میان اُستمانی تک ءِ واکدار پہ بلوچانی وتکواھی ءِ سوبمندی ءَ دزمانجنی بہ کن اَنت ' نورالدین مینگل

                نیویارک : بلوچ کماشیں راھشون عطااللہ مینگل ءُ خیر بخش مری ءِ نماسگ نورالدین مینگلءَ گوشتگ کہ پہ دمگ ءِ ایمنی ، دیمروی  ءُ وژھالی ءَ میان اُستمانی تک ءِ مردم گوں اشتاپی ءَ بلوچستان ءِ تہ ءَ دزمانجنی بہ کن اَنت انچوش کہ سوڈان ءُ تیمور ءِ تہ ءَ دزمانجنی کنگ بوتگ ھمے پیم بلوچستان ءَ ھم کنگ بہ بیت داں بلوچ راج وتی وتواکی ءِ حق ءَ کارمرد کرت بہ کنت ۔ اے ھیال آئی ءَ تپاکیں راجانی ادارہ انسانی حقانی کونسل ءِ ھژدمی دیوان ءِ تہ ءَ بلوچستان ءَ چَہ راھبند ءَ دریں دزگیری ، بیگواھی ، انسانی حقانی لگتمالی ءُ ترس ءِ چاگرد ءِ بنگپ ءَ برجمیں دیوان ءَ بلوچ راج ءِ جھگیری کنان ءَ تران کرتگ ءُ گوشتگ کہ بلوچستان ءَ چَہ راھبند ءَ دریں دزگیری ، بیگواھی ءُ بلوچ سیاسی کارکنانی آوار جنگ ءَ پد آھانی میتانی دزکپگ ھمروچگیں کارے جوڑ بوتگ ۔ چَہ جولائی 2010ءَ بہ گر داں انیگ ءَ چَہ دوسد ءَ برز بلوچانی تیر جتگ ءُ دیم شرینتگیں میت دز کپتگ آئی ءَ گوشتگ کہ مردماں پہ زور بیگواہ کنگ  ءُ آھانی دیم شریتگیں میتانی دور دیگ ءِ کار ءِ تہ ءَ پاکستانی فوج ءُ آئی ءِ چیر دستیں ادارہ ھوار اَنت ۔ ملکی ءُ میان اُستمانی تک ءَ انسانی حقانی پانک جنوکیں ادراھانی شنگ بوتگیں روپورٹ ءِ تہ ءَ  ھم پدر کنگ بوتگ کہ بلوچستان ءِ جاور گوں تیزی ءَ ھبراب بوگ ءَ اَنت ۔ بلوچستان  ءِ کماشیں راھشون عطاءاللہ مینگل ءُ خیر بخش مری ءَ ھم باز جاہ ءَ بلوچستان ءِ سنگینیں جاورانی سر ءَ وتی ھیال درشان کرتگ اَنت ۔ بلوچستان ءَ گوں زور پاکستان ءَ ھوار ترینگ ءَ پد گوں بلوچ راج ءَ ناروائی ءُ غلامانی رنگ ءَ کردگار کنگ بوتگ۔ گوستگیں آمر پرویز مشرف ءِ جبر وتی جاہ ءَ بلے گچین بوتگیں لس سرکار ءَ ھم بلوچانی سر ءَ جبر کنگ ءِ گوستگیں درسیں ریکارڈ پروشتگ اَنت۔ بلوچستان ءِ چَہ راھبند ءَ دریں دزگیری ءُ بیگواھی ءِ تہ ءَ سیاسی کارکناں کشگ ءُ دیم شرینتگیں میتانی دور دیگ ءِ کارپد ءُ انسانی حقانی لگتمالی ءُ ھیراب بیوکیں جاورانی پد ءَ گوں میان اُستمانی تک ءِ مردماں دزبنبدی اِنت کہ ھمے پیم ءَ سوڈان ءُ تمیور ءَ دزمانجنی کرتگ ھمے پیم گوں اشتاپی ءَ بلوچستان ءِ تہ ءَ ھم دز مان کنگ بہ بیت پرچاکہ بلوچستان ءِ زمین جاوری ارزش ءِ ھساب ءَ اگاں بلوچستان ءِ تہ ءَ دزمانجنی کنگ نہ بوت گڑا سرجمیں دمگ ءَ ایمنی ، تاھیر ءُ دیمروی ءِ جھانی واب پیلو نہ بیت بلکیں انچیں تاوان رست کنت کہ بِھ پُر کنگ نہ بنت ۔ آئی ءَ گوشتگ کہ چوناھیا پاکستان وت ءَ اسلام ءِ بیرکدار گوش اِیت بلے بلوچ راج ءِ ھلاپ ءَ بربریت ءُ جبر ءَ گوں کار گرگ ءَ اِنت ، آ چَہ گھتر بوگ ءِ بین ءَ گوستگ ۔عید ءِ روچ ءَ ھم بلوچ ورناھانی تیر جتگیں میت دز کپتگ اَنت کہ آ ریاستی شکنجہ جاھاں چَہ انسانیت ءَ دریں ءُ رستریں شکنجہ کنگ ءُ کشگ بوتگ اَنت ۔ آئی ءَ  پاکستانی سرکار سک ایرجتگ ءُ گوشتگ کہ '' آغاز حقوق بلوچستان پیکج '' بے بزانت اِنت پاکستان ءِ سر وزیر گیلانی ءَ ھم بیگواھیں مردمانی درجنگ ءِ زبان داتگ بلے نہ موک اِتگ ۔پاکستان ءُ آئی ءِ ھاکمانی سر ءَ بلوچ راج ءَ  باور نہ کنت ۔پاکستان ءِ ادارہ نوں بلوچ سیاسی کارکناں کشگ ءُ آھانی مڈیاں پلگ ءِ پالیسی ءِ سر ءَ کار کنگ ءَ اَنت ۔ پاکستان نہ لوٹ اِیت کہ آ اُود ءَ وتکواکی ءِ حق ءِ جھد بہ بیت ۔ پاکستانی اسٹبلشمنٹ ءِ جھد اِنت بلوچاں چیردست بہ کنت پمیشکا بلوچ راج ءِ سیاسی ، معاشی ،چاگردی استحصال کنگ ءَ اِنت ءُ آ چکچین کنگ بوگ ءَ اِنت ۔ پاکستان بلوچ راج ءِ سیاسی سنچ ءَ پہ وت  ءَ یک مزنیں ترس ئِے سرپد بیت  ءُ آئی ءَ یک شوربندی یے بنیاد ءَ لتارگ ءَ اِنت ۔ پاکستان ءِ جبرانکیں پالیسی پہ برجمیں ایمنی ءَ ترس اَنت پرچا کہ پاکستان ھمساھگیں ملک اوگانستان  ءَ ھم بے تاھیری ءُ بدایمنی ودی کنگ ءِ جھد کنگ ءَ اِنت ۔دو نیمگی پالیسی داروکیں اے ریاست پہ سرجمیں دمگ ءِ ایمنی ، مھکمی ، تاھیر ءُ وژھالی ءِ جھانی واب ءَ تاوان دنت پمیشکا میان اُستمانی تک ءِ مردم بلوچستان  ءِ تہ ءَ گوں اشتاپی ءَ دزمانجنی  بہ کن اَنت داں بلوچاں وتکواکی ءِ حق بہ رس اِیت ۔