بلوچستان ءِ دگانی سر ءَ شیطان ءِ تراپولی جنین آدم نشانگ اَنت

شال [ جھگیر ] پجا رگ نہ بوتگیں موٹر سائیکل تاچاں اسکول ءِ اُستاد ءِ دیم ءَ تیزاب پریتکگ ۔ اد ءَ رستگیں ھالانی رد ءَ شال ءِ میتگ کلی عالم خان ءَ چار اسکول جنین آدمیں اُستاد ثریا ، فضیلہ ، فریدہ ءُ ساجدہ چَہ اسکول ءِ موکل ءَ پد وتی گس ءَ روگ ءَ بوتگ اَنت کہ  اسکول ءِ کش ءَ موٹر سائیکلیاں نام گیپتگیں جنین آدمانی دیم ءَ تیزاپ پریتکگ ۔چَہ تیزاپاں آھانی دیم ، بردست ، سینگ ءُ بالاد ءِ دگہ بھر ستکگ اَنت ۔ بلوچستان ءَ چَہ گوستگیں سالاں اے رنگیں کار پد دیم ءَ آیگ ءَ اَنت شال ءَ اے دومی رند اِنت کہ جنین آدمانی دیم ءِ سر ءَ تیزاپ پریچگ بوتگ ءُ ھمے رنگیں کارے بلوچستان ءِ دمگ کلات ءَ ھم کنگ بوتگ ۔ بلوچ سیاسی ءُ چاگردی گلاں اے کارپد گوں ترند ی ءَ ایرجتگ  اَنت آھاںی گوشگ اِنت کہ ایشانی پشت ءَ زور سرکار پاکستان ءِ کاسگ چٹ ءُ پلہ مرزیں مردم ھوار اَنت ۔