بغداد : سوریہ ءِ سفیر نواف فارس بجگ ءَ پد گوں یاگیاں ھوار بوتگ

بغداد : عراق ءَ سوریہ [ شام] ءِ سفیر نواف فارس ءَ چَہ سوریائی سرکار ءَ بجگ ءَ پد گوں سرکار ءَ نہ سیلیں واکاں ھوار بوگ ءِ جار جتگ ۔ دومی نیمگ ءَ شامی صدر بشار الاسد ءِ نہ منوگریں روکپتی ملکاں یواین ءِ سلامتی کونسل ءَ یک منگ نامگے  بھر کنگ بنا کرتگ ۔ آئی ءِ تہ ءَ لوٹ کنگ بیت کہ سوریائی صدر ءَ پہ کشت ءُ کشار ءِ دارگ ءَ دہ روچ ءِ موہ دیگ بہ بیت اگاں دھیں روچانی تہ ءَ سوریائی صدر ءَ وتی دست نہ داشت اَنت گڑا سوریہ ءِ سر ءَ ترندگیریں پابندی جنگ بہ بیت ۔ نواف فارس سوریہ ءِ اولی مستریں سفارتکار اِنت کہ چَہ بشار الاسد ءِ سرکار ءِ  گستا  بوتگ ۔ شام ءَ گْوستگیں چندیں ماھانی تہ ءَ بشار الاسد ءِ بازیں ھمراھاں آ یلہ داتگ ۔ گْوستگیں ھپتگ ءَ شام ءِ یک واکمند ءُ الاسد ءِ نزیک گمان کنگ بیوکیں کھولے ءِ فوجی جنرلے ھم چَر آئی ءَ بج اِتگ ۔ بازیں فوجی افسر چد ءُ پیش ھم بَج اِتگ ءُ ملک اِش یلو داتگ ءُ ماں ترکی ءَ شتگ اَنت ۔ سوریائی سفیر ءَ سرکار ءِ ھمراھی یلو کنگ ءِ جار الجزیرہ ٹی وی ءَ داتگیں بیانے ءَ پرینتگ ۔ سوریائی یاگیانی بیرک ءِ چیر ءَ نواف فارس ءَ وتی بیان ونتگ آئی ءَ گْوشتگ کہ من براتیں ملک عراق ءَ عرب جمہوریہ سوریہ ءِ سفیر ءِ بستار وتی دزکشی ءِ  جار ءَ جن آں ۔'' آ چَہ بشار ءِ  بعث پارٹی ءَ ھم دزکش بوتگ ۔ وتی بیان ءِ تہ ءَ نواف ءَ سوریہ ءِ جاوریک زوراکیں سرکارے ءِ کشندھاں بیمناکیں کارپد ڈس اِتگ آئی ءَ اے ھم گْوشتگ کہ سوریہ ءِ تہ ءَ راست ءُ  تچکیں گھتری آرگ ءِ اُوست پشت نہ کپتگ ۔ نواف فارس دوھزار ھشت ءَ عراق ءِ سفیر جوڑ کنگ  بوتگ ءُ آ چَہ سئے دھکاں  پد عراق ءَ روکیں اولی سوریائی سفیر اِنت چَہ سفیر کنگ ءَ پیش آ بازیں اُستاناں اُساندار ھم بوتگ ۔ ٹپاسکار نواف فارس ءِ بجگ ءَ اَرزش دیگ ءَ اَنت نواف سوریہ ءُ عراق ءِ سیمسراں جاھمندیں سنی ٹک اقیدت ءِ ھم سروک اِنت ۔ چَہ ایشی ءَ سوریہ ءِ تہ ءَ سنی ءُ شیعھیانی واکداری ءِ سر ءَ شور کپتگیں جنگ دو مذھبی ٹکانی نیام ءَ جنگ ءِ ھساب ءَ ھم دیم ءَ روت کنت ۔ چَہ پشار سرکار ءَ یک پہ یک سنی واکدار ءُ کارمنندانی گستا بوگ پہ سوریہ ءَ وت ما وتی جنگ ءِ یک نوکیں دْرچے بوت کنت کہ آئی ءِ اسرمندی داں بازیں پدریچ ءَ منت اَنت ۔