حقانی نیٹورک ءِ ردوم ءِ ذمہ وار امریکہ ءِ جند اِنت ' بی این ایم

شال :بلوچ نیشنل موومنٹ ءِ جارکش ءَ گوشتگ کہ چَہ حقانی نیٹورک ءَ پریشانیں امریکہ ءِ جند آئی ءِ ردوم ءِ ذمہ وار وت اِنت ، دمگ ءِ تہ ءَ بے ایمنی ءُ انتہا پسندی ءِ دیمروی پہ سرجمیں جھان ءَ یک ترسے ۔ امریکہ ءِ پجیگ ءَ توامیں ملکاں پہ ایمنی ءُ تاھیر ءَ انتہا پسندی ءِ رودم دیوکیں ریاست ءَ گوں سیادی سندگ لوٹَ اَنت ۔ آئی ءَ گوشتگ کہ دومی جھانی جنگ ءَ پد یک گورے برٹش ءِ دست ءَ چَہ آئی ءِ نوک آبادی شتگ اَنت ءُ دومی نیمگ ءَ امریکہ ءُ برٹش ءَ پہ وتی ھاکمی ءِ برجاہ دارگ ءَ یک انچیں ریاستے جوڑ کرتگ کہ سامراجی واکدارنی گزرانی پھریزگ ءَ ابید دمگ ءِ بے ایمنی ءِ ذمہ وار اِنت ۔ مذھب ءِ نام ئِے کارمرد کرتگ ءُ پہ سرجمیں دنیا ءَ جنجال ئِے ودی کرتگ ۔ امریکہ ءَ ھما ریاستی فوج گوں وتی فوجی کمک ءَ مھکم ءُ پزور کرتگ آ حقانی نیٹورک ءِ پجیگ ءَ بازیں انتہا پسندیں گلانی رودینگ ءِ ذمہ وار اِنت داں وھدے کہ امریکہ ءِ گزراں پرواہ نہ بیت آئی ءَ وتی چم پہ ایشاں بستگ اَنت ۔ وھدے کہ بلوچ آزادی پسند مدام اے راستیاں پدر کنان اَنت بلے آھانی گپ کس ءَ مان نیاورتگ اَنت بلے انوں اھم امریکہ ءِ بے تاھیری  ایوک روتاکی بیانانی تہ ءَ اَنت اگاں ھمے روش برجاہ بہ بیت گڑا دمگ ءِ تہ ءَ یک انچیں تباھی یے کیت کہ امریکہ ءِ پجیگ ءَ کس ئِے داشت نہ کنت ۔ گھتری ھمیشی ءِ تہ ءَ اِنت کہ زمینی ءُ دپتری راستی چارگ بہ بنت ءُ گوں پاکستان ءَ وتی توامیں سیادی پروشگ بہ بنت داں دمگ ءِ تہ ءَ ایمنی ءُ تاھیر برجاہ بی بیت ۔ بلوچ راج وتی ھچ رنگیں جاورانی پرواہ نہ کنت ءُ وتی جھدءَ  گوں نترسی ءُ ندریگاں برجاہ دار اِیت ، بلے انتہاپسندی ءِ دیمروی سک ترسناک اِنت ۔