شال : پہ فلسطین ءِ آجوئی ءَ تپاکیں راجانی گل ءَ دزبندی تاک جوانیں گامگیجے' چَہ بلوچ نیشنل وائس ءِ نیمگ ءَ شھید علی شیر کرد ءِ یات ءَ دیوان ءَ راھشونانی تران

شال :  بلوچ نیشنل وائس ءِ راھشوناں پہ آزاد فلسطینی ریاستءَ تپاکیں راجانی گل ءِ تہ ءَ دزبندی تاک جوانیں گامگیجے نامینتگ ءُ گوں میان اُستمانی تک ءِ مردماں دزبندی کرتگ کہ بلوچ آجوئی زرمبش ءَ ھم پلہ مرزی بہ کن اَنت  ءُ گوشتگ کہ دھشت گردی ءُ انتہا پسندی ءِ ردوم دیوکیں بلوچ دژمنیں ریاست پہ سرجمیں دمگ ءِ ایمنی ءُ تاھیر ءَ تباھی اِنت پمیشکا میان اُستمانی تک گوں سنگینی ءَ ایشی ءِ ھلاپ گامگیج بہ زوراِیت ۔ بلوچ نیشنل وائس ءِ نیمگ ءَ شنگ بوتگیں بیان ءِ رد ءَ علی شیر کرد ایڈوکیٹ ءِ اولی سالروچ ءِ درگت ءَ شال ءَ یک ریفرنسے دارگ بوتگ ۔ ریفرنس ءِ تہ ءَ مزنیں کساسے ءَ ورنا ءُ کماشاں بھر زرتگ ۔ بندات چَہ قرآن ءِ تلاوت ءَ کنگ بوتگ ءُ بلوچ  شھید ءُ جھان ءِ شھیدانی پہ راجانی آزادی ءُ رژناھیں باندات ءَ سرانی ندرکنوکانی یات ءَ دومنٹ گوں بے تواری ءَ گوازینگ بوتگ راھشوناں ں تران کنان ءَ گوشتگ مروچی بلوچ راج ءَ ھما بستار کہ جھان ءَ رستگ بلوچ شھید ، بلوچ سرمچار ، بلوچ زندانی ، ءُ بلوچ راج ءِ راستیں راھشونانی جھدانی برورد اِنت ۔ ھروھدے کہ بلوچ راج ءِ سر ءَ گرانیں وھد اَتکگ گڑا بلوچ ورناھاں گوں نترسی ءُ سرمچاری ءَ وتی سرڈگار ءِ پھریزگ ءَ سر ندر کرتگ ءُ سھردپتر نوشتگ ۔ تران کنوکاں گوشتگ کہ پہ آزادیں فسلطین ءَ تپکایں راجانی گل ءِ تہ ءَ پیش بوتگیں دزبندی تاک یک جوانیں گامگیجے میان اُستمانی تک ءَ بلوچ جھد ھم پلہ مرزی کنگ لوٹ اِیت داں میان اُستمانی راھبندانی ھیال گور کنگ بہ بیت ۔ آھاں گوشتگ کہ میان اُستمانی دھشت گرد ریاست ءِ راستیں دیم نوں دنیا ءِ دیم ءَ پدر بوتگ ۔ بلوچ راج ءِ مدام ھمے  ھبر بوتگ کہ بلوچ دژمن ریاست جھانی دھشت گردانی سرکردگ ریاستی فوج ءُ آئی ءِ ادارہ دھشت گردی ودی کنوکیں مشینری اَنت بلے میان اُستمانی تک ءِ مردماں مدام وتی لوٹ  ءُ گزر دیم ءَ آئورتگ ءُ بلوچ راج ءِ توار ءِ نیمگ ءَ ھچ دلگوش نہ داتگ مروچی بلوچ راج ءِ ھبر گواچن بوتگ ۔ وھد ءُ جاورانی لوٹ ھمیش اِنت کہ امریکہ ءُ آئی ءِ ھمدست اے ریاست ءَ گیشتر یلہ چری ءَ مہ ھل اَنت ءُ پہ جھانی ایمنی ءَ ترسناکیں ریاست ءَ نابود بہ کن ءُ دنیا ءَ ایمنی ءُ تاھیر ءِ بنجاہ جوڑ بہ کن اَنت ۔ تران کنوکاں بلوچ جھد جھانی راھبندانی پد ءَ نامینتگ ءُ گوشتگ کہ بلوچ جھدکار مدام پہ راج پھازی ءُ بلوچ گلزمین ءِ آجوئی ءَ برجمیں جھد ءِ تہ ءَ میان اُستمانی راھبندانی چارگ کرتگ بلے ریاستی فورسزءُ ایجنسیاں پہ بلوچ آجوئی جھد ءِ ایرمادی ءَ ھروڑیں جنگی جرم کرتگ ۔ امریکہ ءُ آئی ءِ ھمدستاں رستگیں توامیں سلاہ ، بم ءُ تراک کنیں مواد ءُ سرجمیں ھاٹیگ پہ بلوچ زرمبش ءِ نزور کنگ ءَ کاربندگ بوگ ءَ اَنت ۔ ریاستی فورسز ءُ ایجنسی یک نیمگے مذھبی انتہا پسندی ءَ ردوم دیگ ءَ اَنت ءُ دومی نیمگ ءَ مذھبی شدت پسندانی ھلاپ ءَ کارروائی ءِ نام ءَ رستگیں کروڑانی ڈالر پہ بلوچ ءِ چکچین کنگ ءَ کارمرد کنگ ءَ اَنت ۔امریکہ ءِ بندبست ءِ نیمگ ءَ پاکستان ءِ راستیں پجار ءِ زانگ ءُ آئی ایس آئی ءَ دھشت گرد نیٹورک نامینگ ءَ بلوچ ءِ کوھنیں ھبر راست بوت ۔ تران کنوکاں گوشتگ کہ ریاستی ایجنسی ، فوج ، پارلیمنٹ ، داد جاہ  ءُ ریستی رسانکدر بلوچ کشی ءِ شورانی تہ ءَ چوش پلپا [ ستون ] ءِ رنگ ءَ یک دومی ءَ کمک کنگ ءَ اَنت ۔ تران کنوکاں گوشتگ کہ پاکستان چیر دستیں بلوچستا ن سرکار ءِ کارندہ رئیسانی پہ وتی اَدارکی واکانی پھریزگ ءَ بلوچ ورناھانی ھون ءَ ریچگ ءَ اَنت ۔اے بلوچ راج ءِ لیکوی ، پگری ، راھبندی ءُ راستیں کارروان ءِ دیم ءَ چِہ رنگ ءَ داشت کن اَنت۔وھدے کہ لکھاں بلوچ وتی توامیں  آسراتیاں ندر کنگ ءَ ساڑی اَنت ، بندیگی ، شکنجہ ، زندان ءِ تہ ءَ کوش ، ریاستی نشانگ کنگ ءُ کشگ ءُ دگہ کارپد بلوچ زرمبش ءِ دیم ءَ ریک ءِ دیوال منت اَنت۔ آئی ءَ گوشتگ کہ بلوچ راج ءُ گیش ورناھاں لوٹ اِیت کہ آ وتی سرپانی تہ ءَ یک جاھی ءُ تپاکی پیداک بہ کن اَنت ءُ پہ بلوچ راج آجوئی ءَ بلوچ سرمچارانی کمک بہ بنت داں بلوچ راج وتی آجوئی ءَ زوت دز بہ گیپت ۔