واشنگٹن:امریکہ ءَ ایران ءِ سر ءَ دگہ مالی پابندی جتگ

واشنگٹن : امریکہ ءَ ایران ءِ سر ءَ نوکیں پابندی جتگ ۔ امریکہ ءِ خزانہ ءِ وزارت ءِ رِد ءَ بازیں انچیں شرکت بلیک لسٹ کنگ بوتگ کہ آھانی بارو ءَ منگ بیت کہ ایران ءَ جوھری سلاہ جوڑ کنگ ءَ کمک  اَنت ۔ امریکی خزانہ ءِ وزارت ءِ گْوشگ اِنت کہ بازیں شرکت ءُ  انچیں بینک نشون دیگ بوتگ کہ ایران ءَ کمک کنگ ءَ اَنت داں چَہ جتگیں پابندیاں وتا پھازاِت بہ کنت ۔ امریکی خزانہ ءِ وزارت ءِ کارمند ڈیوڈ کوھن ءِ گْوشگ اِنت داں ایران وتی جوھری برنامہ ءِ درگت ءَ میان اُستمان ءِ بے تاھیریاں دور نہ کنت ایران ءِ سر ءَ یکشل ءَ زور پردیان کن اِیں ۔ امریکہ ءِ خزانہ ءِ وزارت ءِ نیمگ ءَ شنگ بوتگیں بیان ءَ نوشتگ کہ ایران ءِ سر ءَ نوکیں باپاری پابندیانی تہ ءَ آ شرکت ھم ھوار کنگ بوتگ اَنت کہ گوں ایران  ءِ پھازکاری وزارت ، آشوب پھازیں سپاہ[ سپاہ تحفظ انقلاب] ءُ آھانی راجی منورتاچیں شرکت [ نیشنل شپنگ لائن ] ھمبستگ اَنت۔ بیان ءِ رِد ءَ امریکہ ءِ خزانہ وزارت ءَ چار انچیں مردم درجتگ کہ آھانی درگت ءَ گْوشگ بیت کہ ایران ءِ جوھری برنامہ ءَ کمک کنگ ءَ اَنت ۔ چَہ ایشاں یکے ایران ءِ آشوب پھازیں سپاہ ءِ کمانڈر علی فداوی اِنت۔