ڈاکٹرمالک ءِ واھگانی پد ءَ کیچ ءَ لشکری اُرش اِنت' بی این ایم

کیچ: ڈاکٹر مالک ءِ واھگانی پد ءَ کیچ ءَ لشکرکشی اِنت ، شھیدانی مانش پُروشگ ءُ گس آس ماندارگ ءُ مردم آوار جنگ بوتگ اَنت.

بلوچ نیشنل موومنٹ ءِ بنجاھی جارکش ءَ کیچ ءَ ڈاکٹر مالک ءِ لوٹ ءِ پد ءَ زورگرانی اُرش تْرندی ءَ ایر جتگ ءُ گْوشتگ پاکستان آرمی ،ایف سی ءُ ھندی مُزگریں دژمنانی دلاریں کشندھاں تجابان،شھرک ءُ ھیرونک ءِ کوہ دامناں نشتگیں بلوچانی سر ءَ اُرش کُرتگ ،مال مڈی پچ گیپتگ ءُ مردم آزار داتگ اَنت.

بنجاھی جارکش ءَ گْوشتگ کہ کاسگ چٹیں پارلیمان ءَ بندوکیں دلارانی سروکی ءَ کیچ ءَ لشکرکشی روچ پہ روچ نوکیں رنگے زورگ ءَ اِنت. بانگواہ ءَ چَہ ھوشاپ کیمپ ءُ کیچ ءَ اَتکگیں زوگریں لشکریاں شاپک ءِ سر ءَ اُرش کُرتگ لوگ بُن داتگ اَنت ءُ مردمانی مال ءُ مڈی بُرتگ اَنت. ھمے میان ءَ زورگریں لشکریاں کچکول علی بھار ءُ شھیداکرم شھزاد ءِ اَدیرہ ھم پُروشتگ اَنت چَہ ایشی ءَ پیش شھید کچکول علی بھار ءِ لوگ گوں ڈائنامائٹاں پُروشتگ ءُ چک ءُ جنین جتگ اَنت.یک آروسی مراگشے ءِ سر ءَ ھم اُرش کُرتگ ءُ مردم لٹ جتگ اَنت . چک جنین ٹپی کُرتگ اَنت ءُ لھتے بلوچ دزگیر کُرتگ .

دژمن ءِ دزگیر کُرتگیں مردمانی تہ ءَ نثاراحمد ء میران ،بالاچ،ماسٹر جاوید ء جمال ، حسن ء جمال ،ماسٹر سدھیر ء  قاسم ،  ماسٹر عصا ء گنگُزار ءُ حسن ء عبدالرحمن ھوار اَنت.

زورگریں لشکریاں کوھانی سر ءَ بمب گْورتگ چَہ ایشی ءَ کوہ دامنی مردمانی تاوان رسگ ءِ گمان اِنت. بلوچ زالبولاں ھوشاپ مزن دگ ءِ سر ءَ نندانک داتگ ءُ لشکریانی بگیری ءَ زھر دْرشانتگ.

بی این ایم ءِ جارکش ءَ گْوشتگ کہ ڈاکٹر مالک گوں وتی پارلیمانی ٹک ءُ ریاستی مُزواریں کشندھاں بلوچانی چکچین ءَ بلکیں وتی سوب سرپد بیت  بلئے مہ شموش اَنت کہ زوگر گوں آھاں دست ءِ مھجول ءَ گوازی کنگ ءَ اِنت ءُ دپتر ءِ تاکاں بدیں نام ءَ زانگ بنت.