"ڈینگی هيمرجک فيور" ، ساهدار كُشيں وائرس

آ ھم يک دؤرى بيتگ کہ بازیں وہدے ھر وڑیں نادراهى اِنسان ءِ مَرگ ءِ سوب جوڈ بيتگ اَنت، چوشکہ "سُهرُک، گرِمپُک ءُ مليريا، بلے وهد ءِ همراهى ءَ اِنساناں وتى زِند ءِ رَكّينگ ءِ هاترا وڑ وڑیں دارو ءُ درمان جوڈ كُتگ، اے نادراهيانى گرءُ دار ءِ هاترا وڑ وڑیں توجيل كُتگ، مَرچی اگاں ما بچاریں تا اے نام گِپتیں نادراهيانى علاج سک آساناں، بلے اے اَبرم ءِ وتى زوراكى ئيں كہ اِنسانى زِند همينكہ ديمروئى كنان كنت، آسراتى همينكہ وَدّان كن اَنت، تا نوكيں نوكيں نادراهى ديم ءَ كاينت، "ڈینگی تپ" ءَ هم بازيں وهدے بيت كہ ميان استمانى تِره زانشى زانتكار بيوس كُتگ اَنت، اے نادراهى ءِ يک بيمناكيں قِسمے "ڈینگی هيمرجک فيور" اِنت، كہ ايشى ءِ سوب ءَ ساهدار ءِ بدن ءَ هون باز در كئيت ءُ ساهدار مرگ ءِ هرجان بيت، "ڈینگی هيمرجک فيور" اوّل سرا 1950 ءَ فلپائن ءُ تهائى لينڈاں يک ساهدار كُشيں نادراهى ءِ دروشم ءَ ديم ءَ اَتكگ، كہ ايشى ءِ سوب ءَ هزاراں مَردم مرگ ءِ آماچ بيتگ اَنت، بلے اَنّو لهتے وهديں همے نادراهى ايشيا ءِ بازيں دمگاں بازيں مَردمانى مَرگ ءِ سوب جوڈیں، عالمى تِرهجاهى كارگس "w.h.o " ءِ گوشگ ءِ رِدا دُنيا ءِ پنچ بهرانى تها دو بهر "ڈینگی نادراهى" ءِ زَداياں، ڈینگی نادراهى چار يک دروشميں كِرمک (viruses) آنى سوب ءَ شنگ بيت، سئے وائرس هماهاں کہ چر آهانى كزا يا اگاں اِنسان يک برے رَكّيت تا دوبارا اُرش كُت نہ كن اَنت، بل"ڈینگی هيمرجک فيور" هما قِسميں كہ آ ساهدار ءَ دوباره هم نادراهى ءِ آماچ كنت. بلے گپ اِش اِنت كہ ڈینگی چون شِنگ بيت. ڈینگی وائرس دُرستا ں چہ پیش يک سُنٹو ایں مكسکے کہ آئى ءَ Aedes Aegypti گوشنت، آئى ءِ تها جاه كنت ءُ همے بزّگیں مكسک ءَ نادراهى ءِ آماچ كنت. پدا آئى ءِ وسيلت ءَ دومى ساهدارانى بدن ءِ تها رؤت، پمیشا همے مكسک ءِ گٹّ پاچگ ءَ دومى ساهدار همے ڈینگی نادراهى ءِ آماچ بيت. باز وهد ءَ همے مكسک نادراهيں ساهدار ءِ گٹّ پاچگ ءِ وهد ءَ همے وائرس ءَ زيريت ءُ پدا دومى ساهدار ءِ گٹّ پاچگ وهد ءَ آئى ءِ بدن ءِ تها داخل يے كنت. اے وائرس تاں ھپت روچ ءَ ساهدار ءِ بدن ءِ تها تَرّ ءُ گرد كنت، اے وهد ءَ ساهدار ءَ كم كميں تپ ءِ مارِشت بيت، ءُ چم ، پاد ءُ دستانى بند ءُ بوگ هم كم كم ءَ درد كن اَنت. هون ءِ پنژار ءِ كمى، بدن ءِ سرا سُهريں ٹِکّ ءُ چم ءُ گُٹ ءُ گلوانی سُچگ ڈینگی تپ ءِ مَستريں نِشانى اَنت. دنيگہ "ڈینگی هيمرجک فيور" ءِ گِر ءُ دار ءِ هاترا هچ "ويكسين" ءُ دارو ءُ درمان جوڈ نہ بیتگ، بس چہ سُنٹويں مكسکاں وت ءَ رَكّينگی اِنت.