پہ پاکستانی آل پارٹیز ءَ بھرنہ زورگ ءَ بی این پی ءِ مانگیش اِتگیں بیان : پہ آیگ ءَ بالیگ روان نہ داتگ گلگدار اِنت ءُ شھیدانی پرس ئِے داشتگ

شال : چَہ پاکستانی سر کار ءِ نیمگ ءَ دیر ءَ ھال دیگ ، پہ آیگ ءَ بالیگ روان نہ دیگ ءُ واکدارنی وت فون کنگ ءُ لوٹکی نہ دیگ ءِ سر ءَ بلوچستان نیشنل پارٹی ءِ سروک اخترجان ءَ زھر کرتگ ءُ پاکستان ءِ آل پارٹیز کانفرنس ءِ لوٹکی رد کرتگ ۔ اے درگت ءَ بلوچستان نیشنل پارٹی ءِ جارکش ءَ گوں اھوالکاراں گوشتگ کہ سیکریٹری اسٹبلشمنٹ ءَ بیست ءُ ھشت ستمبر نیمروچ ءِ دو بج ءَ پارٹی ءِ سروک اخترجان مینگل فون کرتگ  ءُ پہ آل پارٹیز ءَ بھر زورگ ءِ لوٹکی داتگ کہ آئی ءَ  نہ من اِتگ ۔ جارکش ءِ رد ءَ اختر جان مینگل ءَ اے لوٹکی بے سریں ھبر ءُ پہ بلوچستان ءِ مستریں پارٹی ءَ ملنڈ ءُ پارٹی ءِ ایرجنگ ءَ پروپیگنڈہ باوست نامینتگ ءُ گوشتگ کہ اے ملک ءِ واکدار دنیگت ھم بلوچ راج ءَ ناباور سرپد بنت آھاںی جھد اِیش اِنت کہ بی این پی ءَ اے رنگیں پرارزشیں کانفرنس ءَ دور بہ دار اَنت پمیشکا پیشگی  ھال دیگ نہ بوتگ ۔ گوستگیں شست ءُ چار سال اِنت کہ چنوی پنام مئے کماش ءُ راھشون ءَ دیگ بیت بہ گند ئے من ءَ ءُ منی پارٹی ءِ سرجمیں راھشون ھم ھمے رد ءَ ھوار کنگ بوگ ءَ اَنت ۔ جارکش  ءَ گوشتگ کہ سرکار ءَ بہ گند ئے زانگ بوتگ کہ اخترجان مینگل یا آئی ءِ جھگیر نیم روچ ءِ تہ ءَ ناں رست کن اَنت ناں روگ ءُ آیگ ءِ اے رنگیں آسراتی پاکستان ءَ اَست ۔ بنجاھی کماش اختر جان مینگل اگاں سرکار ءِ لاڈ  ءُ آئی ءَ پکار بوت اِنت گڑا زرداری ءِ بالیگ الم دوبئی یا شال ءَ دیم دیگ بوتگ ءُ واکداراں وت فون کرتگ ءُ لوٹکی داتگ اَت۔ انچوش کہ دگہ سیاسی پارٹی ءَ فون کنگ ءُ لوٹکی دیگ بوتگ ۔ اے بیان کہ یک نیمگےگوں سرکار ءَ گلگدار اِنت کہ آ پرچا وھد ءِ سر ءَ لوٹکی کنگ نہ بوتگ داں وت ءَ پہ کانفرنس ءَ ساڑی بہ کنت دومی نیمگ ءَ وتی روگ ءَ گوں بلوچستان ءِ جاور ءَ ھمگرنچ کنت ۔اے بیان ءِ دومی ءُ چَہ برز ءَ داتگیں گپاں جتا ءُ گستائیں ھبر اے رنگ ءَ گوشگ بوتگ  اَنت کہ پہ آل پارٹیزکانفرنس ءَ بی این پی وتی راج ءِ ھمروچ دز کپوکیں میتانی چست کنگ ءُ پرس دارگ ءَ پیک نہ اِنت مروچی ھزارھاں مردم جولاں جتگ ، سداں سیاسی جھد کار ءُ باسک شھید کنگ بوتگ ءُ آھانی سیاد پرسیگ اَنت ۔ پریس کلبانی دیم ءَ گوستگیں سئے سال اِنت نہ ایوک جنین ، چک ءُ کماش وتی دوستیگیں مردمانی راہ ءَ چارگ ءَ اَنت کہ بیگواہ اںت ڈیرہ بگٹی، کوھلو ءُ بلوچستان ءِ دگہ ھنداں لکھانی بلوچ پہ زور وتی بازار ءُ دمگاں گلینگ بوتگ اَنت کہ سندھ ءُ پنجاپ ءِ سیمسری ھنداں بزگیں زند گوازینگ ءَ اَنت بلے اے درسیں جاور ءُ بلوچ راج ءِ تباھی ءِ سر ءَ سرکار ، سیاسی ءُ مذھبی گل ءِ مردم کر ءُ کور سما بنت ءُ  جبراکیں واکانی لگام دیگ ءَ کانفرنسز ءُ سساترانی دیوان لوٹائینگ بوت اِنت ۔ سرکار ، دینی ءُ سیاسی گل ، اسٹبلشمنٹ ءِ ذھن بلوچستان ءَ دنیگت پاکستان ءِ بھر سرپد نہ بنت ۔ گوں بلوچاں ایوک دپ ءِ سر ءَ ءُ پیش دارگ ءَ ھمدردی کنگ بوگ ءَ اِنت داں آ بے میار کنگ بہ بنت  ۔ اے جاورانی تہ ءَ پرسیگیں ءُ جبر آماچیں بلوچ ءِ راستیں جھگیر چون آل پارٹیز کانفرنس ءِ تہ ءَ بھر زور اَنت ۔ نوں جست اِیش اِنت کہ اے ملک ءَ اے ھال ءَ رسینوک کے اَنت کہ تراک کنیں شورو جوڑ بوتگ اَنت ۔ ملک ءِ کنڈ کنڈ تباھی ءُ بربادی ءِ آماچ اِنت ۔ سرکاری ماڑی ، بزرگانی مزار ءُ دگہ مذھب ءَ گوں سیادی داروکانی جھگیر آھانی نیکراھی جاہ ءُ  دگہ راھبندانی منوک دھشت گردانی نشانگ اَنت ۔ روچ پہ روچ آھانی کشت ءُ کشار گیش بیان اِنت ۔ سرکار سوبمند سما نہ بوگ ءَ اِنت ءُ دری پالیسی پہ مھلوک ءِ سوت ءَ جوڑ کنگ نہ بوگ ءَ اِنت ۔ زمین ءِ پھریزگ ءِ نام ءَ ءُ دگہ ملکاں دستیگ کنگ ءُ کالونی جوڑ کنگ واکدارانی ذھنانی تہ ءَ نشتگ ۔ درسیں بربادی مئے باندات ءَ سرپد نہ بیوکیں ھاکمانی دوتل ءُ دوپوستیانی سبب ءَ اِنت باید ھمیش اَت کہ بنگلہ دیش جوڑ بوگ ءَ پد ایشاں ھوش کرت اِنت بلے گنوک ءُ آمریں پگر داروکیں ھاکم گیشتر تباھی ءِ نزیک ءَ رستگ اَنت ۔ بی این پی ھمے سرپد بیت کہ آل پارٹیز کانفرنس ایوک پیش دارگ ءُ بیھار دیگ  ءِ سبب بیت ۔ لھتیں پاتراپ دیوک ،  شوباز ءُ کوھنیں ھیال داروک وتی ازام ءَ پیش کنت ءُ کانفرنس ءَ بھرزوروکانی بالاد وشنود بیت بلے ھچ رنگیں آسر در نہ اِیت پرچاکہ شوربندوک دگہ واکدار اَنت کہ کسئیگ ءَ ھم گوش نہ دار اَنت ءُ وتی گیشیں لوٹ ءُ ٹکچاری ذھن ءِ رد ءَ شور کن اَنت کہ ملک ءَ تباھی ءِ نزیک ءَ سرکنگ ءِ ذمہ وار اَنت اے جاورانی تہ ءَ بی این پی شھیدانی پرس ءَ پاد آیگ ءُ کانفرنس ءَ بھرزورگ ءَ لاچار اِنت ۔