پاکستانی فوجیاں ، ھندوستانی فوجی یے دزگیر کُرتگ

 پاکستانی  چناب رینجرز ءَ سیالکوٹ ءِ باجواٹ سیکٹر '' کولیل '' نامیں کوچگے  ءِ نزیک ءَ ھندوستانی باڈر سیکورٹی فورس ءِ کارمندے دزگیر کُرتگ ءُ چیریں جاھے ءَ بُرتگ ءُ گوں آئی ءَ جست پُرس کنگ بوگ ءَ اِنت ۔

ھندوستانی کشمیر ءَ  نیم پَوجی کارمندانی گْوشگ اِنت  کہ باڈر سیکورٹی فورس ءِ پَوجی یے کور ءِ آپ ءَ پاکستان ءَ سیالکوٹ دمگ ءِ نیمگ ءَ بُرتگ ۔

واکمنداں گْوشتگ کہ باڈر سیکورٹی فورس ءِ  رمے اکھنور سیمسری سیکٹر ءِ نزیک ءَ چناب کور ءَ گوں یدار ءَ گشت ءَ اَت کہ آپ ءِ رشت ءِ سبب ءَ یدار بڈ اِت ۔

بی ایس ایف ءِ انسپکٹر جنرل ایس ایس تومار ءَ گوں بی بی سی ءَ گْوشتگ کہ '' ما گوں پاکستانی واکاں گپ جتگ ، ھردوئیں نیمگ ءِ واکمندانی نیام ءَ فلیگ میٹنگ ھم بوتگ ۔ مارا سَدکی دئیگ بوتگ کہ سپاھیگ پہ سلامتی ءَ واتر کنگ بیت  بلئے دنیگت لھتے کار  پیلو کنگی اِنت ۔ ''

تومار ءَ گْوشتگ کہ '' پاکستان ءِ چناب رینجرز ءِ سروکاں گوں ھندوستانی واکمنداں ھما وھد ءَ  تماس گیپتگ ءُ سدکی داتگ کہ آھانی دزگیری ءَ ھندوستانی سپاھیگ ءَ ھچ رنگیں تاوان دئیگ نہ بیت ۔ ''