نوشکے : سعید بلوچ گوں بی ایس او آزاد ءَ ھمگرنچ نہ اِنت

نوشکے [ پ ر ] : بی ایس او آزاد نوشکے ءِ جارکش ءَ گوشتگ کہ نوشکے ءَ گوں یک ھندو کسان سالیں بچکے ءَ بدکاری کنوک ، بازار ءَ ھندوانی دکانانی سوچوک ءُ مردماں یوتھ فورس ءِ نام ءَ بِیھار دیوک '' سعید بلوچ '' گوں بی ایس او آزاد ءَ ھمگرنچ نہ اِنت ءُ نہ کہ بی ایس او ایشی ءِ کارپدانی مانزمان اِنت ۔ ھندو وتی شورءُ اے درگت ءَ گامگیج زورگ ءَ چَہ مئے نیمگ ءَ آزات اَنت ۔ جارکش ءَ گوشتگ کہ بلوچ سرزمین ءِ سر ءَ یک آزات ، ایمن ، دادرس ءُ برابری ءِ  سر ءَ برجمیں چاگردی ءِ جوڑ ءَ کنگ ءَ کار کنوکیں بلوچ ورنا گیچنی آزادی پسندیں گل ءُ پارٹیانی نیمگ ءَ اے ھبر باور کنائینگ بیت کہ گوں  آھاں بوتگیں نارروائی ءُ جبراں بی ایس او آزاد ءُ دگہ آزادی پسند ایر جن اَنت ۔ توری مذھبی راھشونانی آوار جنگ بہ بیت یا چَہ کاسگ چٹانی نیمگ ءَ بیھار ما ایشاں چَہ انسانیت ءَ دریں راھبند سرپد بئے ءُ ایرجن اِیں ۔ جارکش ءَ گوشتگ کہ ھندوانی ھم اے ذمہ واری جوڑ بیت کہ آ وت ءَ چَہ سامراجی کاسگ چٹی ءَ بے پھریز اَنت ءُ گوں بلوچ سرزمین ءَ وتی ھم بستگیءَ پیش بہ دار اَنت ءُ سامراجی کاسگ چٹانی نام ءَ بہ گوش اَنت کہ وڑ وڑ ءَ چَہ آھاں چانیگ پچ گرگ ءَ اَنت ۔