کہ مردم بیرگری مہ کن اَنت ۔ آئی ءَ اے ھم باور کنائینتگ کہ آئی ءِ  بند بست ھچ رنگیں شدت پسندی ءَ سکین نہ دنت ۔