بلوچ جیڑہ ءِ گیشوار ءَ گوں پاکستان ءَ گپ ءَ ابید راہ نیست ' سلیمان داود

بلوچستان ءِ گْوستگیں  خان کلات ءِ بچ سلیمان داود ءَ پہ بلوچستان ءِ جیڑہ ءِ گیشوار ءَ  جھانی توان ءِ ھم منندی ءَ گوں پاکستان ءَ گپ ءُ تران ءِ سوج داتگ
۔
 آئی ءَ اے ھبر گوں برٹش رسانکدر بی بی سی ءَ گپ کنان ءَ کُرتگ اَنت ۔ آئی ءَ گْوشتگ ۔ گْوستگیں ھپتاد سال ءَ بلوچانی  پاکستان ءِ سر ءَ ناباوری گیش ءُ تالان بوتگ ۔ اے میان ءَ مارا چَہ وتواجھی ءَ بندگی ءَ رسینگ بوتگ  ءُ پہ اے دراجیں پند ءِ بُرگ ءَ روچے نہ گْوستگ  بلکیں ایشی ءَ ھپتاد سال اِنت ۔ بلئے ما گْوشتگ کہ اگاں پاکستان گوں ما گپ ءُ تران لوٹ اِیت میانجی ءَ ذمہ واری زیروکے بہ بیت ، توری امریکہ ،یوکے  یا یورپی یونین بہ بیت ھمیشانی دیم ءَ ھر دو وتی ھبراں بہ گْوش اَنت چَہ ایشی ءَ ابید من دگہ راہ نہ گند آں ۔

آئی ءِ جھد ءِ تہ ءَ کرد چی اِنت اے درگت ءَ آئی ءَ گْوشتگ کہ منی سیادی گوں بلوچ راج ءُ سرزمین ءَ اِنت ءُ اے جھد ءِ تہ ءَ ھرکس ءَ اے حق ھست کہ آ وتی دیپمانی ءَ بہ کنت ۔

آئی ءَ گْوشتگ کہ انیگیں باھندءُ زْرمبش چَہ گْوستگیں چاریں باریگ ءِ جنگاں چَہ اے ھساب ءَ گستاَئی کنت کہ  آ وھدی زانشت اینکس نہ بوتگ ءُ نی رسانکدر ءُ انٹرنیت ھست کہ چر ایشاں ھچ چیز چیر دیگ نہ بیت ۔

آئی ءَ گْوشتگ کہ ما لوٹ اِیں روکپتی ملک پاکستان ءَ کمک مہ کن اَنت ءُ بلوچستان ءَ انسانی حقانی لگتمالی ءَ دلگوش بہ دئے اَنت ۔

آئی ءَ گْوشتگ من وتی جھد ءَ کچے ءَ سوبین بوتگ آں ۔ دوسال پیش تپاکیں راجمان ءِ انسانی حقانی لگتمالی ءِ ھیومن رائٹس کونسل ءِ دیوان ءَ چَہ بلوچستان ءِ سبب ءَ نود ءُ ھپت ملکاں پاکستان ءِ سر ءَ انسانی حقانی جاور ءَ ایراد گیپتگ ۔ ھمے پیم امریکی گانگریس ءَ ھم دوھزار دوازدہ ءَ بلوچستان ءِ سرھال ءَ دیوان بوتگ ۔

آئی ءَ گْوشتگ کہ ما وتی کیس ءَ مھکم کنگ ءَ اِنت ءُ زیت چَہ پاکستان ءِ نیمگ ءَ انسانی حقانی نہ منگ ءِ کارپد دیم ءَ کَہ ینت ۔ پاکستان ءَ زند ءِ ھچ اَرزش نیست وھدے جھانی آمیدگس ءَ زوراکی ءُ ناروائی کنوکاں ڈنڈ رس اِیت گڑا پاکستان ءِ ھستیں کرد جوانی ءَ دیم ءَ کَہ اِت ۔