ماسکو ءَ آزادی پسند نہ دیستگ اَنت سنگتے ءِ گندک ءَ شتگ آں'چاردہ اگست پہ شان ءُ شرپ دارگ بیت' ڈاکٹرمالک

 شال : بلوچستان ءِ کاسگ چٹیں سروزیر ڈاکٹرعبدالمالک ءَ گْوشتگ کہ ھما مردم اُستمانی سرکار ءَ ھلاس کنگ ءِ جھد ءَ اَنت ما آھاںی ھمراہ نہ اِیں ، مھلوک ءَ مارا پہ پنچ سال ءَ گچین کُرتگ ما وتی مدت ءَ سرجم کن اِیں ، چاردہ اگست ءَ ھچ نہ بیت ھمک سالانی پیم ءَ اے سال ءَ ھم چاردہ اگست گوں شان ءُ شرپ دارگ بیت ، اُستمان ءَ ھچ رنگیں ترسے نیست ۔ آئی ءَ اے ھبر گْوستگیں روچ ءَ چَہ درملک ءِ سواد ءَ آیگ ءَ پد گوں اھوالکاراں کُرتگ اَنت ۔

آئی ءَ گْوشتگ اسلام آباد ءِ موسم مزنیں کچے ءَ شر اِنت ھما مردم کہ اُستمانی راہ ءُ راھبندانی بگیردار اَنت نہ لوٹ اَنت کہ سوبمند بہ بیت ما آھاں ایرجن اِیں گوں آھاں مارا ھچ رنگیں سیادی نیست ما اُستمانی مردم اِیں ءُ دائم پہ اُستمان جھد کُرتگ ءُ پہ ایشی ءَ چَہ مسترین ءَ مستریں دیمونی داتگ ءُ دیمتر ءَ ھم دیان کن اِیں ءُ اُستمان ءَ بِھ پیچگ ءَ نہ ھِل اِیں سیاست ءِ تہ ءَ ھرچ گلے ءَ حق ھست کہ وتی ایجنڈہ ءَ پیش بہ کنت بلئے اگاں کسے ءَ اُستمان ءِ ھلاسی ءِ جھد کُرت ما آئی ءِ ھمراھداری نہ کن اِیں بلکیں اُستمان ءَ گیشتر مھکم کن اِیں ۔ ھما مردم کہ چاردہ اگست ءَ دھرنا دیگ ءَ اَنت ءُ نوکیں پاکستان ءِ جوڑ کنگ ءِ ھبر کنگ ءَ اَنت آ ردمی منی ءِ تہ ءَ اَنت چَہ مھلوک ءَ مستریں توان نیست مھلوک ءَ مارا پہ پنچ سال گچین کُرتگ ءُ ما وتی پنچیں سالاں ھرچ پیم پیلو کن اِیں ءُ ملک ءِ تہ ءَ اُستمان برجاہ اِنت ءُ برجاہ بیت اگاں کسے ءَ آمریت آرگ ءِ جھد کُرت ما آئی ءَ سوبمندی ءَ نہ ھل اِیں پرچا کہ مارا چَہ مزنیں دیمونی ءَ پد اُستمان رستگ ءُ اُستمان ءِ تہ ءَ مزنیں زورے مان اِنت ،آ زور دگہ کسی تہ ءَ نیست پرچا کہ اُستمانی راھبند ءَ کلیں شَور بنت ۔

آئی ءَ گْوشتگ کہ من ماسکو ءَ وتی جند ءِ سنگتے ءِ لوٹکی ءَ شتگ آں ءُ اے سرکاری لوٹکی یے نہ بوتگ ءُ من ماسکو ءَ ھچ بگیرداریں بلوچ گلے ءَ  گوں ھال ءُ ھبر نہ کُرتگ ۔