بام ھال

آزیان ءَ پاکی رستریں لشکر ءِ سرا اُرش بیتگ۔

2012-03-13T13:04:00.001+04:00

تمپ: ھالانی ردا تمپ ءِ دمگ آزیان ءَ پاکی ایف۔ سی یے سرا اُرش بیتگ۔بازیں کارندھانی مرگ ءِ گمان اِنت۔

راجی وتواکی ءَ ابئید دگہ ھچ رھبند ءِ سرا گپ ءُ تران نہ بیت۔براھمدگ بگٹی

2012-03-13T00:38:00.003+04:00

سوئٹزرلینڈ: بلوچ رھشون ، بی آر پی ءِ سربراہ نواب براھمدگ بگٹی ءَ رسانکدر ءَ تران کنان ءَ گُشتگ کہ گوں پاکستان ءَ بس راجی آجوئی یے رھبند ءِ سرا گپ ءُ تران بیت کنت۔ ایشی ءَ ابئید دگہ ھچ وڑیں رھبندانی سرا گپ ءُ تران بیت نہ کنت۔ چیاکہ پاکی استان ءَ مئے گُلزمین ءِ سرا پہ زور قبضہ کُتگ ءُ بلوچ راج غلام داشتگ ءُ پہ بے دردی بلوچ مات ءُ گھار، زھگ ءُ زالبول ءُ ورناہ ءُ کماشانی قتل عام ءَ کنگ اِنت۔ پاکی استان ماں ایردستیں بلوچستان ءَ ھما زلم ءُ زوراکی ءَ کنگ اِنت کہ آئی ءَ وتی قبضہ گیری یے برجم دارگ ءَ ماں بنگلادیش ءَ کُتگ۔ آئی ءَ گُشتگ گوستگیں روچاں پاکی چیریں دستاں منی گُھار ءُ گھارزتکاں ھوار دگہ بازیں بلوچ مات ءُ گھار شھید کُتگ اَنت۔ آئی ءَ گُشتگ شیطان (رحمان) ملک ءِ اے گپ سیاھیں دروگے کہ ماں افغانستان ءَ بلوچ یاگیانی بُنجل بیتگ اَنت کہ پاکی استان ءِ گُشگ ءِ سرا ھلاس کنگ بیتگ اَنت۔ آئی ءَ گُشتگ کہ ماں افغانستان ءَ ھما بگٹی آنی گِس اَنت کہ دنیگہ است اَنت کہ آ پاکی استان ءِ زلم ءُ زوراکی ءِ سوب ءَ درانڈیھ بیتگ اَنت۔

آئی ءَ گُشتگ کہ پاکی استان ءِ اے بھتام کہ ھندوستان بلوچ راجی جھد ءَ کمک کنگ اِنت وتگڑیں دروگے ، اگاں مار ھندوستان ءَ کمک بہ کُتیں تہ ما مرچی ءَ چہ پیش آجو بیتگ اِتیں۔ آئی ءَ ماں امریکی کانگریس ءَ بلوچ وتواکی یے سرا پیش بیتگیں منگ نامہ وش اَتک کنان ءَ عالمی انسان دوستیں مھلوک، انسانی حقانی گلاں چہ لوٹ کُتگ کہ آ ماں ایردستیں بلوچستان ءَ پاکی استان ءِ زلم ءُ زوراکی، بلوچ زھگ ءُ زالبول ءُ کماش ءُ ورناھانی آوار جنی ءُ کُشت ءُ کوش ءُ بلوچستان ءَ پاکی قبضہ گیری یے ھلاپ ءَ توار چست بہ کن اَنت، او انسانی حقانی پاسداری ءَ بہ کن اَنت او ماں بلوچستان ءَ پاکی لشکر ءِ ارشانی ھلاپ ءَ مداخلت بہ کن اَنت۔۔

یو۔این۔او ءُ انسانی حقانی گل بلوچ چُک چینی ءُ ماں بلوچستان ءَ پاکی زُلم ءُ زوراکی ءِ سرا توار چست بہ کن اَنت۔ وائس فار بلوچ میسنگ فرسنز

2012-03-12T00:03:00.000+04:00

کراچی: مرچی پاکی ایردستیں بلوچستان ءِ شھر کراچی ءَ ” وائس فار بلوچ میسنگ فرسنز” ءِ نیمگ ءَ ماں بلوچستان ءَ پاکی زلم ءُ زوراکی ، بلوچ زھگ ءُ زالبول ، کماش ءُ ورناھانی آوار جنی ءُ ٹارچر کنگ ءُ شھید کنگ ءُ پدا آھانی ٹپ ءُ ٹوریں لاشانی ماں ویرانگاں دور دیگ ءِ ھلاپ ءَ زھر شانی کنگ بیتگ۔ زھرشانی ءَ مزنیں کچے ءَ بلوچ زھگ ءُ زالبول ءُ مات ءُ گُھاراں ھم بھر زُرتگ۔گار ءُ بیگواہ ءُ پاکی استان ءِ رستریں لشکر ءِ دست ءَ شھید بیتگیں ورناہ ءُ نودربرانی سیاد ءُ وارث ءُ راجکار ءُ وائس فار بلوچ میسنگ فرسنز ءِ کارندھاں رسانکدر ءَ تران کنان ءَ گُشتگ کہ ماں پاکی ایردستیں بلوچستان ءَ پاکی لشکر ءِ ارش ، ورناھ ءُ زھگ ءُ زالبولانی آوار جنی گوں بدیں رنگے ءَ برجاہ اِنت۔ آھاں گُشتگ بلوچ راج ءِ بھیسہ چہ پاکی استان ءِ ادارھانی سرا پرشتگ۔ بلوچ راج وتی آجوئی ءِ جنگ ءَ کنگ اِنت۔ آھاں گوں میان استمانی گل یو۔این۔او ءُ دگہ انسان دوستیں گلاں چہ دزبندی کُتگ کہ آ ماں پاکی ایردستیں بلوچستان ءَ بلوچ چُک چینی۔ بلوچ راج ءِ سرا زلم ءُ زوراکی ءُ ماں بلوچستان ءَ پاکی رستریں لشکر ءِ نیمگ ءَ انسانی حقانی ھلاپ ورزی ءِ سرا توار چست بہ کن اَنت۔۔

ڈیرہ بُگٹی ءِ دمگءَ بلوچانی لاش کپگ ءَ اَنت ۔۔ سبزل بُگٹی ءِ لاش دست کپتگ

2012-03-11T21:55:00.003+04:00

بام ھال ( ڈیرہ بُگٹی) ھالانی ردا مرچی 12 روچ اِنت کہ ڈیرہ بُگٹی ءِ دمگءَ پاکستانی فوجے ءِ زیادتی برجاہ اِنت ،سدانی حسابءَ بلوچ بیگواہ کنگ بوتگ اَنت اشانی تہا جنین ءُ کسانیں چُک ھم ھوار اَنت ، بازیں لوگ بمباری کنگ بوتگ اَنت ، بی آر پی ءِجارچین واجہ شیر محمد بُگٹی ءِ گُشگ اِنت کہ فوجی چیک پوسٹے نزیکءَ بازیں بیگواہ بوتگیں بلوچانی لاش کپتگ اَنت ، کہ فوج لاشانی کرّا رؤگ ءَ نیلیت ۔ مرچی ھم ڈیرہ بُگٹی ءَ سبزل ولد ھگداد بُگٹی ءِ چُپت ءُ چوپیں لاش دست کپتگ بائد اِنت ، ھمک روچ ءُ شپ ڈیرہ بُگٹی ءَ بلوچانی لوگانی سرا بمباری کنگ بؤگ ءَ اَنت او بلوچاں بیگواہ کنگءَ اَنت

بلوچ راجی گلانی بازیں ردیاں چہ بلوچ جُھد ءَ تاوان رسگ اِنت۔ رالف پیٹرس

2012-03-11T00:28:00.001+04:00

بام: امریکی تھینک ٹینک، ندکار ءُ زانتکار واجہ ”رالف پیٹرس” ءَ بلوچ راجی جھد ءِ سوب مندی ءُ ناسوبے ءِ سرا لھتے ڈسانی نشوندھی کُتگ کہ اے تاں چنکہ پہ راجی جھد ءَ سیت مند اَنت یا چنکہ تاوان باراں، آئی ءِ ڈس اِتگیں نُقطھانی ردا یک ٹوھیں ردی یے کہ بلوچ راجی جنز ءَ تاوان بار کنگ اِنت آ بلوچ راجی جنز ءَ میانی لیڈرے ءِ نہ بوئگ اِنت کہ بلوچ ءِ سرجمیں ٹکاں ھوار بہ گیجیت ءُ آ میان استمانی سیاست ءِ تک ءُ پیچاں پوہ بہ بیت ، بلوچ سیاست ءَ گوں عالمی لوٹانی پدا ھمگرنچ کنگ ءُ او بلوچ راجی آجوئی ءِ لوٹ ءَ گوں میان استمانی سیادیانی درچ ءَ بیاریت۔ پیٹرس ءِ ردا دومی ردی بلوچ سیاسی گلانی یکے گوں دومی ءَ بے ستکی ءُ برداشت نہ کنگ، اختلافانی سرا یکے دومی ءَ دُشمن گُشگ، ترندیں لیکہ کہ من گُشتگ آ راست اِنت دومی ءَ گُشتگ راست نہ اِنت۔ او رھگیر ءُ بے گناہ ءُ اسکول ٹیچراں پہ ھمے گپ ءِ سرا کُشگ کہ آ دُشمن قوم ءَ چہ سیادی دار اَنت، ھمے کرداں کہ بلوچ راجی جُھد ءَ ماں میان استمانی تکاں تاوان بار کنگ ءَ اَنت۔ پیٹرس ءِ ردا بلوچ راجی رھشون گوں تپاکی ءُ یکمُشتی ءَ اے سرجمیں گپانی سرا اگاں چار ءُ تپاس مہ کن اَنت تا بلوچ راجی جنز ءِ آسر ھما بیت کہ تامل ٹائیگرانی بیتگ۔ پیٹرس گوں ھما امریکی زانتکاراں ھوار اِنت کہ آھاں بلوچ راجی وتواکی ءِ ھاترا ماں امریکی کانگریس ءَ پیش بیتگیں منگ نامہ ءِ پلہ مرزی کُتگ۔

کیس ءُ مقدمہ آنی درکنگ بلوچ جیڑہ ءِ گیشوار نہ اَنت، ورناہ آجوئی ءِ ھاترا مرگ ءَ گورامباز کنگ ءَ اَنت۔ براھمدگ بگٹی

2012-03-10T12:55:00.003+04:00

بام: بلوچ راجی رھشون واجه براھمدگ بگٹی ءَ گُشتگ ماں ڈیرہ بگٹی ءُ دومی دمگاں پاکی زلم ءُ زوراکی ءُ زھگ ءُ زالبولانی آوار جنی ءُ فوجی آپریشن یک شلا برجاہ اِنت۔ پاکی استان وتی رستری کردانی چیردیگ ءَ ماں ڈیرہ بگٹی ءَ ھالکار ءُ میان استمانی گلاں تر ءُ تاب ءَ نئیلگ اِنت۔ پاکی استان ءِ رستری لشککر بلوچ سرمچارانی ترندیں اُرشاں ھمینکہ بے وس کُتگ کہ نو آ وتی زھراں زھگ ءُ زالبولانی سرا درشان کنگ اِنت۔ آئی ءَ گُشتگ پاکی لشکر ءُ آئی ءِ کاسگ چٹ ھمے گپ ءَ جنگ ءَ اَنت کہ بلوچستان ءَ آپریشن بیئگ ءَ نہ اِنت تانکہ آ دُنیا ءِ چماں بند بہ کناں، آئی ءَ گوں میان استمانی انسان دوستیں مھلوک ءُ تاگتاں دزبندی کُتگ کہ بلوچ چُک چینی یے ھلاپ ءَ توار چِست بہ کن اَنت ءُ ماں بلوچستان ءَ پاکی زُلم ءُ زوراکی یے سرا مداخلت بہ کناں۔۔۔

آئی ءَ گُشتگ ماں امریکی کانگریس ءَ بلوچ ءِ وتواکی ءِ ھاترا پیش بیتگیں مسام باز جوانیں گامگیجی، بلے بلوچ ورناھاں ھم لوٹ اَیت کہ گوں تیزی ءَ راجی جُھد ءَ تیز بہ کناں، مرچی کہ ماں میان استمانی تکاں کہ بلوچ آجوئی ءِ حق ءَ توارے چِست بیئگ اِنت ما ھمے سرپد بئیں کہ اے ھما شھید بیتگیں ورناھانی قربانی یے آسر اِنت کہ آھاں پہ ماتیں ڈیھ ءَ وتی گھگیریں سر ندر کُتگ اَنت۔
آئی ءَ گُشتگ ما ”چارٹر آف بلوچستان” سرا چار ءُ تپاس کنگ ءَ اِنت۔ دُرھیں آجوئی ءِ جُھد کاریں سنگتاں مئے گپ ءُ ھال بیئگ ءَ اَنت۔ بلے مرچیگیں جاور مارا ھمے شون ءَ دیگ ءَ اَنت کہ ”بلوچ سنگل پارٹی” ءِ جوڑ کنگ المی اِنت۔ بلوچ راج ءَ گوں یکمشتی ءَ راجی جُھد دیم ءَ برگی اِنت۔ بلوچستان ءِ جاورھالانی سوب ءَ پارٹی بنکی جوڑشت ءِ ھاترا باز جنجال دیم ءَ اَتکگ اَنت۔ بلے مئے گپ ءُ تران بیئگ اِنت۔ زوت نوکیں ”پارٹی اسٹرکچر” ءِ جار جنگ بیت، مھکم ءُ منظمیں دروشمے دیگ بیت۔۔

بی۔ایل۔اے ءَ گوں سیادی دارگ ءِ بُھتام وتگڑیناں، امریکہ

2012-03-10T01:21:00.002+04:00

بام: ماں اسلام آباد ءَ امریکی سفارت ءِ نیمگ ءَ مرچی ھمے گپ شنگ کنگ بیتگ، کہ پاکستان ءَ امریکا ءُ بلوچ سلاہ بندیں گل بی۔ایل۔اے ءِ میان ءَ سیادیانی دروگ ءُ وتگڑیں بُھتام بستگ۔ پاکستان ءِ اے گپاں ھچ وڑیں راستی نیست۔ مئے گوں بی۔ایل۔اے ءِ گُما ھچ سیادی ءُ ھال ءُ احوال نیست۔ باز وھدیں کہ پاکی استان راستیانی چیر دیگ ءِ واستہ دومی مُلکانی سرا بُھتام بندیت۔ پاکستان ءَ انڈیا ءُ امریکا ءُ اسرائیل ءِ سرا بازیں بُھتام جتگ کہ بلوچ راجی جُھد ءَ کمک کنگ ءَ اَنت، وھدیکہ بلوچ رھشوناں اے گپ رد کُتگ اَنت۔ او انڈیا اے استان ءِ بھتامانی پسہ ءَ حاموش اِنت ، آئی ءِ گوش ءَ مورے ھم نہ وارت۔ گُشنت مکسک نہ کشیت بلے دل ءَ بد کنت، پاکی استان ءِ مثال ھمیش اِنت

ماں ڈیرہ بگٹی ءَ پاکی رستریں لشکر ءِ اُرش یکشلا برجاہ اِنت۔بانک راحیلہ بگٹی

2012-03-09T19:11:00.003+04:00

بام: بی۔آر۔ایس۔او ءِ ”گھارانی ونگ” ءِ باسک بانک راحیلہ بگٹی ءِ گُشگ ءِ ردا پاکی استان ءِ ایردستیں بلوچستان ءِ دمگ ڈیرہ بگٹی بلوچ مھلوک ءِ سرا فوجی اُرش یک شلا برجاہ اِنت۔ بازیں کماش ءُ ورناہ ، زھگ ءُ زالبول شھید ءُ آوار جنگ ءُ بیگواہ کنگ بیتگ اَنت۔ پاکی استان ءِ ناپاکیں لشکر ءَ گوستگیں شپ ءَ ڈیرہ بگٹی ءِ دمگ سنگسیلہ ءَ بلوچ گِسانی سرا ارش کُتگ ، چر ایشی چہ بازیں زھگ ءُ زالبول شھید بیتگ اَنت۔۔۔۔۔

آئی ءِ ردا مرزا وزیر کہ آ گوں وتی زھگ ءُ زالبولاں کوئٹہ نادراھجاہ ءَ علاج ءِ ھاترا شُتگ، تا پاکی رستریں لشکر ءَ گوں زھگ ءُ زالبولاں ھوار آوار جتگ ءُ بیگواہ کُتگ۔ آئی ءَ گُشتگ پاکی لشکر ءَ سنگسیلہ ءَ گوں لوڈ اسپیکراں ھمے جار جتگ کہ بگٹی ٹک ناشرکاراں پمیشا آھاں زندگ بیئگ ءِ حق نیست،،،،

آئی ءَ گُشتگ سبزل بگٹی کہ ایف سی ءَ گوستگیں ھپتگ ءَ شھید کُتگ اَت ۔ایف۔ سی ءِ رستر آئی ءِ میت ءَ دیگ ءَ نہ اَنت۔ او سئے روچ پیش پاکی ناپاکیں لشکر ءَ سئے بلوچ زالبول آوار جتگ ءُ بیگواہ کُتگ۔ آئی ءَ میان استمانی انسانی حقانی گلاں دزبندی کُتگ کہ آ بلوچ چُک چینی ءُ بلوچ زھگ ءُ زالبولانی آوار جنی یے ھلاپ ءَ توار چِست بہ کن اَنت۔۔

بلوچ زھگ ءُ زالبولانی آوارجنی ءُ کوش ءِ ھلاپ ءَ میان استمانی رسانکدر ءُ انسانی حقانی گل توار چست بہ کن اَنت۔ بانک شمع بگٹی

2012-03-09T16:49:00.004+04:00

بی۔آر۔پی ”زالبول ونگ ” ءِ گُھار شمع بگٹی ءَ گُشتگ دُنیا مرچی زالبولانی روچ ءَ دارگ اِنت۔ بلے دومی نیمگ ءَ بازیں بلوچ مات ءُ گُھار، زھگ ءُ زالبول ماں پاکی رستریں لشکر ءِ ٹارچر سیلانی تھا وڑ وڑیں ٹارچر کنگ بیئگ ءَ اَنت۔ آھانی شرپ لگتمال کنگ بیتگ۔ بانک زرینہ مری کہ 2005 ءَ گوں زھگے ءَ ھوار پاکی لشکر ءَ آوار جتگ، آ کراچی ءِ رستریں فوجی بُنجلانی تھا وڑ وڑیں ٹارچر دیگ بیتگ ءُ آئی ءِ ننگ ءُ شرپ لگتمال کنگ بیتگ۔ تاں مرچی آ زانگ نہ بیت کہ کُجا اِنت ءُ چونیں اذیتاں گوں دوچار اِنت۔۔۔

بانک حنیفہ بگٹی کہ 2009 ءَ ماں کوئٹہ ءَ پاکی چیریں دست آئی۔ایس۔آئی ءِ کارندھاں آوار جتگ۔ زانگ نہ بیت کہ آ کُجا اِنت ءُ چونیں مصیبتاں گوں دوچار اِنت۔ دگہ سئے بلوچ زالبول کہ پٹ فیڈر ءِ دمگ آر ڈی 238 ءَ پاکی رستریں لشکر ءَ فوجی ارش ءِ وھد ءَ 6 مارچ 2012 ءَ آوار جتگ اَنت کہ آھانی نام چوش اَنت۔ جھانجری لاشار بگٹی، صبا ولد حاجی خان محمد بگٹی ءُ پتولی جمعہ خان بگٹی۔۔۔۔۔۔

آئی ءَ چہ میان استمانی رسانکدر ، انسانی حقانی گلاں دزبندی کُتگ کہ آ اے پاکی استان ءِ زلم ءُ زوراکی ءُ انسانیت کُشیں کردانی ھلاپ ءَ توار چست بہ کن اَنت۔ ماں ایردستیں بلوچستان ءَ پاکی زلم ءُ زوراکی ءِ بابت ءَ دٰنیا ءَ سرپدی بِدینت۔۔۔

مند ءَ پنچ سرکاری چاروگ کُشتگ۔دودا بلوچ

2012-03-09T01:20:00.004+04:00

بام(بی،یو،سی) بلوچ سلاہ بندیں گل بی۔ایل۔ایف ءِ جارکش دودا بلوچ ءَ ناشناسیں ھندی ءَ فون جنان ءَ گُشتگ کہ مئے سرمچاراں ماں مند ءِ دمگ بُلو ءَ تیر گواری کُتگ ءُ پنچ مردم کُتگ ءُ دگہ دو کس ٹپی بیتگ کہ اے مردم بلوچ دُشمن کرداں گوں ھوار بیتگ اَنت، آئی ءَ گشتگ پنجگور ءَ مئے سرمچاراں ایف۔سی بُنجل ءِ سرا اُرش کُتگ، وھدیکہ ماں مستونگ ءَ ھم یک سرکاری مخبری جنگ بوتگ، اے سرجمیں وئیلانی ذمہ واری ءَ ما وتی سرا زیریں۔۔۔

ڈیرہ بُگٹی ءَ پاکستانی کانوائی ءِ سرا اُرش بوتگ 8 مُرتگ ۔۔ گیس نمبر 15 ھم ترا کینگ بوتگ

2012-03-08T21:08:00.002+04:00

بام ھال ( ڈیرہ بُگٹی) مرچی ڈیرہ بُگٹی ءِ دمگ پیر کوہءَ بلوچ سرمچاراں پاکستانی فوجے یک کاروانے ءِ سرااُرش کُتگ بلوچ سرمچارانی آجوئی ءِ نامئیں گل ( بی آر اے ) جارچینءَ گُشتگ چہ اے اُرش پاکستانی فوجے و گاڑی تباہ بوتگ ءُ 8 فوجی مُرتگ بازینے ٹپّی اِنت ، اے اُرش ءِ ذمہ ءَ مئے گل بی آر اے زوریت ۔ ( ڈیرہ بُگٹی ) دومی ھال اِنت کہ ڈیرہ بُگٹی ءَ پیر کوہءَ گیس نمبر 15 بی آر اے سرمچاراں تباہ کُتگ گیس ءِ سپلائی بند بوتگ اے واقعہ ءِ ذمہ ھم بی آر اے ءَ زُرتگ ،

شھید یاسر جان ءِ اولی سالروچ،

2012-03-08T12:10:00.001+04:00

بام: مرچی بلوچ نوگلیں شھید یاسر جان ءِ اولی سالروچ اِنت۔ یاسر جان یک بلوچ نودربر ءُ ورناھیں شاعرے اَت ھم، بلے آ ڈیھ ءِ ایردستی ءُ راج ءِ بزگی ءُ درتہ پُچی یے رنجاں یک انچیں ”سنج نکشیں” راھبندے ءِ راھی کُت کہ عکسانی چیدگ جوڑ بوت۔ نو ھمے رھبند اِنت کہ ھمک بلوچ ورناہ وشیں بانداتے یے اُمیت ءَ شکّلیں ھونانی وشبوآں زریت۔

شھید یاسر جان ءَ پہ وت ھمے راہ گچین کُت۔ بلے آئی ءَ نہ زانت کہ منی ھمرازیں سنگت ھم دُژمنی پندلانی دام ءَ کپیت ءُ باجو جوڑ بیت ءُ رازاں دُژمن ءَ سر کنت۔ بلے اے نوکیں کسّہ نہ اَنت۔ اے باجوئی کار ءُ کارست ھر دؤر ءُ ھر زمانگ ءَ بلوچ راجدپتر ءَ گوں بدیں کار ءُ کرداں است بیتگ اَنت۔ ھمے باجوئی کارست اَنت پہ برات ءِ کوش ءَ گوں عھد ءِ دُژمن ءَ ھوار کپتگ اَنت ءُ شگانی اَنت۔ بلوچ ءِ جوریں شگان چو کارچ ءَ ھر دور ءُ ھر زمانگ ءَ آھانی دلاں مِک بنت ، پمیشا بیدار گُشیت۔

           آ کہ دروہ اَنتیں ماں راہ ءِ نیم ءَ
            چو "بروٹس" ءُ "باجو" ءِ پئیم ءَ
             زاناں کہ ھمراہ نہ اَنت دوستیں

ما چہ بام ھال ءِ نیمگ ءَ بلوچ نوگلیں شھید یاسر جان ءَ ھزار سلام گُشیں کہ آئی ءَ ورناھی ءِ بھاریں روچان پہ ھمے بزگیں راج ءِ وشیں باندات ءِ باندات ءِ ھاترا وتی گھگیریں سر ندر کُت ءُ نمیران بوت۔ ما دومى نيمگ ءَ همے باجوئی کرد ءُ کارستاں ھمینکہ ایر بہ جنیں کم اِنت۔

مندءَ پنجابی آنی سرا تیر گواری بوتگ 5 مُرتگ ءُ 4 ٹپّی

2012-03-07T19:34:00.003+04:00

بام ھال ،، ھالانی ردا بلوچستان ءَ مندے دمگ بلّو ءَ مرچی اسلم ڈنڈھائی بس ٹرانسپورٹ ءَ پنجابے نندوکیں پنجابیانی سرا تیر گواری بوتگ چہ اے اُرش ءَ ٹرانسپورٹ ءَ نندوکیں 5 پنجابی مُرتگ ءُ4 ٹپّی بوتگ اے پنجابی چہ پنجاب ءَ اتکگ اَنت تنّی وھدی زانگ نہ بیت اے پہ چی کارے ءَ مندءَ اتکگ اَنت ، پیسرا بلوچ سرمچارا گُشتگ کہ بلوچستان ءَ ھچ پنجابی ءَ جاگہ نیست ، فوجی بہ بیت یا سیول پنجابی بائد ھمش اِنت پنجابی چہ بلوچستان در بہ کپنت چیا کہ بلوچ آزادی ءِ جنگءَ اِنت ۔۔ تنی وھدی اے اُرش ءِ ذمّہ کسّ ءَ نہ زُرتگ

مند بلو ءَ ناشناسیں مردمانی تیرگواری ءَ دو مردم بیران بیتگ

2012-03-07T18:03:00.004+04:00

مند: ھالانی ردا مند ءِ دمگ ”بُلو” ءَ ناشناسیں مردماں ”بس ٹرانسپورٹ ءِ سرا تیرگواری کُتگ۔ چر ایشی ءَ چہ دو مردم مُرتگاں، بلے مُرتگیں مردمانی نام زانگ بیئگ ءَ نہ اَنت او اے ھم زانگ نہ بیتگ کہ وئیل ءِ سوب چی بیتگ۔

ماں ڈیر بگٹی ءَ بلوچ زھگ ءُ زالبولانی آوار جنی پاکی استان ءِ کاسگ چٹانی واستہ شرم ءِ گپے، شیر محمد بگٹی

2012-03-07T02:30:00.001+04:00

بی۔آر۔پی ءِ جارکش شیر محمد بُگٹی ءَ گُشتگ، ماں ڈیرہ بگٹی ءِ دمگ آر ڈی 238 ءَ پاکی رستریں فوج ءِ نیمگ ءَ بلوچ مات ءُ گُھار ءُ زھگ ءُ زالبولانی آوار جنی ھما وتگڑ ءُ بے پرکانی واستہ ھزار شرم گپ اِنت کہ آ تہ انگت پاکی استان ءِ کُٹ ءَ نشتگ اَنت ءُ ھمے وش گُمانی تھا اَنت کہ بلوچ چدو گیش غلامی ءِ ساد ءَ گورا کنت ءُ آ پاکی استان ءِ گُما نندگ ءَ سوب مند بنت۔
آئی ءَ گُشتگ ماں بلوچستان ءِ دمگ ڈیرہ بگٹی ءَ بلوچ چُک چینی ءِ کار یک شلا برجاہ اِنت ، مرچی پاکی اسلامی نام گیپتیں رستریں فوج ءَ بازیں بلوچ مات ءُ گُھار ءُ زھگ ءُ زالبول آوار جتگ اَنت ءُ گوں وت بُرتگ اَنت کہ ایشانی تھا ھپت سالئیں سیوا نورحسین، سئے سالئیں بچا خان ولد جمعہ خان، شش سائیں وزیراں بی بی ، بی بی جھانجری بگٹی، بی بی صبا بگٹی ، بی بی پتولی ءُ دگہ بازیں بلوچ زھگ ءُ زالبول ھوار اَنت۔ اگاں پاکی سرکار ءُ آئی ءِ وتگڑیں داشتگیں کاسگ چٹ ھمے گپ ءَ جن اَنت کہ بلوچستان ءِ ھچ دمگ ءَ فوجی ارش بیئگ ءَ نہ اِنت گڑا ڈیڑہ بگٹی ءِ دمگ آر ڈی 238 ءَ زھگ ءُ زالبولانی آوار جنی ءَ اے کُجام درچ ءَ چار اَنت۔ پاکی وتگڑیں کاسگ چٹ دُنیا ءِ چماں بند کنگ ءِ ھاترا ھمے گپ ءَ جن اَنت کہ ادا ھچ وڑیں فوجی ارش بیئگ ءَ نہ اِنت ، گُڑا آ انسانی حقانی گلاں ءُ میان استمانی رسانکدر ءَ ھمے موہ ءَ بدینت کہ ڈیرہ بگٹی ءَ کئیت ءُ گندیت تا اے ناشرکار ءُ وتگڑیں ریاست ءِ دروگ ءُ دوپوستی وت پدر بنت۔
آئی ءَ گُشتگ ماں ڈیرہ بگٹی ءِ دمگ آر ڈی 238 ءَ پاکی فوج ءَ ھما کرد کُتگ کہ جھانی راجدپتر ءَ چوشیں درور کم رسیت۔ پاکی بے سلک ءُ رستریں لشکر ءَ گوں بلوچ مات ءُ گُھارانی گُما ھما عمل کُتگ کہ ھچ غیرتمندیں بلوچ چوشیں کرد ءَ برداشت کُت نہ کنت۔ نو بلوچ ورناھاں لوٹیت کہ یک مُشت ءُ یک جاہ بہ بنت ءُ دُژمن ءَ ھما سبق ءَ بہ دیاں کہ تاں کرناں شموشکار مہ بیت ءُ پاکی لشکر ءِ نیمگ ءَ بلوچ زھگ ءُ زالبولاں آوار جنگ ءُ بیگواہ کنگ ءَ ابئید ھم لھتے وتگڑیں بلوچ گوں پاکی استاں ءَ ھمنیاداں تا آ اے گپ ءَ بیھال مہ بنت کہ ایشانی آسر ھما بیت کہ ماں ھر راج ءِ تھا ھما غدارانی بیتگ۔ اے رُسوا ءُ ٹیبڈر بنت۔ آئی ءَ یو۔ این۔ او ءُ میان استمانی انسانی گلاں چہ دزبندی کُتگ کہ بلوچ چُک چینی، بلوچ زھگ ءُ زالبولانی آوار جنی ءُ ماں بلوچستان ءَ انسانی حقانی ھلاپ ورزی ءِ ھلاپ ءَ توار چِست بہ کن اَنت۔۔۔

ڈیرہ بگٹی ءُ دگہ بازیں دمگاں پاکی رستریں لشکر ءِ ارش برجاہ اِنت۔بازیں ورناہ ءُ زھگ شھید ءُ بیگواہ کنگ بیتگ اَنت۔

2012-03-06T15:05:00.002+04:00

بام ھال: ڈیرہ بگٹی ءُ پاکی ایردستیں بلوچستان ءِ دگہ بازیں دمگاں اسلامی نام گیپتیں پاکی ناپاکیں فوج ءِ نیمگ ءَ بلوچ چُک چینی ءُ بلوچ ورناھانی شھید کنگ ءُ گار ءُ بیگواہ کنگ ءِ کار برجاہ اَنت ، گوستگیں یک ھپتگے تھا پاکی ناپاکیں لشکر ءَ سدانی ھساب ءَ بلوچ آوار جتگ ءُ بیگواہ کُتگ ءُ بازیں ورناہ شھید کُتگ اَنت۔ گوستگیں روچاں ماں نیو کاھان ءَ دوازدہ بلوچ ورناہ آوار جنگ ءُ بیگواہ کنگ بیتگ اَنت۔

وھدیکہ شیر محمد بگٹی ءِ ردا ماں ڈیرہ بگٹی ءَ پاکی رستریں لشکر ءَ بازیں بلوچ آوار جتگ اَنت ءُ بیگواہ کُتگ اَنت، بازیں ورناہ ءُ زھگ شھید کُتگ اِنت کہ آھانی تھا نوہ سالی زھگ ءُ زالبول ھم ھوار اَنت۔

گوستگیں روچاں ماں امریکی کانگریس ءَ منگ نامہے پیش کنگ بیتگ اَت۔ اے منگ نامہ ءَ بلوچ چُک چینی ءِ کرد ایر جنگ بیتگ اَت ءُ ماں بلوچستان ءَ انسانی حقانی ھلاپ ورزی ءِ ھلاپ ءَ توار چست کنگ بیتگ اَت۔ منگ نامہ ءَ امریکی انسان دوستیں سنیٹر ڈینا روھرا باکر ءَ اے گپ ھم دیم ءَ آؤرتگ اَت کہ بلوچ پیش ءَ یک آجوئیں راجی بیتگ ءُ آئی ءِ آجوئی پہ زور پُلگ بیت ، بائدیں بلوچ راجی وتواکی ءِ حق منگ بہ بیت،،

بلے ما دومی نیمگ ءَ گِندیں ماں ایردستیں بلوچستان ءَ پاکی لشکر ءِ نیمگ ءَ بلوچ چُک چینی ءِ عمل گوں تیزی ءَ برجاہ اِنت ۔ انسانی حقانی ھلاپ ورزی گیش بیتگ، ایشی ءَ زانگ بیت کہ پاکی اسلامی نام گیپتیں زالمیں فوج ھچ میان استمانی ءُ نیکراھی کیلوانی پابند نہ اِنت۔ پاکی رستریں ملائی لشکر ءَ یکشلا بلوچ چُک چینی ءِ کار برجاہ داشتگ ، بلوچستان ءَ پہ بے پرکی فوجی آپریشن برجاہ اِنت ۔ ھما زُلم ءُ زوراکی ءِ کسہ نوک کنگ بیتگ کہ انسانی راجدپتر ءَ چوشیں درور کم رسیت۔۔۔

پاکی استان ءُ پاکی رستریں فوج مُردہ بات۔۔

نیشنل پارٹی ءِ باسک امام بزنجو ءَ گپ گپ ءِ سرا عبدالرحمان دشتی تیرگواری کُتگ ءُ کُشتگ

2012-03-06T14:01:00.000+04:00

بام ھال(کراچی) ھالانی ردا گوادر ءِ ڈی۔سی۔او ٹکی شخصیت عبدالرحمان دشتی بلوچ نام گیپتیں راجدوستیں گل نیشنل پارٹی ءِ باسک امام بزنجو ءَ تیرگواری کُتگ ءُ کُشتگ۔ ھندی مردمانی ردا عبدالرحمان دشتی ءِ کوش ءِ مستریں سوب ھمیش اِنت کہ آئی ءَ بھتہ نہ زُرتگ ءُ رشوت نہ وارتگ، مرچی آ این۔پی ءِ باسک گوں امام بزنجو ءَ ماں کراچی کلفٹن ءَ دوچار کپتگ، گپ گپ ءِ سرا آھانی میان ءَ گپ برز شُتگ، گُڑا امام بزنجو ءَ آئی ءِ سرا تیری جتگ ءُ کُشتگ، آھاں لوٹ اِتگ کہ آئی ءِ لاش ءَ ماں ویرانگے ءَ چگل بِدینت، بلے بے سوب بیتگ اَنت۔

ادا گپ اِش اِنت کہ نیشنل پارٹی ھر وھد ءَ گُشیت کہ ما ”عدم تشدد” سیاست کنیں، گُڑا اے نابودیں مرد ءِ میار چی اَت کہ آھانی باسک ءَ جت ءُ کُشت۔

مرچی بلوچستان ءِ کُلیں دمگاں پاکستانی فوجے سرا اُرش بوتگ

2012-03-05T23:22:00.002+04:00

بام ھال (ڈیرہ بُگٹی۔۔پنجگور)ھالانی ردا مرچی ڈیرہ بُگٹی ءِ ھند سوئی ءَ 238 ءِ کشک ءَ پاکستانی فوجی کاروانءِ سرا بلوچ سرمچاران اُرش کُتگ چہ اے اُرش ءَ 13 پاکستانی فوجی مُرتگ ءُ 17 ٹپّی بوتگ اشانی 2 گاڑی تباہ بوتگ اے اُرش ءِ ذمہ بلوچ آجوئی گل (بی آر اے ) ءَ زُرتگ ،، دومی ھالانی ردا پنجگورے دمگ رخشانءِ کورے کشءَ پاکستانی فوجی چوکی ءِ سرا سرمچارا اُرش کُتگ ، بازیں ایف سی والائے مرگءِ سوج اِنت اے اُرش ءِ ذمہ واری تننگہ ھچ گلءَ نہ زُرتگ دیم ترے ھالان دیم ءَ کاریں ،

گوستگیں چار روچاں پنج بلوچ ورناھانی ٹپ ءُ ٹوریں لاش دز کپتگ اَنت

2012-03-05T01:38:00.000+04:00

بام: ماں امریکی کانگریس ءَ بلوچ چُک چینی ءِ ھلاپ ءَ توار چست بیئگ ءَ ابئید ھم ماں پاکی ایردستیں بلوچستان ءَ بلوچ چُک چینی ءُ ٹپ ءُ ٹوریں لاشانی دز کپگ یک شلا برجاہ اِنت۔ رودرتکی بلوچستان ءِ دمگ ڈیرہ بگٹی ءَ گوستگیں چار روچانی تھا پاکی رستریں لشکر ءَ پنچ بلوچ ورناہ شھید کُتگ اَنت ءُ آھانی ٹپ ءُ ٹوریں لاش ماں ویراناں چگل داتگ اَنت۔
بی۔آر۔پی ءِ جارکش شیر محمد بگٹی ءِ ردا سئے مارچ ءَ ڈیرہ بگٹی ءِ دمگ پیرکوہ ءَ چار بلوچ ورناھانی جتگ ءُ چُپتگیں لاش دز کپتگ اَنت، کہ آھانی نام ایش اَنت۔ زھرو ،لنبو، مینگل ءُ رحیم بخش۔ اے چاریں بلوچ یک مارچ ءَ پاکی رستریں ایجنسیاں آوار جتگ اَنت
وھدی کہ دگہ بلوچ ورناھے سبزل ولد حق داد کہ پنچ روچ پیش پاکی چیریں ایجنسی آئی۔ایس۔آئی ءَ ماں پیرکوہ ءَ آوار جتگ اَت، آئی ءِ ٹپ ءُ ٹوریں لاش مرچی پیرکوہ ءَ دز کپتگ۔
پاکی استان مردہ بات۔۔۔۔۔۔

ڈائناسوری مکسک۔ سائنس

2012-03-04T14:39:00.002+04:00

بام: کوھنیں دمبانی تھا دز کپتگیں ھڈاں چہ انسان ءَ بازیں پٹ ءُ پول کُتگ ءُ بازیں لیکھے دیم ءَ آؤرتگ۔ چرے ھڈاں چہ بازیں لیکہ دیم ءَ آرگ بیتگ۔ برے وھدی انسان شادوانی بُن ءُ بیھ گُشگ بیتگ ءُ برے کرمانی سیاد ءُ وارث، چارلس ڈاروین ءِ اے کافری لیکہ الم ھر کسے دیم ءَ گوستگ اَنت۔ ھمے ھڈانی پٹ ءُ پول ءَ چہ زانوگرانی ھمے گپ دیم ءَ آؤرتگ کہ اے دُنیا ءَ ھزاراں ساھدار است بیتگ اَنت کہ آھاں وھد ءِ وھشتانی دیم ءَ وت ءَ داشت نہ کُتگ ءُ گار ءُ بیگواہ بیتگ اَنت۔

بلے بیاکہ چائنا ءِ دمگ منگولیا ءَ یک سائنسی پٹ ءُ پولی (گورپٹیں) ٹولی یے لھتے انچیں مکسکے ھڈاں گوں دوچار کپتگ کہ آھانی گُشگ ءِ ردا اے مکسکے ھڈانی کد چہ انوگیں مکسکانی کچ ءَ دہ سری مزن اِنت۔

سائنسدانانی ردا اے ھڈ سد ملین سال کوھنیں ھڈ اَنت۔ آ اے ھڈانی شوھازگ ءَ پہ سائنسی پٹ ءُ پولی دُنیا ءَ جوانیں گامگیجی سرپد بنت۔ آھانی ردا دز کپتگیں مکسکے ھڈاں چہ ھمے نشوندھی رسیت کہ اے ٹوھیں مکسک گوں استیں وھد ءِ مکسکاں گوں ھم دروشم بیتگ اَنت ءُ ایشانی تھا پادانی سرا تر ءُ گرد کنگ ءُ بال کنگ ءِ سِکّت ھم بیتگ۔

چین، امریکا ءُ فرانس ءِ زانوگرانی ٹولی ءَ اے مکسکی ھڈ چین ءِ دمگ منگولیا ءَ شوھاز اِتگ اَنت۔آھانی ردا اے مکسکاں وتی زندگ دارگ ءِ ھاترا ڈائناسورانی ھون چونس اِتگ۔۔

روس صدارتی گچین کاری، مزن وزیر پیوٹن ءِ سوب مند بیئگ ءِ گُمان

2012-03-04T11:23:00.002+04:00

بام” ھالانی ردا روس ءَ پہ صدر گچین کنگ ءِ ھاترا ووٹ ریچگ بیئگ اِنت۔ گچین کاریاں پہ سوب مند بیئگ ءَ مزن وزیر پیوٹن ءِ شاھیم ءِ سر گیش بیتگ ءُ آئی ءِ سوب مند بیئگ ءِ گمان زاھر کنگ بیئگ اِنت۔
زانتکارانی ردا مزن وزیر پیوٹن ءِ پہ صدری ءَ سوب مند بیئگ ، استیں وھد ءِ روس امریکی مان گیشتگیں سیادیانی دوبر ودگ ءَ ھم کمکے بیت کنت۔ روس امریکا ءِ میان دلرنجی ھما وھد ءَ گیش بوت کہ روس ءَ گوں چائنا ءَ ھوار لیبیا ءُ شام ءِ ھلاپ ءَ منگ نامہ رد کُت، چر ایشی ءَ اے دوئیں ملکانی میان ءَ دلرنجی ودی بوت،
مزن وزیر پیوٹن ایشی ءَچہ پیش دو ھزار تاں دو ھزار ھشت ءَ ھم روس ءِ صدر بیتگ۔ یک رندی پدا آئی ءِ سوب مند بیئگ ءِ گمان زاھر کنگ بیئگ اِنت۔

مرد ھما اَنت گوں تیر ءُ تپنگ ءَ مِر اَنت، اُستاد شریف بیوس ءِ نوکیں تامُر ”یاگی” شِنگ بیتگ۔

2012-03-04T10:43:00.001+04:00

بام: بلوچی تامر ”آشوب” ءَ پد تامُری دُنیا ءِ مزنیں نام واجہ استاد شریف بیوس ءِ نوکیں تامُر ” یاگی” شنگ بیتگ۔ اے تامُر ءِ تھا بلوچ تامری ازم کار غفور گمگین، طاھر ولید ، عظیم بلوچ ءُ سلیم بلوچ ءَ پہ جوانی وتی ازم ءِ درنگازی کُتگ۔ اے تامر پہ بلوچی ازمکاری ءِ دُنیا ءَ جوانیں دیمروئی یے بیت کنت۔ ایشی ءَ ابئید اے تامر ءِ تامر ءِ تھا گیش ءَ چہ گیش راجی سنچ ءُ آشوبی رنگ ءِ درنگازی بیتگ۔ اے پہ بلوچ ورناھاں جوانیں سکینے بیت کنت۔

امریکا ءِ زِرباری دمگ ترندیں توپان ءُ گواتاں مان پتاتگ

2012-03-04T10:20:00.002+04:00

انڈیانا: درملکی رسانکدر ءِ ردا امریکی استان انڈیانا ءُ ٹینسی ءَ ھوار دگہ بازیں زرباری دمگ ءُ کوچگ ترندیں گوات ءُ توپاناں مان پتاتگ اَنت۔ ترندیں گوات ءُ توپانانی آسر ءَ سئے سد ءَ چہ گیش مردم مرگ ءِ آماچ بیتگ۔ مھلوک ءِ مال ءُ جھگیر ءُ جاہ ءُ گِس پرشتگ ءُ تباہ بیتگ۔ مھلوک ءَ بازیں تاوانے رستگ۔

راجی آجوئی ءِ لوٹانی پدا کجام یک مُلکے ءِ کمک ءَ وش اَتک کنیں۔ بلوچ رھشون ڈاکٹر اللہ نظر بلوچ

2012-03-03T22:51:00.001+04:00

بام: بلوچ رھشون ڈاکٹر اللہ نظر ءَ تران کنان ءَ گُشتگ، یو۔این۔او دگہ انسانی حقانی گل بلوچ چُک چینی ءِ ھلاپ ءَ آواز چِست بہ کن اَنت۔ بلوچ راجی آجوئی ءِ ھاترا کُجام یک ملک ءُ انسانی دوستیں راجانی کمک ءَ وش اَتک کنت۔ بشرطیکہ کمک بلوچ راجی آجوئی ءِ شرائطانی بنیاد ءَ بہ بیت، نیشنل پارٹی دوتل ءُ دوپوستیں گلے، این،پی ءُ بی۔این۔پی عوامی ءُ مسلم لیگ ءُ پی۔پی۔پی آں ھچ وڑیں فرق نیست، نواب رئیسانی ءُ سردار زھری بلوچ دُشمن پالیسیاں دیم ءَ برگ ءَ اَنت،، نواب براھمدگ بگٹی ءُ خیر بیار مری بلوچ راجی جُھد ءِ سپاھی آں۔ بلوچ جھد ءَ سرداری جھد ءِ نام ءِ دیگ پاکی سرکار ءِ بلوچ راجی جھد ءَ کاؤنٹر کنگ ءِ پالیسی ئے۔ پاکی میدیا ھم اے کار ءَ ھوار اِنت

آئی ءَ ”چارٹر آف لبریشن” ءِ بابت ءَ تران کنان ءَ گُشتگ کہ چارٹر آف لبریشن بلوچ راجی جُھد ءِ کڈی یے، اے پہ پہ بلوچ راجی آجوئی ءَ جوانیں گامگیجی۔۔۔

ما یک ڈیھے ءِ آجوئی ءِ جنگ ءَ کنگ ءَ اِنت، یک ملکے دز گرگ لوٹیں۔ بلوچ کہ وتی ملک ءَ دست ءَ گیپت کنت تا آئی ءَ داشت ھم کنت۔ آجوئی ءِ جنگ ءِ وھد ءَ راجی ، چاگردی، سیاسی ، ادبی پڑاں ھچ وڑیں دیمروئی کار بیت نہ کنت۔ آجوئی ءَ پد اے سرجمیں کار دست ءَ آرگ بنت۔ سیاسی ءُ ثقافتی پراں دیمروئی ءِ کار بیت کنت۔

انڈیا ءُ دگہ ملک کمک کنگ ءَ نہ اَنت۔ بنگال آجوئی جھد ءَ انڈیا ءِ کمک ءُ دلبڈی گون اَت، تا لھتے ماھانی تھا آجو بیت۔ بلوچ راج وتی دستانی زور ءَ آجوئی ءِ جنگ ءَ دیم ءَ بران اِنت۔

اے جنگ بلوچ نیشلزم ءِ جنگ اِنت۔ نیشنلزم ءِ لیکہ یک داب ءَ اوشتات نہ کنت۔ شوشلزم ءِ ردا ردوم زُرتگیں سنچ ھما ھلکاں ھم ھتم بیتگ۔ راجی آجوئی ءِ لوٹانی پدا کجام یک مُلکے ءِ کمک ءَ وش اَتک کنیں۔

بلوچستان ءِ دمگ مچھ ءَ پاکستانی 3 ایف سی والائے لاش دست کپتگ

2012-03-03T22:30:00.003+04:00

بام ھال ،، ھالانی ردا مرچی مچھ ءِ دمگ ءَ پاکستانی ایف سی 3 فوجیانی لاش دست کپتگ اَنت ،، گیشتریں ھالانی ردا اے ایف سی ے سئیں مردم جنوری 31 تاریخ ءَ مارگٹ ءِ دمگ ءَ بلوچ سرمچارانی دستءَ دزگیر کنگ بوتگ اتاں ۔بلوچ سرمچارانی گل بلوچ لبریشن آرمی (بی ایل اے( ءِسرمچاران۔۔ پاکستانی ایف سی ئے یک چوکی ئے سرا حملہ کُتگ ات ، اے حملہ ءَ بی ایل اے جار کش ءِ گُشگ ات 35 ایف سی والا مُرتگ ءُ 3 مئے سرمچاراں دست گیر کُتگ ۔ سہ روچ پیش بی ایل اے ءِ جار کش ءَ اخبارے ءَ داتگ ات کہ اے سئیں ایف سی والایاں ءَ بلوچ عدالتءَ پاھوئے سزا داتگ مرچی ھمے سزایافتئیں فوجیانی لاش ۔۔۔ بلوچستان ءِ ھند مچھ ءِ دمگ ءَ دست کپتگ اَنت

ڈیرہ بگٹی ءَ پاکی سرکار ءَ چار آوار جتگیں بلوچ شھید کُتگ اَنت۔

2012-03-03T19:21:00.000+04:00

ڈیرہ بگٹی: بی آر پی یے جارکش شیر محمد بگٹی ءِ ردا مرچی ماں ڈیرہ بگٹی ءِ دمگ پیرکوہ ءَ چار آوار جتگیں بلوچ ورناھانی ٹپ ءُ ٹوریں لاش دز کپتگ اَنت۔ شھید بیتگیں ورناہ چہ بلوچ راجدوستیں گل بی۔آر۔پی ءَ سیادی دار اَنت۔

بلوچ راجی سنچ ءِ ھلاپ ءَ کارمرز بیوکیں سرکاری کارگس نشانگ کنگ بنت، نوھان بلوچ

2012-03-03T14:02:00.004+04:00

بام: بلوچ سلاہ بندیں گل ”بلوچ نیشنل لبریشن فرنٹ” ءِ جارکش نوھان بلوچ ءَ ناشناسیں ھندی ءَ فون جنان ءَ ماں کیچ ءَ پاکی ریڈیو کارگس ءِ سرا بم تراک ءِ ارش ءِ ذمہ واری من اِتگ، آئی ءَ گُشتگ مئے جنگ بلوچستان ءِ آجوئی ءَ برجاہ مانیت، اے ردا سرکاری کارگس، سرکاری فوج ءُ سرکاری چاروگ مئے نشانگ جوڑ بنت۔

ڈیرہ بگٹی ءَ تیرگواری ءَ سئے کس بیران بیتگ، کیچ ءَ ریڈیو کارگس ءِ سرا بمب ارش بیتگ

2012-03-03T13:10:00.000+04:00

بام ھال: ھالانی ردا رودرتکی بلوچستان ءِ دمگ ڈیرہ بگٹی ءَ ناشناسیں مردمانی تیرگواری ءَ سئے مردم بیران بیت ءُ دگہ یکے ٹپی۔۔۔۔۔

بلوچستان ءِ دمگ کیچ ءَ ”کیچ ریڈیو کارگس” ءِ سرا بمب تراکے بیتگ، چر ایشی ءَ چہ کارگس پرشتگ ءُ تباہ بیتگ، وھدیکہ ارش ءِ ذمہ واری ”بلوچ نيشنل لبریشن فرنٹ ءِ جاركش نوهان بلوچ ءَ منّ اِتگ۔

دو مارچ، شھدائے خضدار ءِدومی سالروچ، گچین ءُ چار ءُ گُزار اِنت پدا منی ڈیھ ءَ۔۔۔۔

2012-03-02T19:41:00.001+04:00

بام ھال: مرچیگیں روچ پہ بلوچ راج ءَ یک اَنچیں روچی کہ بلوچ اے روچ ءَ کدی ھم بیھال نہ کنت۔ ھما راجی شھیدانی دومی سال روچ اِنت کہ آھاں پہ راجی دود ءُ ربیدگ ءُ راجی سنچ ءِ پھازگ ءَ وتی گھگیریں سر ندر کُت اَنت۔
ما چہ بام ھال ءِ نیمگ ءَ شھید سکندر جان ءُ شھید جنئید جان ءَ ھزاراں سلام گُشیں کہ آھاں پہ ھمے بزگیں راج ءِ دود ءُ ربیدگ ءُ راجی سنچ ءُ ماتیں گُلزمین ءِ آجوئی ءَ وتی گھگیریں سر ندر کُتگ اَنت۔
ما ھما بنگالی براتاں ھم ھزار سلام گُشیں کہ آھاں پہ وتی ماتی زبان ءِ پھازگ ءَ عھد ءِ زوراک ءِ شل سریں تیر وتی سینگ ءَ زُرتاں،
ما بلوچ راج ءَ ھمے گُشگ لوٹیں کہ یک راجی یے مستریں پجار آئی ءِ ماتی زبان ءُ راجی کلچر بیت۔ پمیشا مرچی ھما راجی شھیداں دومارچ دوھزار دہ ءَ پہ راجی کلچر ءِ پھازگ ءَ وتی سر ندر کُتاں، آ پہ راج ءَ سمبل اَنت۔ نشان اَنت۔ شھیدانی سرتاج اَنت۔ زوراک الم پہ ھمے سمبلانی چہ راج ءِ دلانی کشگ ءَ وڑ وڑیں توجیل کنت۔ بلے دیم ءَ الم میان استمانی تکاں ھمے شھیدانی نام مانیت ، بلوچ ھم بائدیں ھمے دوئیں شھیداں وتی کلچر ءِ سمبل جوڑ بہ کنت۔ تاکہ ھر دمان ءُ ھر ساھت ءَ راج ءِ ورناھانی دل ءَ ھمے شھیدانی نام زندگ بہ بیت۔
یک رندی پدا ما شھید سکندر ءُ شھید جنئید جان ءَ سلام گُشیِں۔۔۔۔۔

پنجگور،پاکی ایف سی ءَ بلوچ کلچر ڈے ءَ بھر زُرتگ۔

2012-03-02T18:37:00.001+04:00

پنجگور: ھالانی ردا مرچی ماں پنجگور ءَ بلوچ کلچر ڈے ءِ مراگش برجم دارگ بیتگ۔ مراگش ءَ پاکی ایف۔سی ءَ ھم بھر زُرتگ ءُ بلوچ راج ءَ را کلچر ڈے ءِ درگت ءَ گوں دل ءِ جُھلانکیاں مبارک بادی داتگ، پاکی ایف۔ سی ءَ پنچ سد بلوچی چادر ءُ سئے سد بلوچی کُلاہ ھم تقسیم کُتگ۔ ایشی ءَ دو سال پیش وھدی ماں خضدار ءَ بلوچ کلچر ڈے برجم دارگ بیتگ اَت، گُڑا اودا پاکی ایف۔سی ءَ بمب گواری کُتگ اَت، چر ایشی ءَ چہ دو بلوچ نودربر شھید بیتگ اَت ءُ بازینی ٹپی۔۔۔

او مرچیگیں کلچر ڈے ءَ لھتے شاعر ءُ ادیب کہ وت ءَ راجی شاعر گُشنت ، آ ھم پہ وزمے ناچ کنگ ءَ اَنت۔

او نام گیپتیں بلوچ راجدوستیں گل نیشنل پارٹی ءِ باسک ھم ھوار اَنت۔ او پہ ناچ ءُ سُرناہ ءَ وتی دل ءَ نہ رنجینگ ءَ اَنت۔

پاکستانءِ دست ءَ آوار جتگیں سہ بے گُناھیں بلوچانی لاش دست کپتگ اَنت

2012-03-01T20:22:00.005+04:00

بام ھال،، ھالانی ردا مرچی بلوچستان ءَ پاکستان ءِ دست ءَ آوارجتگیں سہ بے گُناھیں بلوچانی ٹپُ ءُٹوریں لاش دست کپتگ اَنت ،، رحیم داد بلوچ مستونگ نندوک اِنت کہ پاکستان ءِ اجنسیاں آوار جتگ اَت ، عبدالرحمّن ولدخیر محمد کہ وندر ءِ جھہ منند اِنت سیمی مردمے نام تنی وھدی زانگ نہ بیت اے سئین بلوچ پاکستان ءِ اجنسیان آوار جتگ اَنت ءُ مرچی آیانی ٹپّ ءُ ٹوریں لاش اِش دؤر داتگ اَنت

پاکستان دو دیمی آدینکے، ڈینا روھراباکر

2012-03-01T11:50:00.001+04:00

واشنگٹن: امریکی سنیٹر ڈینا روھرا باکر ءَ گُشتگ پاکستان دو دیمی آدینکے، مئے گُما دو تل ءُ دو پوستی کنگ اِنت۔ آئی ءَ چہ امریکی سرکار ءَ دزبندی کُتگ کہ آ میان استمانی ناشرکار اسامہ بن لادن ءِ کوش ءَ کمک کنوکیں ڈاکٹر شکیل آفریدی ءَ چہ پاکستانی کزا ءَ بہ رکینیت۔ آئی ءَ گُشتگ ھزاراں امریکی فوجیانی کُشندہ اسامہ بن لادن پاکی فوج ءَ پناہ داتگ، دومی نیمگ ءَ وکی لیکس ءِ ڈس اِتگیں رپورٹے ءَ ھم اے نشوندھی دیگ بیتگ کہ امریکی سی۔آئی، اے اے گپ ءَ سرپد اِنت کہ پاکی فوج ءِ یک جنرل یے ءَ ھوار باز افسراں اسامہ بن لادن پناہ داتگ

خضدار ءَ چہ ناشُناسیں مردمانی تیر گواری ءَ دو بلوچ شھید بوتگ

2012-02-29T23:42:00.005+04:00

بام ھال ،،ھال اِنت کہ مرچی شپ ءَ خضدارے ھندءَ ڈبل روڈ ءَ چہ ناشُناسیں مردمانی تیر گواری ءَ دو بلوچ ورناء شھید بوتگ ، گیشتریں ھالاں ردا عبدالواحد محمد شہی ءُ محمد سیلمان نامیں دو بلوچ وناء کہ دوئیں یاک ٹیلفون کمپنیءَ کا ءَ بوتگ اَنت مرچی شپءَ چہ ناشناسیں مردمانی تیرگواری ٹپّی بوتگ اَنت ، وھدے اسپتالءَ برگ بوت اَنت گُڈا ھمودا دوئیں بلوچ شھید بوت اَنت عبدالواحد محمد شہی ( بی این پی ) مینگل ءِ رھنماء عبدالطیف ءِ برات اِنت اے ھالے اشکُنگ ءَ پد کُلیں خضدار ءَ آس روک اِنت

حاجی لشکری رئیسانی چہ پاکی گل ءِ بنکی باسکے ءَ دز کش بیتگ۔

2012-02-29T21:48:00.006+04:00

کوئٹہ: ھالانی ردا ماں ایردستیں بلوچستان ءَ پاکی پیپلز پارٹی ءِ بنجاھی سروک حاجی لشکری رئیسانی چہ پارٹی بنکی باسکے ءَ دزکش بیتگ۔ آئی ءِ چہ پاکی گل ءِ دزکش بئیگ ءِ سوب دنیگت زانگ نہ بیتگ۔ بلے آئی ءَ ھر وھد ءَ چہ وتی بُرزی واجھاں بلوچستان ءِ جاورھالانی بابت ءَ دِلرنجی درشان کُتگ۔ آئی ءَ مدام اے گپ ھم جتگ کہ رحمان ملک باز دروگ بندیت۔ آئی ءَ یک ٹی وی مراگشے ءَ اے گپ ھم جتگ اَت کہ ”شما وتی مراگش ءَ وت برجاہ بِداریت، او بلوچستان چہ شُما دیر شُتگ”۔ او لشکری پاکی پارلیمنٹ دوستیں یکیں سردار اِنت کہ آئی ءَ بلوچ جُھد کارانی ھلاپ ءَ کدی ھم چو آ دگرانی وڑا بدیں زبان کارمرز نہ کُتگ ءُ آئی ءَ بلوچ بیگواھیں مردمانی بابت ءَ راستیں گپ ھم جتگ۔ دوی نیمگ ءَ پاکی صدر زرداری ءَ چہ لشکری ءَ دزبندی کُتگ کہ وتی دزکشی ءِ فیصلہ ءَ واپس بہ زوریت۔۔۔

(مور مُرت، مور ءِ بادشاہ مُرت )

ایرانی مُلاھانی لشکر ءَ دو بلوچ زالبول شھید کُتگ

2012-02-28T23:16:00.000+04:00

بام: ھالانی رد ایرانی ایردستیں بلوچستان ءِ دمگ پشامگ ءَ ایرانی فوج ءِ تیرگواری ءَ دو بلوچ زالبول شھید بیتگ، وھدیکہ یک زالبولے ءَ ھوار دو کسانیں زھگ ٹپی اَنت۔ روکپتی بلوچستان ءِ شھر پشامگ ءَ بلوچ زالبول وتی بُنکی لوٹانی ھاترا زھرشانی کنگ ءَ بیتگ اَنت کہ رستریں ملاھانی لشکر ءَ تیرگواری کُتگ ، تیرگواری ءِ آسرا دو بلوچ زالبول شھید بیتگ ءُ یک زالبولے ءَ ھوار دو زھگ ٹپی اَنت۔
گوستگیں روچاں ماں امریکی کانگریس ءَ منگ نامگے پیش بیتگ اَت، ایشی ءِ تھا اے گپ ھم دیم ءَ آرگ بیتگ اَت کہ بلوچ راج ءِ تاریخی سرزمین سئے بھراں ونڈ کنگ بیتگ، ایران ءُ پاکستان ءَ بلوچ راج ءِ سرا زُلم ءُ زیادتی بیئگ اِنت۔ بلوچ وتی حقانی لوٹ ءِ پدا کُشگ بیئگ ءَ اَنت۔ اے منگ نامگ ءَ رند ما ھمے گندگ ءَ اِنت ایرانی ملاھانی لشکر ءَ بد تریں رنگے ءَ بلوچ ءِ کُشت ءُ کوش بنگیج کُتگ۔ گوستگیں روچاں ماں روکپتی بلوچستان ءِ شھر لاشار ءَ ھم ایرانی فوج ءَ پنچ بلوچ شھید کُتگ اَت۔۔۔

واجد مسعودی پاکی چیریں دستاں آوار جتگ۔

2012-02-28T22:25:00.003+04:00

مند: ھالانی رد ءَ بی۔آر۔ایس۔او ءِ پیشی رھشون، بلوچ نبشتہ کار واجد مسعودی ھم آوار جنگ بیتگ۔ آئی ءِ کھول ءِ گُشگ ءِ ردا واجد مسعودی مند ءَ چہ کراچی ءَ رؤکیں بس ءَ سیزدہ فروری ءَ آوار جنگ ءُ بیگواہ کنگ بیتگ۔

پروفیسر مصطفیٰ بلوچ ءَ گوں بلوچ رھشون اختر مینگل ءَ گند ءُ نند کُتگ۔

2012-02-28T08:07:00.001+04:00

نوکیں مستاگ: بلوچ راجدوست پروفیسر مصطفیٰ بلوچ ءَ ماں دبئی ءَ بلوچ رھشون واجہ اختر مینگل ءَ گوں گند ءُ نند کُتگ۔ مصٍطفیٰ بلوچ ءَ واجہ خیر بیار ءِ نیمگ ءَ دیم داتگیں ”چارٹر آف بلوچستان” ءِ تاک پہ گیشیں چار ءُ بچار ءَ واجہ اختر مینگل ءِ دست ءَ داتگ، واجہ اختر مینگل ءَ تران کنان ءَ گُشتگ کہ اے چارٹر ھما وھد ءَ پہ بلوچ راج ءَ سوب مند جوڑ بیت کنت کہ ما یکے گوں دومی ءَبھیسہ بِداریں، پروفیسر مصطفیٰ بلوچ ءَ گُشتگ کہ ھمے چارٹر ء مئے یکے گوں دومی ءِ سرا بھیسہ دارگ ءَ کمک جوڑ بیت ءُ بلوچ ءِ تپاکی ءُ یکجاھی یے وسیلت جوڑ بیت۔
دوئیں رھشوناں بلوچستان ءِ استیں جاورھالانی سرا ھم گپ ءُ تران کُتگ۔

ڈیرہ بُگٹی ءَ پاکستانی فوجے سرا اُرش بوتگ 14 مُرتگ

2012-02-27T20:50:00.003+04:00

بام ھال ،، ھالانی ردا مرچی ڈیرہ بُگٹی ءِ دمگ ءَ توبہ ءِ ھندا پاکستانی فوجے کاروانے سرا بلوچ سرمچاران اُرش کُتگ ، چہ اے اُرشءَ 15 پاکستانی فوجی مُرتگ ءُ سہ گاڑی تباہ بوتگ ، بلوچ سرمچاران فوجیانی درستیں سلاہ گوں وت ءَ بُرتگ اَنت ، چہ نہ شُناسیں جاھے ءَ بلوچ ریپلیکن آرمی ( بی آر اے )ءِ جارچین سرباز بلوچ ءَ گوں ھالترانان تران کنانءَ گُشتگ اے اُرش ءِ زمہ مئے آجوئی لوٹوکیں گل ءَ زُرتگ ، دیم ترا سرباز بلوچ ءَ گُشتگ تنکہ بلوچستان ءِ آزادی ءَ مئے اے وڑیں اُرش گوں طالمین ریاستءَ برجاہ مان اَنت

ماہ ءِ اولاداں جیگ تل داتگ۔ جھان ءَ حد ءُ سیمسر اَست۔ سائنسدان

2012-02-27T17:38:00.000+04:00

پیش ءَ ما چہ مُلا ءُ مُرشدانی دپ ءَ بس ھمے گپ اِش کُتگ کہ اے جھان(world) باز پراہ ءُ شاھگان اِنت۔ ایشی ءَ حد ءُ سیمسر نیست۔ بس رؤت رؤت نہ کُٹیت۔ بلے یورپی سائنس داناں دیر گند ”پلینک” وسیلت ءَ دُنیا ءِ یک نوکیں عکسے پیت بند کُتگ ءُ شنگ کُتگ۔ اے عکس ءَ سرجمیں جھان پیش دارگ بیتگ۔ ایشی ءَ چہ ھمے نشوندھی رسیت کہ جھان ءَ حد ءُ سیمسر اَست۔۔۔

شست کروڈ ”یورو” ءَ چہ تیار کُتگیں اے آزمانی دیر گند گوستگیں سال ءَ آزمان ءِ جُھلانکیانی تھا دیم دیگ بیتگ ، ایشی ءِ دیم دیگ ءِ مول ءُ مراد جھان ءِ پٹ ءُ پول بیتگ، تانکہ زمین جاہ منند بِزاننت کہ اے جھان چنکہ سال اِنت جوڑ بیتگ۔ جھان ءَ استیں نوبت ءَ سر بیئگ ءَ چنکہ کرنانی سفر بُر اِتگ۔ چونیں چونیں عھداں گوں دوچار کپتگ۔۔۔ استال ءُ کلکشانانی رھبند چون جوڑ بیتگ اَنت۔ اے ”دیرگند” بازیں عکس بندی کُتگ ءُ زمین ءَ سر کُتگ۔ اے عکس ءُ پیت بندی گیشتر ھما دور ءَ بیتگ اَنت کہ اے جھان یک ٹوھیں وئیلے ءَ پد وجود ءَ اَتکگ کہ ھمے وئیل ءَ ”بیگ بینگ” گُشنت۔ بزاں ھما عھد ءِ عکس بیتگ اَنت کہ بیگ بینگ ءِ وئیل ءَ رند جھان وجود ءَ آیگ ءَ بیتگ۔ دنز ءُ گُبار بیتگ ءُ استال ءُ کلکشان وتی رھبندانی سرا تر ءُ تاب ءِ شوھاز ءَ بیتگ اَنت۔۔ بلے انوں ءَ ھمے گپ ءَ زمین جاہ منند ابکہ کُتگ اَنت کہ وھدی ھمے دیر گند ءَ سرجمیں جھان ءِ عکس پیت بند کُتگ ءُ زمین ءَ دیم داتگ۔۔۔۔۔۔۔۔۔۔۔۔۔۔۔۔۔

پدا گپ اِش اِنت کہ ھمے عکس ءَ مئے استالانی کلکشان ھم باز پدریں وڑی ءَ زاھر اِنت او ھما جمبر ھم شریں وڑی ءَ زاھر اَنت کہ سائنسدانانی ردا اے جمبر چہ مئے زمین ءَ ھزاراں سالانی فاصلہ ءَ دور اَنت۔ھمے عکس سائنسداناں اے جھان ءِ بابت ءَ گیشیں پٹ ءُ پول کنگ ءَ ھم مدت کنت۔۔۔۔۔

سائنسدانانی گُشگ ءِ ردا اے جھان سیزدہ ارب ھپتاد کروڈ سال ءَ پیش جوڑ بیتگ ، اے جھان ءِ استال ءُ کلکشانانی جوڑ بیئگ ءِ سوب یک وئیلے بیتگ کہ ”بیگ بینگ” یے گُشنت۔ ایشی ءَ چہ پیش اے جھان بازیں گیس ءُ دنز ءُ مُجانی دروشم ءَ یک جاہ بیتگ۔ او بازیں گیسانی زور ءَ چہ ترک اِتگ او چر ایشی ءَ ماہ ءُ روچ ءُ استال ءُ کلکشان جوڑ بیتگ اَنت۔ او جھان وجود ءَ اتکگ۔۔۔۔۔۔

چر اے تراک ءَ ھما چُنڈ کہ آھانی تھا رُژن ءُ گرمی ءِ سِکّت بیتگ ، آھانی وڑ وڑیں رھبندانی سرا وتی سفر بُنگیج کُتگ۔ سائنسدان وھد ءِ ٹپاسگ ءِ ھاترا ”آئن اسٹائن” ءِ داتگیں فارمولہ رُژن ءِ رپتار (E=mc2) کارمرز کن اَنت۔۔ رُژن یک سکینڈے ءَ یک لکھ ءُ ھشتاد ءُ شش میل ءَ سفر کنت۔

دیم داتگیں پیت بندانی تھا ھما وائبریشن آنی عکس ھم ھوار اَنت کہ جھان ءِ جوڑ بئیگ ءَ پسر پیش اَتکگ اَنت۔۔ایشی ءَ چہ ھمے نشوندھی رسیت کہ جھان(استال ءُ کلکشان) ”بیگ بینگ” ءِ مزنیں تراک ءَ پیسر یکجاہ بیتگ۔

دیر گند ”پلینک” گرمی(temprature) ءِ تھا کسان کسانیں بدلی سدلیانی ٹپاسگ ءِ کار ءَ ھم سک بلد اَنت۔ چر ایشی ءَ چہ سائنسداناں ھمے گپ ءِ زانگ ءَ کمک رسیت کہ استال ءُ کلکشان چتور ءُ چون جوڑ بیتگ اَنت۔

خلا ءُ جھان ءِ پٹ ءُ پول ءَ کارمرز بیوکیں دیر گند رُژن ءِ ھمینکہ کسان کسانیں ”لہر”آں ھم ٹپاس اِت کن اَنت کہ آ گندگ نہ بنت۔ھمے لہرانی کمک ءَ جھان ءِ ھمینکہ دیر ءُ دراجیں دمگ زانگ ءُ دیم ءَ آرگ بئیگ ءَ اَنت کہ ایشانی بابت ءَ پیسر ءَ انسان نابلد بیتگ۔۔

اے گپانی دیم ءَ آیگ ءَ پد دگرا بِل ، بلے ھما مسلمان ، یھودی ءُ عیسائی مُلا چی کن اَنت کہ آ گُشنت کہ اے جھان شش روچ ءَ جوڑ بیتگ ، وھدی کہ سائنسدان گُشنت کہ اے جھان ءِ جوڑ بیئگ ءَ کروڈاں سال درکار بیتگ۔۔۔۔۔۔۔۔۔۔

سائنسدان گُشنت کہ جھان سیزدہ کروڈ ءُ ھپتاد سال اِنت کہ جوڑ بیتگ۔۔ وھدیکہ ناسرپدیں مُلا گُشنت کہ شش ھزار سال انت کہ جوڑ بیتگ۔

سائنسدان گُشنت کہ اے زمین ءَ کروڈاں سال اِنت کہ انسان زندگی کنگ اِنت۔ وھدیکہ مُلا گُشنت کہ اولی مردم چار ھزار سال پیش ءِ مسیح ءَ پیدا بیتگیں حضرت آدم اِنت

سلپ (ڈالر ): 26/02/12 > پاکستانی روپیہ 90.911 • ایرانی تمن. 1224• اماراتی درھم3.67 • یورو 0.7436 • برٹش پاونڈ0.6299 • سعودی ریال 3.7492 • بحرینی دینار0.3768 • عمانی ریال 3.6843 • قطری ریال 3.6409 • کویتی دینار 0.2771 • تنزانیا شیل لنگ 1587.6 • اوگانستانی اوگانی48.7

2012-02-27T00:53:00.000+04:00

سلپ ءِ درگت ءَ گیشتر زانگ ءَ جھل ءِ ھکس ءَ کلک کن ۔

سندھو دیش، ریل گاڑی ءِ کِشک گوں تراکناکیں شورھاں پروشگ بیتگ اَنت۔

2012-02-25T14:02:00.002+04:00

کراچی: سندھو دیش ءِ بازیں دمگاں ”ریلوے ٹریک” گوں تراکناکیں شورھاں تراکینگ بیتگ اَنت، پاکی قبضہ گیریں پولیس ءِ ردا ریل گاڑی ٹریکانی سرا چاردہ تراک بیتگ۔ چر ایشی ءَ باز تاوان بیتگ۔ ریل گاڑی اوشتارینگ بیتگ اَنت۔ وھدیکہ دومی سندھو دیش ءِ سلاہ بندیں گل ”سندھودیش لبریشن آرمی” ءَ تراکانی ذمہ واری منّ اِتگ۔

”آئن اسٹائن” ءِ پروش دیگ تہ انگت پد نبودیں ھیالے۔۔سائنسدان

2012-02-25T00:08:00.002+04:00

نومبر 2011 ءَ سائنس داناں ھمے گپ شنگ کُتگ اَت ما ماں تجربہ گاھاں رُژن ءِ گام ءَ چہ تیزتریں ”ذرات” شوھاز اِتگ۔ پمیشا آھاں آئن اسٹائن ءِ اے لیکہ رد گُشتگ اَت کہ گیدی ءِ تیزگامیں چیز رُژن اِنت۔ بلے سائنسداناں یک رندی پدا اے گپ ءِ راستی من اِتگ کہ ردی چہ ما بیتگ، واجہ آئن اسٹائن ءِ لیکہ تہ انگت وتی جاہ ءَ راست ءُ برجاہ اِنت۔۔
ماں یورپ ءَ چیر زمینی تجربہ گاھے ءِ زانوگراں ھمے گپ دیم ءَ آؤرتگ اَت۔ ما ٹپاسگ ءِ وھد ءَ گوں انچیں ”ذرات” آں گوں دوچار کپتگ اِنت کہ آ رُژن ءِ گاماں چہ تیز تر سفر کُت کن اَنت۔ بلے آھاں یک رندی پدا اے گپ من اِتگ کہ ما رد بیتگ اِنت۔ آئن اسٹائن راست۔۔۔۔۔۔۔۔۔۔۔۔۔۔۔۔
نوکیں دور ءِ گیشتر نوکیں سائنسی جوڑشت (ایجاد) آنی بُنیاد آئن اسٹائن ءِ لیکہ ”اضافیت” ءِ سرا مِک اِنت۔ بلے گوستگیں سال ءَ سائنسدانانی ھمے گپ ءَ سرجمیں دُنیا ابکہ ءُ ھیران کُت کہ آئن اسٹائن ءِ لیکہ رد اِنت۔
1905 ءَ آئن اسٹائن ءَ ھمے لیکہ دُنیا ءِ دیم ءَ آؤرتگ اَت کہ دُنیا ءِ تیزگامیں چیز بس رُژن اِنت۔ رُژن ءَ چہ تیزتریں چیز بیت نہ کنت۔ (1928 ءَ وھدی آئن اسٹائن یک یونیورسٹی ءَ لکچر دیگ ءَ بیت تہ یک اسٹودنٹے آئی ءَ ھال دنت کہ تئی لیکہ ”اضافیت” چکاسگ ءِ دوران ءَ سائنسداناں راست ثابت کُتگ، تا آ بس ھمے پسہ ءَ دنت کہ ۔
”منی خُدا من ءَ دروگ بند نہ کنت”
بلے گوستگیں سال ءَ سائنسداناں ھمے گپ دیم ءَ آؤرتگ اَت کہ ٹپاسگ ءِ وھد ءَ ھمے نشوندھی رستگ کہ کسان کسانیں ذرہ ”نیوٹرینو” چہ رُژن ءَ ھم تیزتریں گاماں سفر کُت کنت، پمیشا اے ناداں آئن اسٹائن ءِ لیکہ ”اضافیت” رد گُشتگ اَت،
سائنسدانانی ھمے گپ ءَ دُنیا ھبکہ ءُ پریشان کُتگ اَت۔ چیا کہ نوکیں دور ءِ سرجمیں سائنسی چار ءُ ٹپاس آئن اسٹائن ءِ ھمے لیکہ ءِ بُنیاد ءَ کنگ بیتگ اَنت۔
بلے یک رندی پدا سائنسی ھالتاک ”سائنس ان سائیڈر” ءِ یک رپورٹے ءَ ھمے گُشگ بیتگ کہ ”نیوٹرینو” ءِ تیز گامی ءِ نشان داتگیں ردی چہ ”جی پی ایس” ءُ کمپیوٹر ءِ میان ءَ لنک ءِ ھرابی ءِ سوب ءَ بیتگ ءُ آئن اسٹائن ءِ لیکہ ءِ راستی تہ انگت برجاہ اِنت۔
آئن اسٹائن جرمنی ءَ ودی بیتگ۔ آئی ءِ پت ءُ مات یھودیت ءِ منوگر بیتگ اَنت۔ آئن اسٹائن ءَ یک خُدا ءِ سرا بھیسہ بیتگ، آ یھودی مذھبی لیکھانی پابندیں مردمے بیتگ۔ پمیشا ایڈولف ھٹلر ءِ وھد ءَ آ بازیں وھدی ءَ زندان ءَ ھم بیتگ۔ رند ءَ آ ماں امریکا ءَ جاہ منند بیتگ۔ آ وانگ ءَ ھم اینکہ زبریں نودربرے نہ بیتگ۔ بلے آئی ءَ بازیں سائنسی لیکہ دیم ءَ آؤرتگ کہ رندا راست گُشگ بیتگ اَنت۔۔آئی ءِ پیش کُتگیں لیکھانی بُنیاد ءَ ایٹم بم ھم جوڑ کنگ بیتگ۔ سائنسی دُنیا ءِ اے ٹوھیں مرد 1955 ءَ بیران بیتگ۔ بلے مرچی پنجاہ ءُ شش سال ءَ رند نوکیں سائنس ءَ اے گپ ءِ راستی یک رندی پدا من اِتگ کہ آئن اسٹائن تہ انگت سائنسی دُنیا ءِ سرا بادشاھی کنگ اِنت۔۔۔۔۔۔۔۔

بلوچ ورناہ گوں تپاکی ءُ ھم پَتی ءَ آجوئی جُنز ءَ ھوار بہ بنت۔ نورالدین مینگل

2012-02-24T15:31:00.002+04:00

لندن:بلوچ رھشون نورالدین مینگل ءَ گُشتگ بلوچ راج اے مُلک ءَ گوں ھوار نِشت نہ کنت۔ بلکیں بلوچ راج ءِ وش ھالی گوں آزاد ءُ یونائیٹڈ بلوچستان ءَ بندوک اِنت۔ راجی آجوئی ءَ ابئید دگہ ھچ وڑیں رھبند پش نہ کپتگ، پاکی استان بلوچستان ءَ وتی دزمانجنی ءَ بند بہ کنت۔ بلوچ وتی فیصلہ ءَ وت کن اَنت۔ بلوچستان کدی پاکی استان ءِ بھر نہ بیتگ۔ بلوچ ءَ ھر دؤر ءُ ھر زمانگ ءَ پاکی ایردستی ءِ ھلاپ ءَ جنگ کُتگ۔ پاکی استان بے دلیں فوج پہ بلوچ جُھد ءِ ایرموش کنگ ءَ ھر وڑیں زلم ءُ زوراکی کنگ اِنت، بلوچ ورناھانی آوار جنگ ءُ آھانی ٹپ ءُ ٹوریں لاشاں ماں ویرانیں دگاں دؤر دیگ ءَ ھوار ، زھگ ءُ زالبولاں ھم شھید کنگ اِنت۔ شھری آبادیانی سرا بمب گواری کنگ اِنت۔ بلوچ رھشون ءُ زانتکاراں ٹارگٹ کنگ اِنت۔
آئی ءَ ماں امریکی کانگریس ءَ پیش بیتگیں بِل وش اَتک کنان ءَ گُشتگ کہ بلوچ ورناھانی قُربانیانی برکت ءَ مرچی بلوچ راجی توار میان استمانی تکاں سر بیتگ۔ چر ایشی ءَ چہ پاکی استان ءُ آئی ءِ دپ چٹیں مزھبی گنوک پریشان اَنت۔ آ ایشی ءَ پاکی استان ءِ تھی توکی جیڑھاں دزمانجی ءِ نام ءَ دینت، آ ھمے بہ گُشنت کہ اے پاکی استان ءِ تھی جیڑھانی تھا دزمانجنی اِنت ۔پاکستان پرچا دگہ ملکانی تھی توکی معاملہ آں دزمانجی کنت۔ اگاں اے میان استمانی رھبندانی ھلاپ ورزی اِنت تا اے ھلاپ ورزی پاکی استان ءَ ھما وھد ءَ کُتگ کہ آئی ءَ پہ زور بلوچ آزادیں استان ءِ سرا قبضہ کُتگ۔
آئی ءَ گُشتگ بلوچ پہ راجی آجوئی ءِ ھاترا دُنیا ءِ ھر قوت ءَ کمک زُرت کنت، چیاکہ اے راجی جنگے، ذاتی ءُ ٹکی جنگے نہ اِنت۔ آئی ءَ گُشتگ پاکی استان انڈیا ءُ اوغانستان ءِ تھی ءُ توکی جیڑھاں دزمانجی کنگ اِنت۔ اوغانستان ءَ آ کالونی ءِ بستار ءَ کارمرز کنگ لوٹیت۔ ماں برطانیہ ءَ ناشرکاری ءِ ارشاں پاکی استان ءِ دست ھوار اِنت۔ میان استمانی ناشرکار داں بازیں وھدی ءَ آئی۔ایس۔ آئی ءِ پناہ ءَ نشتگ، یک نیمگے پاکی استان ماں کشمیر ءُ فلسطین ءَ راجی وتواکی ءِ پلہ مرزی ءَ کنت ، دومی نیمگ ءَ بلوچ راجی وتواکی ءَ آ تھی توکی جیڑھاں گوں دزمانجی یے سرپد بیت۔
آئی ءِ گُشتگ یو۔این۔او ءِ رھبندانی تھا ھر راج ءَ اے حق است اِنت کہ وتی راجی وتواکی ءَ برجاہ بہ دارنت۔ آئی ءَ گُشتگ ھما بلوچ کہ گوں پاکی استان ءَ ھوار اَنت، آ ماں بلوچ راج دپتر ءَ غدارانی نام ءَ زانگ بنت، آئی گُشتگ انجو کہ پاکی استان وتی قبضہ برجم دارگ ءَ وتی گیشیں زور ءَ کارمرز کنگ اِنت، بلوچ ورناھاں ھم لوٹیت کہ آ یک مُشت بہ بنت ءُ وتی جھد ءَ دیم ءَ بہ بر اَنت ءُ پاکی استان ءِ ھلاپ ءَ وتی جنگ ءَ تیز بہ کن اَنت، دانکہ پاکی فوج مان بیرکانی تھا ھم تُرس آماچ بہ بیت۔ پاکی استان ءِ سرجمیں مُلا ءُ سیاست دان پہ بلوچ ءِ بیگواہ کنگ ءَ یکمُشت اَنت۔ ایشاں زار ءُ چیھال اِنت کہ بلوچستان مئے دست ءَ رؤگ اِنت ، بلے ایشاں بلوچستان ءِ غم پِر نہ اِنت بلکیں ایشاں بلوچ ءِ مال ءُ مڈیانی غم اِنت کہ ایشانی دست ءَ در کپگ ءَ اَنت۔پاکی قبضہ گیریں گل کہ یک مُشت بیت کن اَنت گُڑا بلوچ وتی راجی آجوئی ءِ ھاترا پرچا یک مُشت مہ بیت؟
بلوچ رھشون ءَ گُشتگ کہ اے جاورھالاں مارا آ گپ پٹگ ءُ شوھاز کنگی نہ اَنت کہ چر ایشانی سوب ءَ ما یکے چہ دومی ءَ دیر ءُ گِستا بہ بئیں۔ بلکیں مارا ھما نقطہ آنی سرا چار ءُ تپاس کنگی اِنت کہ ا مارا یکے گوں دومی ءَ تپاک ءُ ھم پَت کن اَنت۔

جاوید مینگل ءَ گوں براھمدگ بگٹی ءَ گِند ءُ نِند کُتگ،

2012-02-24T14:22:00.002+04:00

سوئٹزرلینڈ: بلوچ رھشون جاوید مینگل ءَ ماں سوئٹزرلینڈ ءَ بی۔آر۔پی ءِ رھشون واجہ براھمدگ ءَ گِند ءُ نند کُتگ۔ دوئیں رھشوناں بلوچستان ءِ جاورھالانی سرا گپ ءَ تران کنان ءَ گُشتگ کہ مرچیگیں ھالتاں بلوچ راجدوست یک مُشت ءُ تپاکی ءَ گوں آجوئی ءِ جنز ءَ دیم ءَ بہ بر اَنت۔

کیچ، گوادر فراز کریم ءُ فیصل بشیر ءِ شھادت ءِ ھلاپ ءَ زھرشانی،

2012-02-24T13:32:00.001+04:00

کیچ: ھالانی ردا شھید فراز کریم ءُ فیصل بشیر ءِ شھادت ءِ ھلاپ ءَ مرچی بی۔این۔ایم ءِ جار ءِ پدا کیچ ءُ پنجگور ءُ دگہ بازیں دمگاں سیمی روچ ءَ ھم زھرشانی برجاہ اِنت ءُ سرکاری ءُ السی کارجاہ بند کنگ بیتگ اَنت، وھدیکہ گوادر ءُ دگہ بازیں دمگاں بلوچ ورناھانی آوار جنی ءُ آھانی ٹپ ءُ ٹوریں میتانی دزکپگ ءِ ھلاپ ءَ بی۔این۔پی (مینگل) ءِ جار ءِ پدا زھرشانی کنگ بیتگ۔

شام، جنگ ءُ چوپ ءَ شست مردم بیران بیتگ،

2012-02-24T13:15:00.000+04:00

شام: انسانی حق ءِ گلانی ردا شام ءِ شھر حمص ءَ گوستگیں روچ ءَ شامی فوج ءُ یاگیانی میان ءَ جنگ ءُ چوپاں شست مردم بیران بیتگ، انسانی حقانی کارندھانی گُشگ اِنت کہ بیران بیتگیں مردمانی کچ گیشتر ھم بیت کنت، بلے شامی فوج شھر ءِ بازیں دمگاں رؤگ ءَ مکن کنگ اِنت۔

پاکی ایجنسیانی دست ءَ آوار جتگیں حنیف بلوچ گِس ءَ سر بوتگ،

2012-02-24T12:02:00.003+04:00

گوادر: ھالانی ردا بی۔این۔ایم گوادر ھنکین ءِ رھشون حنیف بلوچ مرچی گس ءَ سر بوتگ۔ حنیف بلوچ دوماہ پیش پاکی چیریں ایجنسیاں آوار جتگ اَت ءُ گار ءُ بیگواہ کُتگ اَت۔

مشکے ءَ یک سرکاری مخبرے کُشتگ، دودا بلوچ

2012-02-23T23:53:00.004+04:00

مشکے: بلوچ سلاہ بندیں گل بی۔ایل۔ایف ءِ جارکش دودا بلوچ ءَ فون کنان ءَ گُشتگ کہ مئے سرمچاراں مشکے ءَ مبارک نامیں مردے کُشتگ، اے مرد مخبری ، دُزی ءُ دگہ بازیں چاگردی ھراب کاریاں ھوار بیتگ۔ ما آ دگہ بلوچی راہ ءَ چہ جستگیں بلوچاں یک رندی پدا گُشگ لوٹیں کہ آ وت ءَ بلوچ دُژمن کار کرداں دیر بِدار اَنت۔ اگاں نہ گُڑا نشانگ بنت۔۔۔

قدیر بلوچ پاکی پولیس ءَ دزگیر کُتگ۔

2012-02-23T16:40:00.001+04:00

کراچی: ”وائس فار بلوچ میسنگ فرسنز” ءِ رھشون، شھید جلیل ریکی ءِ پِت قدیر بلوچ گوں دگہ ھمراھاں مرچی کراچی ءَ زالمیں پاکی استان ءِ پولیس ءَ دزگیر کُتگ۔

مند سورو ءَ ناشناسیں مردمانی تیرگواری ءَ چہ یک مردمے بیران بیتگ۔

2012-02-23T01:01:00.004+04:00

بام ھال: ھالانی ردا مرچی نیم روچ ءَ رند ماں مند ءَ ناشناسیں مردماں تیرگواری کُتگ۔ چر اے تیرگواری ءِ آسر ءَ باقی مراد محمد بلوچ بیران بیتگ۔ باقی مراد محمد بابو یعقوب ءِ تری زتک اِنت کہ چر ایشی ءَ پیش بابو ءِ سرا چار بر ءَ اُرش بیتگ۔ بلے بابو چر اے اُرشاں رک اِتگ،ءُ آئی ءِ گروپ ءِ دو کارندہ بیران بیتگ، وھدی کہ بابو ءِ سرا دو اُرشانی ذمہ واری بلوچ سلاہ بندیں گل بی۔ایل۔ایف ءَ منّ اِتگ اَنت۔

ایرانی لشکر ءَ پنچ بلوچ شھید کُتگ

2012-02-22T22:38:00.000+04:00

بام ھال:ایرانی ایردستیں بلوچستان ءِ دمگ لاشار ءَ ایرانی قبضہ گیریں لشکر ءَ زالبول ءُ زھگاں ھوار پنچ بلوچ شھید کُتگ، آھانی تھا عبداللہ بلوچ ، آئی ءِ لوگبانک ، سئے زھگ ءُ یک نماسگے ھوار اَنت۔

راجی آجوئی ءَ ابئید دگہ ھچ رھبند ءِ سرا گپ جنگ نہ بیت۔ بلوچ رھشون نواب براھمدگ بگٹی

2012-02-22T13:29:00.002+04:00

بلوچ رھشون نواب براھمدگ بگٹی ءَ کوئٹہ رسانکی کارگس ءَ تران کنان ءَ گُشتگ کہ راجی آجوئی ءَ ابئید دگہ ھچ رھبند ءِ سرا گپ جنگ نہ بیت۔ شش سالیں ماں بلوچستان ءَ یک شلا فوجی اپریشن بیئگ اِنت، دو سالیں کہ بلوچ چُک چینی برجاہ اِنت ءُ ورناھانی ٹپ ءُ ٹوریں لاش کپگ ءَ اَنت۔ اے۔پی۔سی بلوچ جیڑہ ءِ سرا لوٹائینگ بیئگ ءَ نہ اِنت ، اے۔پی۔سی ءَ ھما مردم لوٹائینگ ءَ اَنت کہ بلوچ کُشت ءُ کوش ءِ ذمہ وار اَنت، چیاکہ نو بلوچستان ءِ جیڑہ نہ، بلکیں پاکی استان ءِ سلامتی ءِ جیڑہ ایشانی دیم ءَ اَتکگ۔ نواز شریف بلوچ ءِ غم ءَ نہ گِپتگ بلکیں وتی سیاسی نپانی تحفظ ءَ کنگ اِنت۔ بلوچ وتواکی ءِ بابت ءَ امریکی کانگریس ءِ منگ نامہ جوانیں گامگیجی، منگ نامہ ءِ مکمل پلہ مرزی ءَ کناں، منگ نامہ ءِ پیش بئیگ ءَ پد نو پاکی سیاست دان بلوچ ءِ غم ءَ گپتگ اَنت۔ آئی ءَ گُشتگ منی بابت ءَ گوں سرکار ءَ ڈیل ءِ گپ دروگ اَنت۔ راجی آجوئی ءَ ابئید دگہ رھبندانی سرا گپ جنگ نہ بیت۔ بلوچ رھشون وتی ذاتی نپ ءُ فائدگاں یل بہ کن اَنت ءُ بلوچ راجی آجوئی ءِ جُنز ءَ ھوار بہ بنت۔

بلوچ رھشون براھمدگ بُگٹی باندا کوئٹہ پریس کلب ءَ ٹیلیفونک تران کنت۔

2012-02-22T01:16:00.000+04:00

بام ھال: بلوچ رھشون ، بی۔آر۔پی ءِ صدر واجہ براھمدگ بگٹی باندا سُھب ءِ دوازدہ بج ءَ ماں کوئٹہ پریس کلب ءَ ٹیلیفونک تران کنت۔

سرمچار فراز کریم ءُ فیصل بشیر ءَ سلام پیش کنیں، چار غدار کُشتگ اَنت۔ دودا بلوچ

2012-02-22T00:34:00.004+04:00

کیچ: بلوچ سلاہ بندیں گل بی۔ایل۔ایف ءِ جارکش دودا بلوچ ءَ بلوچ راجی شھید بلوچی زبان ءِ ورناھیں شاعر فراز کریم ءُ فیصل بشیر ءِ پہ راجی آجوئی ءِ ھاترا جُھداں سلام پیش کنان ءَ گُشتگ کہ بلوچستان لبریشن فرنٹ پاکی استان ءِ پولیس ءَ ھمے بیھار ءَ دنت کہ آ ماں پنجگور ءِ کش ءِ گور ءِ ھلکاں تر ءُ تاب مہ کن اَنت، اگاں نہ گُڑا الم نشانگ جوڑ بنت۔ آئی ءَ گُشتگ پیش ءَ ما ھمے سرپد بیتگ اِنت کہ اے ھندی ملازم اَنت۔ بلے نو اے پیش کپتگ ءُ مئے سرمچارانی سرا ارش کُتگ ،چر ایشی ءَ آھانی یک کارندھے ھم مُرتگ ۔ ما پدا ھمے گُشگ لوٹیں ارش کنوکیں کارندہ بخشگ نہ بنت۔ آئی ءَ گُشتگ لھتے روچ پیش آئی۔ایس۔آئی ءِ لھتے کارندہ دزگیر کنگ بیتگ ، آھاں اے گپ من اِتگ کہ مارا بلوچ سرمچارانی چاروگری ءَ دیم دیگ بیتگ۔ پمیشکہ اے ما کُشتگ اَنت کہ آھانی تھا ناصر غلام نبی (شیھانی نگور) ، عبدک کلیر (شیھانی گوھرگ)، منیر دوست محمد ءُ عبدک (نگور) ھوار اَنت، دودا بلوچ ءَ چہ بلوچ راج ءَ دزبندی کُتگ کہ آ ماں کوھاں شکار ءِ ھاترا میا اَنت۔ چیاکہ دُژمن وتی ھندی دلاراں شکار ءِ نام ءِ سرا کوھاں دیم دیگ اِنت۔

پاکی چینل ءِ مراگش ءَ بلوچی کلچر ءَ ردیں رنگے ءَ پیشدارگ دلپدردیں گپے، بلوچ کواس صبور بلوچ

2012-02-21T23:06:00.000+04:00

کوئٹہ: بلوچ کواس عبدالصبور بلوچ ءَ ھندی بلوچی چینل ءَ تران کنان ءَ گُشتگ کہ پاکی ٹی۔وی پروگرام ءَ بلوچ کلچر ءَ بدیں رنگے ءَ پیشدارگ پہ بلوچ راج ءَ باز دلپدردیں گپے زانگ بیت۔ بلوچ دُنیا ءُ جھان ءِ سرجمیں کلچر ءُ زبانانی شرپ ءَ کنت ، بلے کس ءَ اے اجازت ھم دیگ نہ بیت کہ آ بلوچ کلچر ءِ شرپ ءَ لگتمال بہ کن اَنت۔ اے کرد ءَ ھمینکہ ایر بہ جنئے کم اِنت۔ وش ٹی۔وی ءِ جُھد ستا کرزنت کہ آئی ءَ اے پژگرد (ردعمل) ءَ گامگیج زُرتگ۔ اے کرد شعوری صورت ءَ کنگ بیتگ۔ چیاکہ اگاں راجی حتم کنگی اِنت تا جسمانی صورت ءَ آئی ءِ مردمانی کُشگ ءَ ھتم نہ بیت، آئی ءِ کلچر ءَ ھتم کن۔۔۔۔۔۔۔۔۔۔۔۔۔۔ اگاں راجی ءِ اجتمائی ءُ چاگردی رویہ آں زانگ لوٹئے تا آئی ءِ کلچر زانگ لوٹیت۔ ایشی ءَ چہ ھمے زانگ بیت کہ مرچی ماں میان استمانی تکاں بلوچ ءِ حق ءَ آوازے چست بیئگ اِنت اے کار پہ شعوری ءُ ردعملے ءِ صورت ءَ کنگ بیئگ ءَ اَنت۔ آ پہ بلوچ کلچر ءِ ھتم کنگ ءَ وتی جُھداں جاری دار اَنت اے دیم ءِ مردماں گوں کار داریت کہ چنکہ ایشانی گپاں زیریت۔ بلوچ راج گوں وتی کلچر ءِ ھُنڈالاں ھمینکہ بندوک اِنت کہ اگاں انفرادی صورت ءَ بلوچ ھراب گُشگ بہ بیت تا برداشت کنگ بیت، بلے اجتمائی ارش برداشت نہ بیت۔ بلوچ راج اے عمل ءِ ھلاپ ءَ گیش ءَ چہ گیش ”ری زیسٹ” بہ کنت۔ مرچی ماتی زبانانی میان استمانی روچ اِنت کہ اے عمل کنگ بیتگ۔ ماں جھان ءَ ماتی زبان ءِ یک مزنیں بستارے۔ (اے ھمینکہ بہ کن اَنت) مرچی نہ باندا میان استمانی تکاں اے گپ الم دیم ءَ آرگ بیت۔

پاکستان بلوچ شھیدانی رِتکگیں ھوناں ذھنی نادراہ جوڑ کُتگ۔

2012-02-21T01:54:00.001+04:00

بام ھام: ناپاک استان ءُ آئی ءِ وتگڑیں چیریں ایجنسیانی کارندہ بلوچ شھیدانی رِتکگیں ھوناں ذھنی نادراہ جوڑ کُتگ اَنت۔ مرچی ناپاک آئی۔ایس۔آئی ءِ پیشی سربراہ حمید گُل ءَ گپ گپ ءِ سرا اے گپ منّ اِتگ کہ آئی۔ایس۔آئی ءَ شھید سردار زادہ اسد جان مظفرآباد ءِ دلائی کیمپ ءَ شھید کُتگ، ایشی ءَ چہ پیش بلوچ راج ءَ الم اے گپ زانتگ کہ اسد جان آئی۔ایس۔آئی ءَ شھید کُتگ بلے اے گپ کس ءَ نہ زانتگ کہ شھید اسد جان کُجام جاہ ءَ شھید کنگ بیتگ۔ بلے ایشی ءَ چہ پیش پاکی استان ءَ اے گپ ءِ راستی نہ منّ اِتگ۔

سنگت فراز کریم شھید کنگ بوت

2012-02-21T01:31:00.004+04:00

بام ھال ،، ھالانی رِدءَ مرچی پنجگورے دمگ سرادُکے ھندءَ بلوچی زبان ءِ نامئیں شاعر ءُ بی آر پی ءِ باسک سنگت فراز کریم پاکستانی پولیس ءِ دست ءَ جنگ بوتگ ، شھید فراز کریم ءِ تعلق چہ گرمکان پنجگور ءَ اِنت

سنگت فراز کریم شھید کنگ بوت

2012-02-21T01:31:00.002+04:00

بام ھال ،، ھالانی رِدءَ مرچی پنجگورے دمگ سرادُکے ھندءَ بلوچی زبان ءِ نامئیں شاعر ءُ بی آر پی ءِ باسک سنگت فراز کریم یک پاکستانی پولیس ءِ دست ءَ جنگ بوتگ ، شھید فراز کریم ءِ تعلق چہ گرمکان پنجگور ءَ اِنت

ازرائیلی فوج ءَ ملک ءِ بازیں دمگاں ”آئرن ڈوم” نامیں دفائی سسٹم ءِ جنگ بندات کُتگ

2012-02-20T15:43:00.002+04:00

یروشلم: ھالانی ردا ازرائیلی فوج ءَ مُلک ءِ بازیں شھراں نوکیں دفاعی سسٹم ”آئرن دوم” جتگ اَنت۔ اے سسٹم ازرئیلی شھر تل ابیب ءُ دگہ بازیں سیمسری ھنداں جنگ بنت۔ ”آئرن ڈوم” بیٹری سسٹم ماں کش ءُ گور ءِ دمگانی ھرابیں جاورھال ءُ ماں ایرانی اٹامک بُنجلانی سرا ازرائیلی ارش ءِ پشگرد ءَ جنگ بیتگ اَنت۔ زانتکارانی ردا اے سسٹم ءِ جوانی اِش اِنت کہ کُجام ملکی ءِ نیمگ ءَ اگاں ازرائیل ءِ سرا میزائل ارش ءِ پیش بندی بہ بیت گُڑا ھمے سسٹم ءِ وسیلت ءَ آ میزائل ھما کار بندوکیں مُلک ءِ سیمسراں تراکینگ بنت او چر ایشی ءَ ازرائیل ءَ ھچ وڑیں تاوان رست نہ کنت، بلکیں ھما کارمرز کنوکیں مُلک تاوان بار بنت۔ اے سسٹم ءَ چہ ابئید ازرئیلی فوج ءِ گورا دگہ ھم بازیں ڈلیوری سسٹم ھم است اِنت کہ آ دُژمن مُلکانی نیمگ ءَ کجام وڑیں پیش بندی ارشاں چہ ازرائیل ءَ رکینت کن اَنت۔ ایشی ءَ ھمے زانگ بیت کہ ایران گوں نیم بُندگیں ”ایٹمی پروگرام” ءَ ازرائیل ءَ ھچ وڑیں تاوان دات نہ کنت او ایران وتی جتگیں چات ءَ وت کپیت۔

عیسائی رھشون ڈاکٹر نزیر احمد بھٹی ءَ بلوچ وتواکی ءِ بل ءِ پلہ مرزی کُتگ۔

2012-02-20T15:02:00.000+04:00

فلاڈیلفیا، امریکہ: ماں امریکا ءَ جاہ منندیں پاکستانی عیسائی رھشون ءُ ھالتاک ”کرسچین پوسٹ” ءِ ایڈیٹر ڈاکٹر نزیر احمد بھٹی ءَ ماں امریکی کانگریس ءَ بلوچستان ءِ بابت ءَ پیش بوتگیں بل ءِ پلہ مرزی کنان ءَ گُشتگ کہ اے ھچ وڑا پاکستان ءِ تھی ءُ توکی جیڑھاں گوں دزمانجی یے نہ اِنت ۔ چیاکہ پاکستان ءَ وت ھر وھد ءَ کشمیری ءُ فلسطینی مسلمانانی وتواکی ءِ ھاترا یو۔این۔او ءُ عالمی مراگشاں توار چست کُتگ، بلے ایشی ءَ انڈیا ءُ ازرائیل ءِ تھی ءُ توکی جیڑھے سرپد نہ بوتگ۔
آئی ءَ ماں امریکی کانگریس ءَ پیش بیتگیں منگ نامہ ءِ سرا پاکستان ءِ اے گپ ءِ سرا کہ اے مئے تھ ءُ توکی جیڑھے ایراد گران ءَ گُشتگ کہ بلوچ راج ءَ ھم دومی راجانی وڑا وتی راجی وتواکی ءِ حق است اِنت۔
آئی ءَ گُشتگ پاکستان ءَ ماں سلامتی کونسل ءُ یو۔این۔او ءِ جنرل اسمبلی ءَ شام ءُ لیبیا ءَ انسانی حقانی ھلاپ ورزی ءِ سرا زار ءُ چیھال کُتگ ، بلے آھاں پرچا ھما بلوچ ورناہ کہ پاکی فوج ءِ دست ءَ شھید بنت ءُ ھما عیسائی برات نظر ءَ نیا اَنت کہ پاکی مُلاھانی دست ءَ زندھاتی سوچگ بنت۔

بلوچ راج گوں تپاکی ءُ یک مُشتی ءَ دُنیا ءِ دیم ءَ وتی قوت ءَ بِہ منّارینیت، بلوچ رھشون جاوید مینگل

2012-02-20T02:15:00.001+04:00

لندن: بلوچ رھشون واجہ جاوید مینگل ءَ ماں امریکی کانگریس ءَ بلوچستان ءِ وتواکی ءِ بابت ءَ پیش بوتگیں بِل وش آتک کُتگ ءُ آئی ءَ امریکی کانگریس مین ڈینا روھرا باکر ءِ منت گران ءَ گُشتگ کہ اے بلوچ راجی شھیدانی قُربانیانی برکت اِنت کہ مرچی بلوچ ءِ آواز دُنیا ءَ سر بیتگ۔ آئی ءَ گُتگ بلوچ پہ زور غلام دارگ بیتگ۔ عالمی مھلوک ءِ اے فرض جوڑ بیت کہ آ چہ اے منگ نامھاں گیشتریں گامگیجی بہ زور اَنت ءُ چر اے ناشرکاریں استان ءِ زلم ءُ زاراکیاں چہ بلوچ راج ءَ بہ رکیننت۔ آئی ءَ گُشتگ پاکی وتگڑیں استان ءَ بلوچ راج غلام داشتگ ءُ بلوچ مال ءُ مڈیاں پُلگ ءُ برگ اِنت۔ ھما کس کہ بلوچ جیڑہ ءَ پاکی استان ءِ تھی ءُ توکی دزمانجی یے گُشنت۔ آھاں اے گپ زانگ لوٹیت کہ بلوچ کدی اے وتگڑیں استان ءِ بھرے نہ بیتگ۔ بلوچستان پہ زور ایردست کنگ بیتگ، پاکی استان وتی قبضہ ءِ برجم دارگ ءَ بلوچانی سرا ھر وڑیں زُلم ءُ زوراکی کنگ اِنت۔ آئی ءَ گُشتگ ھما کس کہ اے منگ نامہ ءِ ھلاپ ءَ گپ کنگ ءَ اَنت ءُ بلوچ راج ءَ غلامی ءِ درس ءَ دئیگ ءَ اَنت آ پنجابی ءِ زر زُرتگیں کاسگ چٹ اَنت ءُ پاکی استان ءِ ایجنڈا ءِ سرا کار ءَ اَنت۔ وزیر اعلیٰ ءِ نیمگ ءَ منگ نامہ ءِ ھلاپ ءَ گپ جنگ ءِ مول ءُ مراد اِش انت کہ آ وتی کرسی ءَ رکینگ لوٹیت ءُ وتی پنجابی واجہ کاراں وش کنگ لوٹیت۔ آ کہ اے منگ نامہ ءِ ھلاپ ءَ گپ جنت تا آ راجدپتر ءَ راج ءِ غدارانی نام ءَ زانگ بیت۔ انگت وھد است کہ ھما بلوچ ءِ پاکی استان ءِ ھمراہ اَنت ءُ راج ءِ سودا ءَ جنگ ءَ اَنت آ ھوش بہ کن اَنت ۔ راجی آجوئی ءِ جُھد ءَ گوں ھوار بہ بنت ، اگاں نہ گُڑا آیوکیں وھد ءَ چہ بلوچ ءِ کھر ءَ چہ نہ رکّ انت۔ آئی ءَ گُشتگ نو وھد اتکگ کہ آجوئی مئے گسانی دروازگانی دپ ءَ سر بیتگ ، بلے بژن بیت کہ لھتے بلوچ انگت پنجابی ءِ رند ءَ کپتگ اَنت۔ لھتے سردار کہ وت ءَ چیف آف جھلاوان ءُ سراوان گُشنت بلے آھانی کرد بس پنجاب ءِ وش کنگ ءُ کُرسی ءِ رکینگ ءِ ھاترا اِنت۔ ما ھما راجی شھید ءُ آھانی سیاد ءُ وارثاں سلام پیش کنیں کہ آھانی قُربانیانی برکت ءَ مرچی بلوچ ءِ توار عالمی ایواناں سر بوتگ۔ آئی ءَ گُشتگ کہ مرچی پاکی سیاست دان ءُ مُلا زار ءُ چیھال کنگ ءَ اَنت کہ بلوچستان مئے دست ءَ در کپگ اِنت۔ ایشاں بلوچستان ءِ غم نہ اِنت بلکیں ھما مال ءُ مڈیانی غم اِنت کہ نو ایشانی دست ءَ چہ در کپگ ءَ اَنت۔ اگاں ایشاں کمے پہ بلوچاں ھمدردی بیتیں گُڑا آ وھد ءَ کُجا بیتگ اَنت کہ بلوچستان گوں ھوناں مینگ بیتگ۔ بلوچ ورناہ ءُ کماش چِست کنگ ءُ ٹارچر کنگ ءَ پد آھانی ٹپ ءُ ٹوریں میت ماں ویراناں چگل دیگ بیتگ اَنت۔ بلوچ مات ءُ گُھار شھید کنگ ءُ آھانی شرپ لگتمال کنگ بیتگ۔ منگ نامہ ءَ پد ماں بلوچستان ءَ فوجی آپریشن یک رندی پدا تیز کنگ بیتگ بلے اے مُلا ءُ سیاست دان بس نشتگ ءُ بلوچ چُک چینی ءِ ندارگ ءَ کنگ ءَ اَنت۔ آئی ءَ گُشتگ مرچی دُنیا ءِ چم بلوچستان ءِ سرا سک اَنت ، او بلوچ راج ءِ ھم اے فرض جوڑ بیت کہ آ پہ راجی آجوئی ءِ ھاترا تپاک ءُ یک مُشت بہ بنت ءُ دُنیا ءِ دیم ئَ وتی راجی تاگت ءَ بہ مناریننت۔۔۔

ایران ءِ سرا ارش ءِ فیصلہ ءَ ما وت کنیں، چیف آف آرمی، ازرائیل

2012-02-19T13:24:00.002+04:00

بیت المقدس: ازرائیل ءِ فوج ءِ سربراہ ءَ گُشتگ ایران ءِ سرا اُرش ءِ فیصلہ ءَ ما وت کنیں، چیاکہ ایران ءِ ”ایٹمی پروگرام” نہ تھنا پہ ازرائیل ءَ، بلکیں پہ دُنیا ءِ سلامتی ءِ ھاترا جیڑھے جوڑ بیتگ۔ پمیشا ایران ءِ سرا ارش ءِ پیش بندی چہ ازرائیلی فوج ءِ نیمگ ءَ کنگ بیت۔

نوکیں ”ٹیکنالوجی” ماں بیگواھی ءِ سیمسراں سر بیتگیں زبانانی دیمروئی ءَ پہ جوانیں کمکے بیت کنت۔سائنسی پٹ ءُ پول

2012-02-19T03:13:00.003+04:00

سائنس(بی بی سی)سائنسدانانی گُشگ ءِ ردا فیس بُک ، یوٹیوب ءُ دانکہ نبشتگی کلوہ ھال ھم پہ گار ءُ بیگواھی ءِ سیمسراں سر بیتگیں زبانانی دوبر زندگ مانگ ءِ سوب جوڑ بیت کنت۔
دُنیا ءِ منتگیں ھپت ھزار زبانانی پنجاہ درسد نوکیں کرن ءِ آھر ءَ داں گار ءُ بیگواہ بنت ءُ آھانی کارمرز کنوک پش نہ کپ اَنت۔

بی بی سی ءِ ردا نوکیں دُنیا ءِ مھلوک گلوبلائزیشن ءِ سرا باز ایراد گِر اَنت بلے نوکیں دُنیا ءِ ”ڈیجیٹل ٹیکنالوجی” کوھنیں دُنیا ءِ کمک ءَ کنگ اِنت۔

پہ درور شمالی دُنیا ءِ ھما ٹک کہ سوشل میڈیا ءِ وسیلت ءَ گوں نوکیں پدریچ ءَ وتی سیادیاں برجاہ دارگ ءَ اَنت۔
سائبریا ءُ منگولیا ءِ مالدارانی گالوار ”ٹوان” ءِ ھاترا ”فون ایپلیکیشن” ٹھینگ بیتگ کہ اے آ زبان ءِ در بروکاں لبزانی راستیں گالواراں گُشیت۔

زنانزانت فروفیسر ڈیوڈ ھیریسن ءِ گُشگ اِنت کسانیں زبان وتی توار ءِ شنگ کنگ ءُ وتی ھستی یے نشوندھی ءَ ”سوشل میڈیا، یوٹیوب ءُ دگہ ٹیکنالوجی کارمرز کنگ ءَ اَنت۔

آئی ءِ گُشگ ءِ ردا اے گلوبلائزیشن ءِ آدینک ءِ دومی دیم اِنت ، ما ھمے اِش کنگ ءَ اِنت کہ گلوبلائزیشن کسانیں ربیتانی بیگواہ بیئگ ءِ سوب جوڑ بیت کنت۔ بلے گلوبلائزیشن ءِ یک جوانیں ٹیکی ءِ اِش انت کہ ھما زبان کہ دُنیا ءِ دیر ءُ گِستائیں ھنداں آھانی گشوکانی کچ پنچ ءُ پنجاہ ءَ سر بیتگ۔ آ ڈیجیٹل ٹیکنالوجی ءِ وسیلت ءَ ماں دُنیا ءِ دگہ ھند ءُ دمگاں پہ وت گوشداروک شوھاز اِت کن اَنت۔

ھیریسن ءِ گُشگ ءِ ردا کمے وھد ءَ پد ماں جھان ءَ ھما زبان پشت نہ کپ اَنت کہ آھانی یک گشوکی پش نہ کپیت۔ بلے ڈیجیٹل ٹیکنالوجی ءُ سوشل پروگراماں باز انچیں زباناں دوبر زند بخشاتگ کہ آ کمے وھد ءَ پیش بیگواھی ءِ سیمسراں سر بیتگ اَنت۔۔

اے پٹ ءُ پول ءَ چہ ھمے زانگ بیت کہ بلوچی زبان ءِ عاقبت باز رُژنا اِنت۔ چیاکہ بلوچی ءِ ماں اے دُنیا ءَ لکھانی کچ ءَ کارمرز کنوک اَست اَنت ءُ بلوچی ڈیجیٹل ٹیکنالوجی ءِ وسیلت ءَ وتی توار ءَ دومی ھند ءُ دمگاں ھم سر کنگ اِنت۔( بلوچی سبز ءُ میزران بات)

ما گریٹر ناں بلکیں یونائیٹڈ بلوچستان ءِ آجوئی ءِ ھاترا کار کنگ ءَ اِنت۔ خیر بیار مری

2012-02-18T22:56:00.000+04:00

لندن(وش نیوز)بلوچ رھشون واجہ خیر بیار مری ءَ ھندی بلوچی چینل ءَ تران کنان ءَ گُشتگ کہ ماں امریکی کانگریس ءَ بلوچستان ءِ بابت ءَ منگ نامہ باز جوانیں گپے، اے مئے نہ بلکیں شھید غلام محمد، جلیل ریکی ءُ قمبر چاکر ءُ ھما کُلیں شھیدانی کہ آھاں پہ ماتیں زمین ءِ ھاترا وتی گھگیریں سر ندر کُتگ ، رتکگیں ھونانی برکت اِنت کہ مرچی دُنیا ءَ اے گپ مارتگ کہ بلوچ یک راجی ءُ آئی ءِ واک ءُ اختیار پُلگ بیتگ اَنت ءُ او بلوچ ءِ آواز مرچی میان استمانی تکاں سر بیتگ۔ آئی ءَ گُشتگ ما گریٹر بلوچستان ءِ نہ بلکیں یونائیٹڈ بلوچستان ءِ ھاترا کار کنگ ءَ اِنت، اے پاکستان ءِ پروپیکنڈھے کہ آ گُشیت بلوچ ءِ جیڑہ تھی توکی جیڑھے ، بلکیں بلوچستان ءِ سرا زور قبضہ کنگ بیتگ ءُ دُزاں بلوچستان بھر کُتگ ءُ بخشاتگ۔ بلوچ روچ ءِ ھما روچی وتی راجی آجوئی ءِ ھاترا جُھد کنگ اِنت۔ دُژمن ءَ ماں بلوچستان ءَ فرقہ واریت ءُ ملائیت ءُ بنیاد پرستی ءِ ردوم دیگ ءِ جُھد کُتگ ، ھر وھد ءَ کہ ماں بلوچستان ءَ راجی آجوئی ءِ ھاترا جُنزے بنا بیتگ تا آ جُھد کاراں پہ دروگ کمیونسٹ ءُ کافرے ءِ نام دیگ بیتگ ۔ آئی ءَ گُشتگ بلوچ یک سیکولر راجی۔ مرچی ھمے سیکولر تب ءَ یک رندی پدا دُنیا وتی نیمگ ءَ دلگوش کُتگ۔ آئی ءَ اسلم رئیسانی ءِ اے گپ ءِ کہ” منگ نامہ پاکستان ءِ تھی جیڑھانی سرا دزمانجی ئے” سرا ایراد گران ءَ گُشتگ کہ رئیسانی ءِ بلوچیت چہ ھمدا زاھر بیت کہ ماں بلوچستان ءَ بلوچ مات ءُ گُھارانی شرپ لگتمال بیت، بلوچ مات ءُ گُھار چہ گِساں چِست کنگ بنت ءُ ماں ٹارچر سیلاں ٹارچر کنگ بنت ، بلوچ ورناھانی جتگ ءُ چُپتگیں لاش ماں ویراناں چگل دیگ بیئگ ءَ اَنت ، اے رئیسانی ءِ نظر ءَ نیا اَنت بلے امریکی کانگریس ءِ منگ نامہ آئی ءِ نطر ءَ کیئت۔

مری بولک ءِ دو چوکیدار بیگواہ کنگ بوتگ

2012-02-18T20:15:00.002+04:00

بام ھال ،، ھالانی ردا بلوچ نشنل وائس ءِ جارچینءَ گُشتگ ات ۔ گوستگیں روچاں مری بولک ءِ دو چوکیدار بیگواہ کنگ بوتگ ، جارچینءِ گُشگ اِنت کہ اے بلوچانی گار ءُ بیگواہ کنگ ءَ پاکستان ءِ چیریں اداراھان ھور شفیق مینگل ءِ دست ھوار اِنت ،چم دستیں مردمانی گُشگ اِنت ، دو سیاہ شیشگیں گاڑیان پاکستانی چیریں ادراھانی مردم گوں شفیق مینگل ءِ سلح بندیں مردمانی ھمراھی ءَ اتکگ آں ، مری بولکءِ دو مردم اش بیگواہ کُتگ گوں وت بُرتگ

کانگریس ءِ تھا منگ نامہ پاکستان ءِ تھی جیڑھاں گوں دزمانجنی اِنت۔ بمبو شمبو اسلم رئیسانی

2012-02-18T16:34:00.000+04:00

کوئٹہ:اسلم رئیسانی ءَ گُشتگ ماں امریکی کانگریس ءَ بلوچستان ءِ وتواکی لوٹ ءِ سرا منگ نامہ پاکی تھی توکی جیڑھاں دزمانجنی یے برابر اِنت۔ اے منگ نامہ میان استمانی رھبندانی ھلاپ ورزی ءِ درچ ءَ کئیت۔ پاکستان اے درگت ءَ چہ امریکا ءَ احتجاج بہ کنت ءُ امریکا ھم وتی سنیٹراں چہ پاکستان مخالف سرگرمیاں مکن بہ کنت، اگاں نہ گُڑا من بمبو شمبو کناں۔۔۔

بلے اے بیچارگ چی بہ کنت؟ اے زانت کہ من ءَ آزادی ءَ رند بلوچ بٹ ءُ گوشت نہ دیاں۔

ڈیرہ بگٹی ءَ بمب اُرش ءَ سئے پاکی ایف سی کارندہ مُرتگ اَنت

2012-02-18T14:56:00.001+04:00

ڈیرہ بگٹی: ھالانی ردا بلوچستان ءِ دمگ ڈیرہ بگٹی ءَ پاکی ایف سی ءِ گاڑی ءِ سرا ناشناسیں مردماں بمب ارش کُتگ۔ چر اے ارش ءَ سئے ناپاک ایف سی کارندہ مُرتگ اَنت ءُ پنچ زخمی بیتگ۔ یک گاڑی ئے پرشتگ ءُ تباہ بیتگ۔

واشنگٹن: امریکی جھگیر دیوان ءَ مسام پیش کنگ بوتگ کہ بلوچاں ھم آزادیں ملکے ءِ حق ھست

2012-02-17T23:44:00.001+04:00

واشنگٹن : امریکی جھگیر دیوان ءَ پہ بلوچستان ءِ آجوئی ءِ منگ ءَ مسامے ( قرارداد) پیش کنگ بوتگ آئی ءِ تہ ءَ گوشگ بوتگ کہ بلوچ مھلوک ءَ پہ وتا آزادیں ملکے جوڑ کنگ ءِ حق ھست ۔ امریکی جھگیر دیوان ءِ باسک ءُ کانگریس ءِ راھشون ڈینا روھراباکر ءَ بلوچستان ءِ آجوئی ءِ درگت ءَ مسام پیش کرتگ ۔ مسام ءِ گالانی تہ ءَ گۤوشگ بوتگ کہ بلوچ مھلوک ءَ پہ وتا آجوئیں ملکے ءِ حق ھست ۔بلوچ پاکستان ءِ تہ ءَ سیاسی ءُ پدریچی ھساب ءَ ڈلگچار اَنت۔ آچَہ دادگس ءِ پرمان ءَ دَر کشگ بوگ ءَ اَنت ۔ مسام ءِ تہ ءَ اے ھم گۤوشگ بوتگ کہ بلوچستان اے وھدی ایران ، اوگانستان ءُ پاکستان ءِ تہ ءَ بھر اِنت ۔ آئی ءَ امریکی سرکار دلگوش گور کنائینتگ کہ پاکستان ءَ بلوچ مھلوک ءِ سر ءَ زیادھی ءُ جبر بوگ ءَ اِنت ءُ امریکہ بلوچ مھلوک ءِ سرءَ ظلم کنوکاں سِلاہ ءُ کمک دیگ ءَ اِنت ۔ زانگ لوٹ اِیت کہ اے پہ بلوچ زرمبش ءَ یک دپتری بستار داریں ھبرے کہ امریکہ ءِ تہ ءَ ٹپ ما بلوچ جیڑہ ءِ سر ءَ گپ ءُ تران بوگ ءَ اِنت ءُ امریکی گوں پاکستان ءَ بلوچانی سر ءَ بیوکیں ناروائیانی درگت ءَ ترندیں زبانے ءَ گپ جنگ ءَ اَنت ۔ اے مسام تاک دیمتر ءَ پہ پاکستان ءَ امریکی کمک ءِ بندش ءِ ھم سبب بوت کنت پرچا کہ امریکہ ءِ راھبندانی تہ ءَ ھست کہ امریکہ آ ملکاں کہ انسانی حقانی لگتمالی بوگ ءَ اِنت کمک نہ کنت اگاں امریکی سرکار انسانیت دوستیں امریکی جھگیر باسکانی ھبر دلگوش مہ دار اِیت ھم امریکی دادگس اے رِد ءَ پیش بیوکیں دزبندی یے پد ءَ امریکی سرکار ءَ راھبندانی پابند کرت کن اَنت ءُ اے نوبت ءَ پہ پاکستان ءَ چَہ درساں مستریں جیڑہ درملکی کمک ءِ بندش بیت کہ پاکستان ءَ سرین پروش کنت ۔ پہ پاکستان ءِ گر ءُ دار ءُ بلوچ آجوئی ءِ پلہ مرزی ءَ مسام پیش کنوکیں امریکی راھشوں روھراباکر ءَ چد ءُ پیش ھم پاکستان ءِ گر ءُ دار ءِ باز جھد کرتگ ۔مئی دو ھزار یازدہ ءَ پاکستان ءِ امریکی کمک ءِ دارگ ءَ ھم روھراباکر ءَ بل ئِے پیش کرتگ ۔روھرا باکر ءِ اوگانستان ءُ پاکستان ءِ درگت ءَ زانت ءُ سرپدی یے سر ءَ پمیشکا ھچ رنگیں شکے نیست کہ واجہ ھشتاد ءِ دھک ءَ سویت یونین ءِ دیمپانی ءَ اوگانستان ءَ جنگ کنوکیں آئی ایس آئی ءِ مجاھداں ھمکار بوتگ ۔

بلوچ رھشون خیربیار مری ءَ گوں خان آف کلات ءَ گند ءُ نند کُتگ،

2012-02-17T02:43:00.001+04:00

نوکیں مستاگ: بلوچ رھشون ھیر بیار مری ءَ ماں ”کارڈف والز” ءَ خان آف کلات سلیمان داؤد ءَ گوں گند ءُ نند کُتگ۔ واجہ خیربیار ءَ ”چارٹر آف فریڈم بلوچستان” ءِ تاک خان آف کلات ءِ دست ءَ دیان ءَ دوئیں رھشوناں اے گپ ءِ سرا تپاکی درشانتگ کہ آزاد بلوچستان ءُ آزادی ءَ ”پد یک کسے بس ووٹے” ءَ ابئید، منطق ءُ دلیل ءِ بُنیاد ءَ چارٹر ءِ دگہ ھر رھبند ءَ بدلی سدلی آرگ بیت کنت۔

دوئیں رھشوناں اے گپ ءِ سرا ھم زور داتگ انوگیں وھد ءِ لوٹ ھمیش اِنت ، ءُ بلوچ راجی جُنز ءَ ماں دُنیا ءِ دیم ءَ جوانیں وڑی ءَ پیشدارگ ءَ اے کار المی اِنت کہ رھشوناں یک مُشت ءُ تپاک بیئگی اِنت۔ اے درگٹ ءَ چارٹر جوانیں کمکے کُت کنت۔

واجہ خیر بیار مری ءَ گُشتگ مئے گوں اختر مینگل ءُ دگہ رھشوناں ھم ٹیلیفون ءُ گپ ءُ تران بیتگ، تاکہ آ اے بابت ءَ وتی شور ءُ سلاھاں بہ دئے اَنت۔

مرچی چہ مستونگءَ دو بلوچ آوار جنگ بوتگ

2012-02-16T20:03:00.003+04:00

بام ھال۔۔ ھالانی رِدا مرچی چہ مستونگ ءِ بس اسٹاف ءَ دو بلوچ ورناء پاکستانی چیریں ادارھانی مردماں آوار جتگ ءُ بیگواہ کُتگ ،

شھید سمیع بلوچ ءِ آریپیں پِت ھم دُژمن ءِ گونڈلیں تیرانی آماچ بوت۔

2012-02-16T18:23:00.003+04:00

شھید سمیع ءِ گڈی دیدار

خضدار: ھندی ھالانی ردا راجی شھید سمیع جان بلوچ ءِ آریپیں پِت حاجی عبدالقادر بلوچ مرچی ماں پاکی ایردستیں بلوچستان ءِ دمگ خضدار ءَ دُژمن ءِ داشتگیں کاسگ چٹاں تیرگواری کُتگ ءُ شھید کُتگ۔ شھید سمی جان بلوچ بی۔ایس،او (آزاد) باسکے بیتگ۔ آ یک اکتوبر دوھزار دہ ءَ پاکی ایجنسیانی آوار جتگ اَت۔آئی ءَ داں یک ماہ ءُ ھپدہ روچ ءَ پاکی استان ءِ ٹارچر سیلانی تھا وڑیں وڑیں ٹارچر کنگ بیتگ اَت ءُ پدا آئی ءِ چتگ ءُ چُپتگیں میت ھپدہ نومبر دوھزار دہ ءَ خضدار ءِ گیابانے ءَ دز کپتگ اَت۔ ایشی ءَ زانگ بیت کہ دُژمن مرچی راجی شھیدانی ردوم داتگیں لیکہ ءُ فکر ءَ انچو گنوکیانی آماچ کُتگ کہ آ شھیدانی پِت ءُ مئے کماشاں ھم بخشگ ءَ نہ اِنت۔

سنیٹ ءِ رُپت ءُ روپ، ماں بلوچستان ءَ مُلا ءُ میر اتحاد بوتگ اَنت۔

2012-02-16T13:56:00.000+04:00

نوکیں ھال: سنیٹ ءِ آیوکیں گچینکاریاں بھر زورگ ءِ ھاترا ، ماں پاکی ایردستیں بلوچستان ءَ مُلا ءُ میر ، بزاں ”جمعیت مُلا ءاسلام” ءُ راجدوستانی گل بی۔این۔پی (رُپت ءُ روپ) نوکیں نامے سرا یکمُشت ءُ اتحاد بیتگ اَنت۔ مُلایانی داشتگیں کیچ ءِ امیر خالد ولید سیفی ءَ رسانکدر ءَ تران کنان ءَ گُشتگ کہ اے گپ راستیں کہ پیش ءَ ما گُشتگ قوم پرستی ، کُفر پرستی یے، بلے مرچی وھد ءِ لوٹ ھمے بیتگ اَنت کہ ما گوں قوم پرستاں ھوار ءُ یک مُشت بہ بئیں (بلے منی ھیال ءَ اے وھد ءِ لوٹ نہ بوتگ اَنت، بلکیں ھما دومی واجہ کار ءِ لوٹ اَنت)۔ آئی ءَ گُشتگ مئے اتحاد ءِ مستریں مول ءُ مراد ایش اِنت کہ سیاسی ءُ وانندھیں مردم سنیٹ ءَ برو اَنت ءُ شریں وڑی بلوچ مھلوک ءِ رھشونی ءَ بہ کن اَنت ءُ آ بلوچستان ءِ یاگی ئیں رھشون ءُ پاکی قبضہ گیریں استان ءِ میان ءَ پُھلے ءِ کرد ءَ پیلہ بہ کناں۔
بلے راستیں گپ اِنت کہ ماں بلوچستان ءَ نہ مُلاھاں چوشیں جوانیں سیاسی کردے اَست ءُ نہ میراں چوشیں علمے کردے۔۔۔۔۔۔۔

گوں دو چوڑیں پاگ ءُ شاھی تسبیاں
اے شریداری مبارک بات ترا

پٹ ءُ پول کنگی اِنت کہ ”وینا ملک” آئی۔ایس۔آئی ایجنٹے تہ نہ اِنت۔ بھارتی پولیس

2012-02-15T22:43:00.000+04:00

ممبئی: بھارتی پولیس ءَ گُمان زاھر کنان ءَ گُشتگ کہ بھارتی آمیدگس ءَ اے بابت ءَ پٹ ءُ پول کنگی اِنت کہ پاکستان ءَ چہ سیادی داروکیں تامری جنک ”وینا ملک” پاکی چیریں دست آئی۔ایس۔آئی ءِ ایجنٹے نہ اِنت ؟ خُدا ءِ نام گپتیں مُلک اسلامی جمھوری پاکستان ءَ چہ سیادی داروکیں اے جنک ءَ بھارتی تاکبندی یے ھاترا یک”فوٹو شوٹ” ئے وھد ءَ کُندریں عکس بندی کُتگ اَت۔ آئی ءِ اے برھنگیں عکس ستمبر دوھزار یازدہ ءَ شنگ بیتگ اِت اَنت۔

بلوچ رھشونانی کوش ءِ ھلاپ ءَ بلوچستان ءِ بازیں دمگاں ھڑتال ءُ زھرشانی

2012-02-15T14:36:00.001+04:00

بلوچستان: بی۔آر۔پی ءِ رھشون سنگت ثناء بلوچ ، بخشل مری ءُ جان مری ءِ چہ پاکی چیریں ایجنسیانی دست ءَ آوار جنی ءُ پدا آھانی جتگ ءُ چُپتگیں لاشانی دؤر دیگ ءِ ھلاپ ءَ، بلوچ راجدوستیں گلانی جار ءِ پدا مند، کیچ ،تمپ ءُ مستونگ ءُ بلوچستان ءِدگہ بازیں ھند ءُ دمگاں دربندیں ھڑتال ءُ زھرشانیانی لڑ برجاہ اِنت۔ السی ءُ سرکاری کارگس بند کنگ بیتگ اَنت۔ دومی نیمگ ءَ ماں کراچی ءَ گار ءُ بیگواہ ءُ شھید بیتگیں ورناھانی کھولاں رسانکدر ءَ تران کنان ءَ چہ یو۔ این۔ او ، انسانی حقانی بیرک داریں گلاں چہ دزبندی کُتگ کہ آ ماں بلوچستان ءَ بلوچ ورناھانی کوش ءُ پاکی رستریں لشکر ءِ زُلم ءُ زوراکیانی ھلاپ ءَ آواز چست بہ کن اَنت۔

یک فوجی افسرے ءَ ھوار پنچ کارندہ کُشتگ اَنت۔ سرباز بلوچ

2012-02-14T15:23:00.003+04:00

کوئٹہ: بلوچ سلاہ بندیں گل بی۔آر۔ اے ءِ جارکش سرباز بلوچ ءَ ناشناسیں ھندی ءَ ھال کنان ءَ گُشتگ کہ مئے سرمچاراں ایردستیں بلوچستان ءِ ڈیرہ مراد جمالی ءُ چھتر ءِ دمگاں پاکی فوج ءِ سرا اُرش کُتگ۔ چر اے اُرشاں یک پاکی افسرے ءَ ھوار پنچ فوجی کارندہ مُرتگ اَنت۔

دُژمن کُل بلوچ ءَ شھید کنگ اِنت ، انوگیں جاورانی پژدر ءَ راجی تپاکی المی اِنت۔ خیر بیار مری، براھمدگ بگٹی

2012-02-14T13:13:00.001+04:00

جنیوا: واجہ خیر بیارمرى ءَ ، واجہ براھمدگ بگٹی ءِ گھار ءُ گھارزتکانی شھادت ءِ پژگرد ءَ واجہ براھمدگ ءِ پُرس کنگ ءُ آئی کھول ءِ شھادت ءِ سرا دِلرنجی درشان کنگ ءَ سویٹزر لینڈ ءَ شُتگ۔ فروفیسر مصطفیٰ بلوچ ھم آئی ءِ ھمراھی ءَ گوں بوتگ۔ دوئیں رھشوناں پُرسی دیوان ءَ چہ پاکیں پروردگار ءَ دعا کُتگ کہ بلوچستان ءِ کُلیں شھیدانی ارواھاں ماں جنت ءَ جاگہ بہ دنت۔ ھالانی ردا ماں اے پُرسی دیوان ءَ دوئیں رھشونانی میان ءَ ”بلوچستان لبریشن چارٹر” ءِ سرا ھم گپ ءُ تران بیتگ۔ خیربیار ءَ بلوچستان لبریشن چارٹر ءُ آئی ءِ سرا بیتگیں کارکرداں چہ براھمدگ سرپدی داتگ ءُ گیشیں تجویز ءُ ریس ءُ پریس ءِ ھاترا چارٹر براھمدگ ءِ دست ءَ دیگ بیتگ۔ دوئیں رھشوناں آجوئی ءِ چارٹر ءِ سرا گپ ءُ تران کنان ءَ آھاں گُشتگ اے چارٹر بلوچ راج ءَ یکمُشت کنگ ءُ بلوچ راجی جُنز ءَ یک شلیں رھبندی دیگ ءَ کمک کنت۔ بلوچ رھشوناں یک گپے سرا زور دیان ءَ گُشتگ کہ انوگیں جاورھالانی پژدر ءَ بلوچ راج ءَ تپاکی ءُ یکوی المی اِنت۔ دُژمن کُلیں بلوچ پارٹی آنی کارندھاں پہ بے دردی شھید کنگ اِنت ءُ ھر تکاں بلوچ راجی جُنز ءِ ھلاپ ءَ پروپیگنڈہ کنگ اِنت۔ پمیشا بلوچ ورناھاں لوٹیت کہ وتی تھا گیش ءَ چہ گیش تپاکی ءُ یک مُشتی بیار اَنت ءُ سائنسی رھبندانی بُنیاد ءَ وتی جُنز ءَ دیم ءَ بہ بر اَنت۔ بلوچ رھشوناں گُشتگ میان استمانی تکاں ھم بلوچ راجی جُنز ءَ جوانیں رنگے ءَ دیم ءَ برگی اِنت۔ آزاد بلوچستان چارٹر ءِ وسیلت ءَ ما عالمی مھلوک ءَ ھمے نشوندھی ءَ دیگ لوٹیں کہ آزاد بلوچستان ءِ لوٹ ءِ ھمراھی ءَ ما اے ھند ءُ دمگاں مُھکمیں ایمنی ءُ دگہ مُلکانی گُما پہ دل پھکی سیادی دارگ ءِ واھگ دار اِنت ۔ ھالتران ءَ گُشگ بیتگ کہ واجہ خیربیار مری راجی یکمشتی ءُ یکوی ءِ ھاترا زوت دگہ بلوچ رھشوناں گوں گند ءُ نند کنت ءُ آھاں آزاد بلوچستان چارٹر ءِ بابت ءَ سرپد کنت ءُ گیشیں شور ءُ سلاھانی ھاترا آھانی دست ءَ دیگ بیت۔

سيزده فروری بلوچی زبان ءِ نوکیں عھد ءِ مستریں شاعر عطا شاد ءِ بیرانی یے روچ۔ پہ بے برمشے گوست۔

2012-02-13T15:08:00.002+04:00

کئے ماں ویراناں چراگاں بالیت
دِل گنوکیں گوں شپاں ڈوباریت

بد ھما اِنت کہ منی مرگ ءَ پد
کئیت منی قبر ءِ سروناں نالیت

سنگت ثناء بلوچ شھید کنگ بوت

2012-02-13T13:30:00.005+04:00

بام ھال ۔۔ مرچی کیچ ءِ دمگ مُرغاپ ءَ بی آر پی ءِ سنٹرل کمیٹی ءِ باسک سنگت ثناء بلوچ ءِ لاش دست کپتگ ، یات بہ بیت سنگت ثناء دو سال پیش 8 دسمبر 2008ءَ چہ کولپور ءِ دمگ ءَ پاکستانی چیریں ادارہاں بیگواہ کُتگ ات ، مرچی آئی ٹپ ءُ ٹوریں لاش اش ماں کیچ ءِ دمگ مُرغاپءَ دور داتگ ،، آہ ،، سنگت ثناء شھید کنگ بوت

کراچی ءَ آوار جتیں بلوچ ورناھانی جتگ ءُ چُپتگیں لاشانی چگل دیگ ءِ ھلاپ ءَ زھر شانی

2012-02-12T18:13:00.001+04:00

کراچی: ھالانی ردا بلوچ نیشنل موومنٹ (شھید جی۔ایم) ءِ نیمگ ءَ کراچی رسانکی کارگس ءِ دیم ءَ ماں بلوچستان ءَ پاکی فوج ءِ زُلم ءُ زوراکی ءُ پاکی چیریں ایجنسیانی دست ءَ بلوچ ورناھانی گار ءُ بیگواہ کنگ ءُ ٹارچر کنگ ءُ پدا آھانی جتگ ءُ چُپتگیں لاشواں ماں ویرانیں دگ ءُ چاھراھانی سرا دز کپگ ءِ ھلاپ ءَ زھرشانی کنگ بیتگ۔ زھرشانی ءَ زھگ ءُ زالبولانی مزنیں کساسے ءَ ھم بھر زُرتگ۔ زھرشانی کنوکاں ماں ایردستیں بلوچستاں ءَ پاکی رستریں فوج ءِ زُلم ءُ زوراکیاں ایرجنان ءَ گوں عالمی مھلوک ءُ یو۔ این۔ او ءُ دگہ انسانی گلاں دزبندی کُتگ کہ آ ماں بلوچستان ءَ پاکی زُلم ءُ زوراکی بلوچ چُک چینی( نسل کُشی) یے ھلاپ ءَ آوار چِست بہ کناں۔۔۔

تُمپ ءَ ناشناسیں مردمانی تیرگواری ءَ نودربرے ٹپی بیتگ

2012-02-12T17:42:00.000+04:00

تُمپ: ھالانی ردا کیچ ءِ دمگ تُمپ ءَ ناشناسیں مردمانی تیر گواری ءَ گرائمر اسکول تمپ ءِ نودربرے ٹپی بیتگ۔ نادراھجاہ ءَ سر کنگ بیتگ

نوکیں سالءَ بلوچ سرمچارانی اُرشاں گیشی اَتکگ۔ پاکی فوج

2012-02-11T22:40:00.000+04:00

نوکیں ھال: پاکی فوج ءَ اے گپ ءِ راستی منّ اِتگ کہ بلوچستان ءِ جاورھال روچ پہ روچ ھراب بوّان اَنت۔ بلوچ سرمچارانی اُرشاں گیشی اَتکگ۔ بس نوکیں سال ءَ ھپتاد ءُ چار ایف۔سی کارندہ جنَگ ءُ کُشَگ بیتگ اَنت۔ پاکی فوج ءِ رپورٹ ءِ ردا بلوچ سلاہ بندیں گلانی رھشونی ءَ خیر بیار مری، براھمدگ بگٹی، ڈاکٹر اللہ نظر ءُ جاوید مینگل کنگ ءَ اَنت۔

مند : پاکی ایف سی ءَ لاوڈ اسپیکر ءَ جار جتگ کہ ھرکس بلوچ سرمچارانی کشگ ءَ کمک کنت کروڑانی کلدار لب دیگ بیت

2012-02-11T21:33:00.002+04:00

مند: مند ءِ دمگ گوبرد ءَ زورگریں پاکستانی ایف سی ءَ بازار ءَ گشت جنان ءَ لوڈاسپیکر ءِ سر ءَ جار پرینتگ کہ ھرکس سرکار ءَ پہ بلوچ راھشون واحدکمبر، دلیپ شکاری ، صغیر مندی ، زاھد مندی ءُ دگہ سرمچارانی دزگیری ءَ کمک کنت آھاں چَہ ایف سی نیمگ ءَ زر دیگ بیت ۔ آھاں پہ واحد کمبر ءَ یک کروڑ ءُ پنجاہ لکھ ، پہ دلیپ شکاری ءَ یک کروڑ ، پہ عابد زامرانی ءَ یک کروڑ پہ صغیر مندی ءُ زاھد مندی ءَ پنجاہ پنجاہ لک روپیہ ءِ لب نامینتگ ۔

دو سرکاری لشکرے کمانڈر کُشگ بوتگ

2012-02-11T20:54:00.002+04:00

ڈیرہ بگٹی: مرچی ڈیرہ بُگٹی ءِ دمگ زمردان ءَ سرمچارانی ءُ سرکاری لشکرے دیم پہ دیم جنگ ءَ سرکاری لشکرے دو کمانڈر کُشگ بوتگ۔

چہ کراچی ءَ واجہ جان محمد مری آوارجنگ بوتگ

2012-02-11T20:51:00.002+04:00

کلاچی : ھالانی ردءَ واجہ جان محمد مری چہ کراچی ءَ سرکاری لشکرءَ آوارجتگ ءُ گوں وت بُرتگ۔

ڈیرہ بُگٹی ءَ دو بلوچ شھید کنگ بوتگ

2012-02-11T20:29:00.005+04:00

بام ھال ،، ھالانی ردا ڈیرہ بُگٹی ءِ دمگءَ توب ءَ او زمردان ءِ ھنداں پاکستانی ایف سی ءَ لشکر کشّی کُتگ او دو بلوچ شھید کُتگ شھید رحیم خاں ءِ تعلق چہ بلوچ ریپلکین پارٹی (بی آرپی ) ءَ بوتگ

شام ءَ گوستگیں دو روچاں فوج ءِ بمباری ءَ یک سد ءُ پنجاہ مردم بیران بیتگ

2012-02-10T12:32:00.001+04:00

شام: انسانی حق ءِ گلانی کارندھانی گُشگ ءِ ردا شام ءِ شھر حمص ءَ گوستگیں دو روچانی تھا کساس یک سد ءُ پنجاہ مردم بیران بیتگ۔ شھر حمص ءَ گوستگیں چار شنبہ ءِ روچ ءَ شامی فوج ءِ بمباری ءَ چہ پنجاہ مردم بیران بیتگ ءُ وھدیکہ پنچ شنبہ ءِ سُھب ءَ ارشانی لڑ پدا بندات بیتگ چر ایشی ءَ چہ نود ءُ پنچ کس بیران بیتگ اَنت۔ دو روچانی تھا مُرتگیں مردمانی کچ یک سد ءُ پنجاہ ءَ سر بیتگ۔ وھدیکہ یو۔این ۔او ءِ سیکرٹری جنرل بان کی مون ءَ شامی فوج ءِ رستری کار گوں تُرندی ءَ ایر جتگ اَنت۔

گوستگیں یک سالے ءَ شام ءَ شاھی فوج ءُ یاگیانی میان ءَ جنگ جاری اِنت چر ایشی ءَ چہ ھزاراں مردم بیران بیتگ اَنت۔ گوستگیں ھفتگ ءَ شام ءِ جیڑھانی گیش ءُ گیوار ءِ ھاترا عالمی مھلوک ءِ نیمگ ءَ یک منگ نامگے دیم ءَ آرگ بیتگ بلے روس ءُ چائنا ءَ اے منگ نامگ رد کُتگ۔
حمص شام ءِ سیمی مستریں شھر اِنت کہ شامی سرکار ءِ ردا اے شھر یاگیانی بُنجل اِنت ۔ پمیشا سرکاری فوج ءُ یاگیانی میان ءَ جنگ ءُ چوپاں جاورھال سک نگیگ اَنت۔

حمص ءِ شھر ءَ مرچیگیں شپ ءِ تھاری ءَ بمب گواری بندات کُتگ ءُ اے لڑ داں روچ ءَ جاری بیتگ۔شامی سرکار ءِ ردا ھمے شھر ءِ لھتے ھند کہ یاگیاں وتی بُنجل جوڑ کُتگ اَنت ، ایشانی سرا اُرش بیتگ۔ ھندی ڈاکٹر علی رضا ءِ گُشگ ءِ ردا شامی زوراکیں فوج عام مھلوک ءِ بمب گواری کنگ اِنت چر ایشی چہ بازیں مردم بیران بیتگ اَنت۔ آئی ءِ گُشگ ءِ ردا فوج ءِ نیمگ ءَ ٹوھیں ٹوھیں سلاہ کارمرزگ بیئگ ءَ اَنت۔

ھیومن رائٹس واچ ءِ ردا سرکاری فوج ءَ شھر چاگرد کُتگ ، ایشی ءِ مول ءُ مراد ھمیش اِنت کمکی گلاں تھا روگ ءَ راستی ءَ زانگ ءِ موہ مہ رسیت۔ ھالانی ردا شامی فوج ءِ نیمگ ءَ رسانکدر ءِ سرا ھم پابندی جتگ ءُ تھا پُترگ ءَ نیلگ اِنت۔

دومی نیمگ ءَ جرمنی ءَ شامی سفارت کار چہ مُلک ءَ کَش اِتگاں۔ جرمنی سرکاری رپورٹ ءِ ردا جرمنی ءَ دو اَنچیں مردم دزگیر بیتگ کہ آ شامی ھلاپکارنی ھلاپ ءَ چارو گری ءَ گوں ھوار اَنت۔ لیبیا ءَ ھم ھپتاد دو ساھت ءِ تھا شامی سفارت کاراں چہ مُلک ءَ در آیگ ءِ حُکم داتگ۔

”فیس بُک” ءِ کُڈک غم ءُ رَنجانی سوب جوڑ بیت کنت۔

2012-02-10T00:29:00.000+04:00

امریکا: یک نوکیں پَٹّ ءُ پولی ءَ چہ ھمے نشوندھی رستگ کہ فیس بُک کارمرز کنوکیں مردم، چہ فیس بک ءَ گِسریں مردمانی ھِساب ءَ گیشتر درد ءُ رنجانی آماچ بیت کن اَنت۔ آ گیش غمگین بنت۔ پَٹ ءُ پول ءَ چہ ھمے پدر بیتگ کہ چاگردی کلوہ ءُ ھالانی کُڈک فیس بُک یا دگہ ویب سائٹ مردم ءِ وشیّانی دزمانجن بیت کن اَنت۔

امریکا ءِ ھند یوٹاہ ءَ ”اروم شاھدربر جاہ” ءِ پَٹ ءُ کارانی ردا فیس بُک کارمرز کنوکیں مردم وھدی کہ گوں دومی ءَ فیس بُک ءِ وسیلت ءَ کلوہ ھال کنت تا آئی ءِ دل ءِ تھا ھمے گُمان سر کشّ ایت کہ دومی مردم چہ آئی ءَ گیشتر وژدل ءُ دِلساچ اِنت۔ پٹ ءُ پولکاراں ھمے زانگ ءِ جُھد کُتگ کہ فیس بُک ءِ کارمرزوک وتی مِھروانانی کارکردانی زانگ ءِ ھاترا گوں چونیں جزبگ ءُ مارشتاں گوں دوچار کپ اَنت۔ چار سد ءُ بیست ءُ پنچ نودربرانی سرا پَٹ ءُ پول ءُ آھانی جُست ءُ پُرس ءَ چہ ھمے نشوندھی رستگ کہ فیس بُک کارمرز کنوکیں نودربر ھر یکے دومی ءَ چہ وت ءَ گیشتر وژدل ءُ شادمان سرپد بیت۔

نفسیاتی زانوگر ڈاکٹر ”ٹاڈ کشیڈن” ءِ ردا فیس بُک کارمرز کنوکانی دیم ءَ وھدی دومیانی وژدلیں زند ءِ عکس گوزیت۔آ وتی زندگی ءَ گوں دومی ءَ ھمدرچ کن اَنت تا آ دومی ءَ چہ وت ءَ گیش وشھال ءُ وت ءَ بد قِسمت سرپد بنت۔

کشیڈن ءِ ردا فیس بُک کارمرز کنوک ھمے گُمان ءَ کن اَنت کہ ”منی زِند اِنچو وشھال ءُ دِل تاھیر نہ اںت اِنچو کہ دگرانی اِنت” ھمے گُمان آھاں دِلرنج ءُ دِلتپرکہ کنت۔ پَٹ ءُ پولی زانوگرانی گُشگ اِنت کہ ایشی ءِ سوب ”کرسپانڈنس بائی یس” نامیں نفسیاتی گپچل بیت کنت کہ انسان وھدی اے گپچل ءِ آماچ بیت تا گُڑا آ مردمانى دل ءِ ھالاں زانگ ءَ ابئید آئی ءِ زاھری تب ءُ مئیل ءَ دیم ءَ کنت ءُ آئی ءِ بابت ءَ ھمے گُمان ءَ کنت کہ آ چہ من ءَ گیشتر وش ھال اِنت۔

زانوگانی گُشگ اِنت کہ فیس بُک وتی تھا ءَ اے گُمان ءِ ودی کنگ باز ارزان اِنت کہ دومی چہ من ءَ گیشتر وش تب ءُ وشھال اَنت۔ چیاکہ فیس بُک ءِ کارمرز کنوک وتی پروفائلانی تھا مُدام وت ءَ وشھال زاھر کنگ لوٹیت۔ آ ھچبر وتی زند ءِ بابت ءَ دِلگیر ءُ پدردیں رازاں زاھر کنگ نہ لوٹیت۔

پَٹ ءُ پولکارانی گُشگ ءِ ردا فیس بُک یا دگہ کُڈک چاگردی کلوہ ھالانی باز جوانیں وسیلت اَنت۔ بلے اے درگت ءَ لھتے سوج ءُ سرانی سرا عمل کنگ بہ بیت تا چوشیں وئیل دیم ءَ نیا اَنت۔

زانوگرانی گُشگ اِنت فیس بُک ءَ دگرانی بابت ءَ زانگ ءِ جُھد کنگ ءَ ابئید بلکیں وتی زند ءِ ھال ءُ احواانی دومیاں سر کنگ ءِ جُھد کنگ بہ بیت۔ ھما دوستاں گوں نزیکی کنگ بہ بیت کہ آ تئی پجاروک اَنت ءُ تئی زند ءِ بابت ءَ فکرمند بیت کن اَنت تا اے وئیل ءِ گِر ءُ دار بیت کنت۔

بلوچستان ءَ دوئیں نیمگاں انسانی حقانی ھلاپ ورزی بیئگ اِنت، آجوئی ءِ پلہ پلہ مرزی ءَ نہ کنیں۔ امریکہ

2012-02-09T08:34:00.000+04:00

واشنگٹن: ماں امریکی دری کارانی کمیٹی ءِ کارگس ءِ نیمگ ءَ بلوچستان ءِ بابت ءَ برجم داشتگیں مراگاہ ءَ امریکی کانگریس ءِ کارندہ رالف پیٹرز، کرسٹن فیئر ڈانارو ہرابیکر ءُ چہ پاکستان ءَ اَتکگیں انسانی حقانی کارندھاں تران کنان ءَ گُشتگ کہ بلوچستان جنگ آماچیں دمگے، پاکی فوج امریکا ءَ جوڑ بیتگیں سلاہ ءُ ازباباں بلوچ مھلوک ءِ سرا کارمرز کنگ اِنت۔ ماں بلوچستان ءَ دوئیں نیمگاں انسانی حقانی ھلاپ ورزی بیئگ اِنت۔ بلوچ ھم ”ٹارگٹ کلنگ” ءَ ھوار اَنت۔ ”بہ جن ءُ بہ کُش” ءُ فوجی آپریشن برجاہ اِنت۔ بلوچستان اسٹریٹجک حوالہ ءَ باز بستار داریں دمگے، باید گوں گپ ءُ تران ءَ جیڑہ گیشینگ بہ باں۔ ھما واک ءُ قوت کمک کنگ بہ بنت کہ آ انسانی حقانی ھلاپ ورزی ءَ ھوار نہ اَنت۔ پاکستان ناشرکارانی پلہ مرزی ءَ کنگ اِنت۔ بلوچستان ءِ جیڑہ پاکستان ءِ تھی توکی جیڑھے، او اودا ڈنّی آنی کُشت ءُ کوش ھم بیئگ اِنت۔ امریکی دری کارانی جارکش وکٹوریہ نولینڈ ءَ گُشتگ بلوچستان ءَ آزادی ءِ پلہ مرزی ءَ نہ کنیں، گپ ءُ تران ءَ جیڑہ گیشّینگ بہ باں۔ مراگاہ ءَ ایمنسٹی انٹرنیشنل ءُ انسانی گلانی دگہ کارندھاں ھم گواھی داتگ ءُ یک ساھتے ءَ پد مراگاہ آسر بیتگ۔

بی۔ایل۔اے ءَ پاکی استان نفسیاتی نادُراہ جوڑ کُتگ

2012-02-08T16:04:00.002+04:00

بام هال : نوکیں سال ءَ ماں بلوچستان ءِ بازیں ھند ءُ دمگاں بلوچ سلاہ بندیں گل ”بلوچ لبریشن آرمی” ءِ ماں پاکی قبضہ گیریں فوج ءِ سرا ترندیں اُرشاں، کراچی ءَ بلوچ مات ءُ گھارانی شھادت ءِ پژگرد( رد عمل) ءَ ماں مارگٹ ءَ بی۔ایل۔ اے ءِ جوابی ارش ءَ چہ ھمے زانگ بیت کہ بی۔ایل۔ اے ءَ وتگڑیں پاکی استان نفسیاتی نادُراہ جوڑ کُتگ۔ اے گپ ءِ راستی ھمیش اِنت کہ نوکیں سال ءَ پاکی استان ءِ ھر کارندہ ءِ دپ ءَ ھمے گپ ورد اِنت کہ بی۔ایل۔ اے۔........................ مرچی رحمان ملک ءِ پلیتیں زبان ءَ ھم ھمے گپ در اَتک کہ بی۔ایل۔ اے ءَ نوکیں سال ءَ شست پاکی کارندہ کُشتگ اَنت

مارا بژن بیت کہ لھتے بلوچاں انگت دُژمن استان ءِ پارلیمنٹ ءِ سیاھیں پٹی وتی چماں بستگ ءُ آ دُژمن ءِ چالاں پوہ بیئگ ءَ نہ اَنت۔ بلوچ رھشون واجہ جاوید مینگل

2012-02-08T15:32:00.000+04:00

لندن: بلوچ راجدوستیں رھشون واجہ جاوید مینگل ءَ گُشتگ ماں کراچی ءَ بلوچ مات ءُ گُھاراں تیرانی آماچ کنگ ءُ شھید کنگ ءُ ماں بلوچستان ءِ ھند مارواڑ ءَ بلوچ زھگ ءُ زالبولانی آوار جنگ انچیں کرداں کہ دُژمن استان ءِ بُزدلیں ابرم ءِ مستریں نشانی اَنت۔ تاریخ دُژمن استان ءِ چوشیں بُزل ءُ شرمناکیں کرداں چہ چکار اِنت۔ بنگال ءِ زھگ ءُ زالبولانی سرا دُژمن استان ءِ زُلم ءُ زوراکی پدریں مثال اَنت۔ آئی ءَ گُشتگ بلوچ اے گپ ءَ پوہ بہ بنت کہ آ دُژمن استان ءِ ”فریم ورک” ءِ تھا نند اَنت ءُ وتی راجی حقاں گِراَنت (اے پد نبودیں ھیالے)۔۔ آئی ءَ گُشتگ بلوچ چہ رستریں دُژمن ءَ وتی ننگ ءُ شرپ ءِ حفاظت ءَ کُت کنت، اگاں ناں ما اے استان ءِ گُم ءَ چون ھور نِشت کن ایں کہ آ وتی ءَ دُژمنی یے ھر حد ءُ سیمسر گواز کُتگ اَنت۔ بلے بژن بیت کہ لھتے بلوچاں انگت دُژمن استان ءِ پارلیمنٹ ءِ سیاھیں پٹی وتی چماں بستگ ءُ آ دُژمن ءِ چالاں پوہ بیئگ ءَ نہ اَنت۔ آھانی مرچی فرض جوڑ بیت کہ آ اے بزگیں راج ءَ ادارکی لالچ ءُ حیراتاں گوں مان مہ گیشیناں ءُ دیم ءَ بیاینت ءُ پہ راستیں راہ ءِ نشوندھی ءَ راج ءِ رھشونی ءَ بہ کن اَنت۔ مرچی اینکہ بلوچ کہ آھاں وتی گھگیریں سر ندر کُتگ اَنت۔ اے واستہ ناں کہ ما پدا گوں ھمے وتگڑیں استان ءِ پارلیمانی رھبند ءَ گوں ھوار بہ بئیں۔ بلکیں آھاں پہ ماتیں گُلزمین ءِ آجوئی ءِ ھاترا وتی سر ندر کُتگ اَنت۔ بلوچستان ءَ ما کُجام یک گلے ءِ جلسہ ءُ مراگشے ءَ شُتگ ایں ، اودا آجوئی ءِ جار جنگ بیتگ۔ آئی ءَ گُشتگ صوبائی وزیر ءَ پچیں دیوان ءِ دیم ءَ گُشتگ کہ پاکی ایف۔ سی ءَ منی چمانی دیم ءَ بلوچ ورناہ تیرگواری ءُ شھید کُتگ اَنت۔ بلے آ ھمینچو بے وس بیتگ کہ آئی ءَ ھچ گُشت کُت نہ کُتگ۔ ایشی ءَ ابئید ھم ما دِلکشی ءِ تھا مہ بئیں کہ مارا اے رھبند ءِ تھا وتی راجی حق رس اَنت۔ نو ما اے وتگڑیں نظام ءِ تھا وتی وھد ءَ چیا بہ گوازین ایں۔ نو باید ما بلوچ راج ءَ یک مُشت بہ کنیں ءُ آجوئی ءِ جنز ءَ تیز بہ کنیں۔ بلوچ رھشون ءَ گُشتگ منی نَزّ ءَ چہ ھما میر ءُ واجھاں کہ آ ھمے استان ءِ نظام ءِ تھا نندوکاں ، ایشاں چہ یک بلوچ شُپانکے گیشتر عزت ءُ شرپ داریت کہ آ وتی راجی آجوئی ءِ مارشت ءَ داریت۔۔ آئی ءَ گُشتگ کہ پاکی استان ھمے بُھتام ءَ جنت کہ لھتے بلوچ رھشون دری دُنیا ءَ نِشتگ اَنت ءُ عیش ءُ نوش کنگ ءَ اَنت۔ آ ھمے بلوچانی زندگ بئیگ ءَ ھم برداشت کُت نہ کنت کہ آ ڈنّ ءَ نشتگ اَنت ءُ دری دُنیا ءِ دیم ءَ ماں بلوچ راج ءِ سرا پاکی استان ءِ زلم ءُ زوراکیانی چیریں کسہ ءَ پدر کنگ ءَ اَنت۔ آئی ءَ گُشتگ مرچیگیں ھالتاں دُراھیں آزادی لوٹوکیں گل یک مُشت بہ بنت ءُ یک نوکیں رھبندی بہ ٹھین اَنت ءُ یک انچیں کونسلے جوڑ بہ کناں کہ آ ماں دنیا ءَ بلوچ راجی آجوئی ءِ ھاترا کار بہ کنت۔ آئی ءَ گُشتگ ماں بلوچستان ءَ بلوچ راج ءِ سرا بیتگیں زُلم ءُ زوراکیانی بابت ءَ عالمی دُنیا ءِ نوٹس زیرگ باز وشیں گپے، بلے بس نوٹس زورگ مئے دردانی دوا بیت نہ کنت۔ بلیکیں عالمی مھلوک عملی صورت ءَ دیم ءَ بیا اَنت۔ آئی ءَ گُشتگ پاکی استان ھمے گپ ءَ جنت کہ بلوچستان پہ وشی پاکستان ءَ ھوار بیتگ۔ بلے راستی اِش انت کہ بلوچستان پہ زور ایر دست کنگ بیتگ۔ آ وھد ءَ بلوچ مھلوک پاکستان ءَ ھوار بیئگ ءِ حق ءَ نہ بیتگ۔ بلکیں خان کلات زندان ءَ کنگ بیتگ ءُ آئی ءِ سرا زور دیگ بیتگ کہ ھمے وتگڑیں معاہدہ ءَ دسخط بہ کنت۔ پاکی استان ءِ ءُ خان کلات ءِ میان ءَ ھما معاہدھ یے کہ بیتگ آئی ءِ سرا ھم رند ءَ عمل درآمد نہ بیتگ ، وھدیکہ یک نیمگے معاہدہ ءِ پاسداری کنگ مہ بیت تا پہ وت ھلاس بیت۔ پمیشا ما چہ میان استمانی واک ءُ قوتاں دزبندی کنیں کہ آ مئے راجی جُنز ءِ پلہ مرزی ءَ بہ کن اَنت۔ مئے ھما جُتائیں بستار کہ 1948 ءَ پیش بیتگ ، ایشی ءِ دوبارہ بحال کنگ ءَ مئے مدت ءُ کمک ءَ بہ کناں۔

نصیر آبادءَ ایف سی ئے گاڑی ءِ سرا ریموٹ بمب اُرش سہ ایف سی مُرتگ

2012-02-07T22:01:00.002+04:00

بام ھال۔۔ ھالانی ردءَ نصیر آباد ءِ دمگ ءَ ربّی پُھل ءِ نزیک ءَ بلوچ سرمچاراں ایف سی ءِ گاڑی ءِ سرا ریموٹ بمب ءَ اُرش کُتگ،چہ اے اُرش ءَ سہ ایف سی والا مُرتگ ءُ بازیں ئے ٹپّی بوتگ ،اے اُرش ءِ ذمہ واری بلوچ سرمچارانی آجوئی ئے گل بلوچ ریپبلکن آرمی ( بی آر اے ) ءَ زُرتگ

ڈیرہ بُگٹی ءَ ریموٹ بمب دماکہ ئے بوتگ ،ھفت ایف سی مُرتگ بازینے ٹپی بوتگ

2012-02-06T18:29:00.003+04:00

بام ھال ۔۔ ھالانی ردا مرچی ڈیرہ بُگٹی ءِ دمگ پیرسُھرئیءَ ایف سی گاڑی ءِ سرا ریموٹ بمب دماک کنگ بوتگ ،چہ اے دماکہ ءَ گاڑی ءَ سواریں ایف سی ئے ھفت فوجی مُرتگ ءُ باز ٹپّی بوتگ اشانی تھا بلاھیں افسر ھم ھوار ، تنی وھدی اے ویل ذمہ واری کسءَ قبول نہ کُتگ دیم ترا گوں نوکئن ھالان ساڑی بئیں

ایران ءِ بابت ءَ گوں ازرائیل ءَ ھم پت اِیں ' بارک اوباما

2012-02-06T18:03:00.000+04:00

امریکہ ءِ صدر بزاں سرکار کماش ءَ گوشتگ کہ ایران ءِ جوھری پروگرام ءِ بابت ءَ ازرائیل ءِ تُرس راست اِنت ۔امریکہ ءِ صدرءَ این بی سی ٹیلی وژن ءَ گوں گپ جنان ءَ گوشتگ کہ من سرپد بئے آں کہ ازرائیل ءَ تنیگت ایران ءِ جوھری پروگرام ءِ بابت ءَ ھچ وڑیں کارروائی کنگ ءِ لانک بندی نہ کُرتگ ۔ پد ءَ ھم امریکہ ءُ ازرائیل ایران ءِ جیڑہ ءَ دست ماں دست کار کن اَنت۔ آئی ءَ دیمتر ءَ گوشتگ کہ من لوٹ اِتگ کہ اے جیڑہ سفارتی وڑ ءُ پیم ءَ گیشینگ بہ بیت۔ آئی ءَ گوں زورءَ گوشتگ کہ گوں گپ ءُ تران ءِ ٹیبل ءَ ابید اے جیڑھے گیش ءُ گیوار کنگ ءَ دگہ ھچ راہ ءُ در نیست۔ داں کہ ایران ءِ جوھری پروگرام ھست ءُ دیمروئی کنگ ءَ اِنت ازرائیل ءِ شک راست اِنت ءُ مئے ھم ۔ بارک اُوباما ءَ دیمترءَ گوشتگ کہ چَہ عرب مُلکاں ھرچ وڑیں عسکری کارروائی ءَ امریکہ ءِ سرءَ گیشتر اثر کپ اِیت ۔آئی ءِ گوشگ ءِ مول ءُ مراد ھمیش اِنت کی تیل ءِ نھاد اثر مند بوت کن اَنت۔آئی ءَ گوشت کہ مئے فوج اَنگت اوگانستان ءَ ساڑی اِنت پمیشکا من اے جیڑھے سفارتی گیش ءُ گیوار لوٹ آں۔آئی ءَ گوشتگ کہ اے بابت ءَ ما تچک اِیں کہ ما ایران ءَ جوھری ہتھیار دست رسی ءُ دمگ ءِ توک ءَ جوھری ہتھیارانی یک تاچے ءِ بندات کنگ ءِ دارگ ءَ ھمک وڑیں گام چست کرت کن اِیں ۔امریکی صدر بارک اوباما ءَ گوشتگ کہ آئی ءَ پہ ایران ءِ جوھری پروگرام ءِ دارگ ءَ میان اُستمانی تک ءِ مردم جزینتگ اَنت بلے چَہ ایران ءِ نیمگ ءَ ھچ وڑیں گامگیج چست کنگ نہ بوتگ۔آئی ءَ گوشتگ کہ ایران گوشگ ءَ اِنت کہ آ پہ پُرایمنیں مولاں جوھری توانائی زورگ ءِ جھد ءَ اِنت۔ما جوھری سِلاہ نہ لوٹ اِیں بلے تانکہ اے پروگرام ھست اِنت منی ھیال ءَ ازرائیل ءِ شک راست اِنت ءُ مئے ھم ۔ بارک اوباما ءَ گوشتگ کہ پہ اے جیڑھے ءِ سفارتی گیش ءُ گیوارءَ یکشلا زور دیان کن آں۔

بختیارڈومکی ءِ جنین ءُ جنک ءِ کوش ءِ سر ءَ نسرین کیھتران پہ زھرشانی وزیری ءَ دزکش بوت

2012-02-06T12:50:00.000+04:00

شال : پاکستان چیردستیں کاسگ چٹیں بلوچستان سرکار ءِ اُستان کارداری ءِ تہ ءَ ھواریں نسرین کھیتران ءَ بختیار ڈومکی ءِ لوگبانک ءُ کسان سالیں جنک ءِ کُشگ ءِ ایرادی ءَ پہ زھرشانی چَہ وتی وزیری ءَ دزکش بوگ ءِ جار پرینتگ ۔ شال ءَ گوں اھوالکاراں تران کنان آئی ءَ گۤوشتگ کہ کراچی ءَ بلوچستان اسمبلی ءِ باسک بخیار ڈومکی ءِ لوگبانک ءُ جنک ءِ کشگ پہ ما چَہ اُوپار ءَ ڈن ءِ کار ے بلے سندھ سرکار ءَ اے کسانیں کارے زانتگ ءُ پہ کشندھانی دزگیری ءَ گامگیج نہ زرتگ ۔ پہ اے کار ءِ ایرجنگ ءَ من اسمبلی ءِ تہ ءَ نہ ایوک ءَ توار چست کرتگ بلکیں واک آوٹ ھم کرتگ بلے ھچ گوشدارگ نہ بوتگ پمیشکا بلوچستان سرکار کارداری ( کابینہ ) ءِ تہ ءَ ھوار بوگ ءِ ھچ رنگیں جوازے پشت نہ کپتگ ۔آئی ءَ چَہ وزیری ءَ دزکشی ءِ جارجنان ءَ گۤوشتگ کہ یک جنین آدمے بوگ ءِ سبب ءَ آ ایوک چَہ وزیری ءَ دزکشگ بوگ ءُ وتی زھرشانی ءَ پیتبند کنائینگ ءَ اِنت۔

مند ءَ تیرگواری ءَ چہ یک مردمے ٹپی بیتگ

2012-02-05T23:18:00.001+04:00

مند: ھالانی ردا ردا مند ءَ ناشناسیں مردمانی تیر گواری ءَ چہ سنیل خالد ٹپی بیتگ ءُ نادراھجاہ ءَ سر کنگ بیتگ۔ دنیگت ءَ وئیل ءِ سوب زانگ نہ بیتگ

نوشکی ءِ ھندءَ تیر گواری ءَ دو پنجابی آبادکار مُرتگ

2012-02-05T21:39:00.002+04:00

بام ھال ۔۔ ھالانی ردا نوشکی ءِ دمگءَ چہ سیکل سوارانی تیر گواری ءَچی دو پنجابی آباد کار مُرتگ اے کوشے ذمہ داری بلوچ آجوئی لوٹوکیں گل بی ایل اے جار کش میرک بلوچ ءَ زُرتگ ،میرک بلوچ ءَ ناشُناسیں ھندے ءَ گوانکو کُتگ گُشتگ کہ مئے اُرش تن بلوچستانءِ آزادی ءَ برجاہ ماں اَنت

بی۔ایل۔اے ءَ سئے آوار جتگیں پاکی فوجیانی عکس شنگ کُتگ اَنت

2012-02-05T13:59:00.001+04:00

کوئٹہ: بلوچ سلاہ بندیں گل بلوچ لبریشن آرمی ءَ مارگٹ ارش ءَ گوں وت بُرتگیں سئے پاکی ناپاکیں فوجیانی عکس شنگ کُتگ اَنت۔ جارکش میرک بلوچ ءَ ناشناسیں ھندی ءَ فون جنان ءَ گُشتگ کہ پاکی سرکار بلوچ سرمچارانی ارشاں بس دعوا گُشیت ، بلے ھمے شنگ بیتگیں عکساں کہ ھمے پاکی سرکار ءِ دروگ پاشک کُتگ ۔ دومی نیمگ ءَ پاکی ایف۔سی ءَ اے گپ ءِ راستی منّ اِتگ کہ یک فروری ءَ ماں مارگٹ ءَ مئے سئے کارندہ بیگواہ بیتگ اَنت ۔ آئی ءَ گُمان زاھر کنان ءَ گُشتگ کہ اے بلوچ سلاہ بندیں گلاں آوار جتگ اَنت ءُ گوں وت بُرتگ اَنت

پسنی ءَ تیرگواری ءَ دو مردم ٹپی بیتگ

2012-02-05T13:36:00.003+04:00

پسنی: بلوچستان ءِ شھر پسنی ءَ ناشناسیں مردمانی تیرگواری ءَ چہ دو دُکاندار ٹپی بیتگ۔ ایشی ءَ پد سوداگراں زھر شانی کنان ءَ دُکان ءُ بازار بند کُتگ اَنت

مرچی دگہ چار دہ بلوچ بیگواہ کنگ بوتگ ،چار زالبول ءُ چارمردین شش گونڈین زھگ اَنت

2012-02-04T21:40:00.006+04:00

بام ھال ،، ھالانی ردا مرچی دگہ چاردہ بلوچ بیگواہ کنگ بوتگ ،چہ مرواڈہءَدیم پہ شال ءَ آیوکیں یکیں حاندان ءِ چاردہ بلوچ بیگواہ کنگ بوتگ ، چار بلوچ زالبول ءُ چار مردین ءُ شش کسانین زھگ بوتگ اَنت ،کہ اے چہ مرواڈہءَ دیم پہ شالءَ آیگ ءَ بوتگ اَنت ھمُک روچ بلوچ زالبولءُ کسانیں چُک اے پاکستان ءِ دستءَ چست کنگ ءُ گار ءُ بیگواہ کنگ بؤگ ءَ اَنت

سبی ءَ بے گُناھیں بلوچانی سرا ،پاکستانی فوجے تیر گواری ءَ دو بلوچ شھید بوتگ ءُ بازیں ئے ٹپّی

2012-02-04T18:26:00.004+04:00

بام ھال ۔۔ سبّی ءِ دمگءَ پاکستانی فوجءَ بے گُناھیں بلوچانی سرا تیر گواری کُتگ،چہ اے ویلءَ دو بلوچ شھید بوتگ ءُ دگہ بازیں بلوچے ٹپّی بوتگ ، ھالانی ردا مرچی سُھبءَ سبّی ءُ بختیار آبادے نیامءَ مزنین دگ ءِ پُہل ءِ سرا وھدے بلوچ فرزندان یک جلوس ِ کُتگ ات ءُ دستبندی کُتگ ات کہ بلوچ زالبول بے گُناہ ءَ کُشگ بؤگ ءَ اَنت ،ھمے درگت ءَ پاکستانی ایف سی ءَ ھمے جلوس ءِ سرا تیر گواری کُت چہ تیر گواری ءَ دو بلوچ شھید کنگ بوتگ ءُ بازیں کسانیں زھگ ءُ زالبول ٹپّی بوتگ اَنت ،