بلوچستان ءَ انسانی حقانی لگتمالی گیش بیان اِنت' بی بی گل بلوچ

شال :  بلوچ ھیومین رائٹس آرگنائزیشن ءِ چیئرپرسن بی بی گل بلوچ ءَ وتی روتاکی بیان ءِ تہ ءَ گْوشتگ کہ بلوچستان ءَ انسانی حقانی  لگتمانی روچ پہ روچ گیش بیان اِنت ، آ اُود ءَ انسانی حقانی لگتمالی ءِ دارگ ءُ اے درگت ءَ پسو دیگ ءِ جاہ ءَ ایشی ءِ تہ ءَ گیشی آرگ بوگ ءَ اِنت ۔

سرجمیں بلوچستان گچین جھلاوان ءِ شھر خضدار ءَ فورسز سرچ آپریشن ءِ نام ءَ لوگانی تہ  ءَ پترتگ اَنت ، جنین ءُ چک لٹ داتگ ءُ ورنا آوار جتگ اَنت ءُ خضدار ءَ بازیں سالاں بیگواھیں مشتاق بلوچ ءِ برات چست کُرتگ ءُ گوں وت بُرتگ نزیکیں روچاں چَہ توتک  ءَ سداں ورنا یک گُور کنگ بوتگ ۔ اے یک گوریں میتانی دز کپگ ءَ پد ءُ دمپارہ تپاکیں راج ءِ پجیگ ءَ انسانی حقانی پانک جنیں گلاں سھی کنگ ءَ اِیں کہ بلوچستان ءَ مزنیں انسانی ھوپے اَتک کنت اگاں اے  کار دارگ مہ بنت ۔

آئی ءَ گْوشتگ کہ شال ءُ مستونگ ءَ بلوچ جنین آدمانی سر ءَ چَہ ناشرانی نیمگ ءَ تیزاپ پرریچگ ءِ کار لگوری ، انسانی حقانی لگتمالی ءُ اسلامی راھبنداں سر گّْوزگ اِنت ر پرچا کہ اسلام ءِ تہ ءَ مردین ءُ جنین ءِ حق برابر اَنت بلئے اے رنگیں کار ناشری ءِ پاشکیں نشونی ءَ دئے اَنت ۔ ما اے کار ءَ ایر جن اِیں ۔

 دومی نیمگ ءَ  مکوران ءِ دمگ شاپک ، شھرک ، سامی ، ھوشا پ ءُ آواران ءِ دمگ بزداد ، پیراندار ، ڈن سر ، خضدار ءِ دمگ کھٹان ، کوئٹہ ءِ دمگ سریاب ، نوک کاھان ، مستونگ ، اسپلنجی ، سوئی ، ڈیرہ بگٹی ، کوھلو ءُ نصیر آباد ءِ پجیگ ءَ سرجمیں بلوچستان ءَ انسانی حقانی لگتمالی بوگ ءَ اِنت ۔

ما مدام وتی روتاکی بیان ءُ گلگدارانی تہ ءَ تپاکیں راج ءُ انسانی حقانی پانک جناں لوٹوکی دیگ ءَ اِیں کہ آ بلوچستان ءَ بہ یا اَنت راستیاں بہ گند اَنت ءُ پہ ایشانی دارگ ءَ زور بہ دئے اَنت داں اد ءَ چد ءُ گیش انسانی حقانی لگتمالی مہ بیت ۔