پاکی میڈیا، آمید گِس، ایف سی ءُ چیریں دست بلوچ راجی جُنز ءِ پروش دیگ ءَ یکدست اَنت، واجہ خیر بیار مری

بام:  بلوچ رھشون خیر بیار مری ءَ گُشتگ کہ ماں بلوچستان ءَ ‘‘سوریہ‘‘ ءَ چہ  گیش  انسانی  حقانی لگتمالی بیئگ اِنت۔  ماں مچھ ءُ مارواڑ ءَ بلوچ زھگ ءُ زالبولانی سرا پاکی لشکر ءِ گوں ھیلی کاپٹراں بمب گواری میان استمانی رھبندانی ھلاپ ورزی اِنت۔  آئی ءَ گُشتگ بلوچ جیڑہ ءِ سرا جھانی  تاگتانی خاموشی ماں بلوچستان ءَ پاکی لشکر ءِ زُلم ءُ زوراکی ءُ بلوچ چُک چینی ءِ عملاں بے لگام کنگ اِنت۔۔

آئی ءَ گُشتگ اے اولی رند نہ اِنت۔ بلکیں نوزدہ صد ءُ ھپتاد ءِ دھک ءَ ھم پاکی زورگریں لشکر ءَ وتی قبضہ ءِ گیش پرجاہ دارگ ءَ بلوچ راج ءِ ھلاپ ءَ جنگی گراب کارمرز کُتگ۔ اگاں پاکستان ھمے سرپد بیت کہ آ بلوچ راجی جُنز ءَ گوں تاگت ءَ ایرموش کنت تہ  رد کپگ اِنت۔۔

آئی ءَ بلوچ کواس بانک نوشین کمبرانی ءِ گس ءِ سرا پاکی لشکر ءِ اُرش  ایر جنان ءَ گُشتگ کہ اے سرجمیں کرداں ایف۔سی ءُ پاکی چیریں دست پاکی آمیدگس ءِ اے حکم ءِ پدا کنگ ءَ اَنت کہ ‘‘بلوچستان ءَ ھر وڑا ایمنی آرگ لوٹیت‘‘۔۔ نوابزادہ خیربیار ءَ گُشتگ ماں بلوچستان ءَ بلوچ چُک چینی ءِ عمل ءُ بلوچ راجی جُنز ءِ پروش دیگ ءِ کارا پاکی میڈیا، پاکی آمیدگس ، ایف، سی ءُ پاکی چیریں ایجنسی یک دست ءُ ھمشور اَنت۔