شامی مزن وزیر گوں سئے وزیراں ھوار بشار سرکار ءَ دزکش بیتگ

بام: درملکی رسانکی ھالانی ردا شامی مزن وزیر ریاض حجاب گوں دگہ سئے سرکاری باسکاں ھوار چہ بشار الاسد سرکار ءَ دزکش بیتگ ءُ اردن سر بیتگ۔

گوستگیں روچ ءَ  شامی سرکار ءِ چیریں کارگس ءِ پولیٹیکل  سیکیورٹی ءِ  انفارمیشن ڈویژن ءِ  سروک  کرنل یعرب شرع ءُ  فوجی باسک جنرل محمد احمد فارس چہ وتی اگدھاں دزکش بیتگ اَنت ءُ  ترکی ءَ سر بیتگ اَنت۔  اے سئیں  سرکاری باسک ماں شامی شھر ‘‘حلب‘‘ ءَ بشار لشکر ءِ  گوں ٹینک ءُ جنگی گُراباں ترندیں بمب گواری  ءَ چہ پد سرکاری اگدھاں دزکش بیتگ اَنت۔

شامی سرکاری ٹی۔ وی  ءِ ردا مزن وزیر ریاض حجاب  یاگیانی پلہ  مرزی ءِ آسرا چہ اگدہ ءَ کشگ بیتگ ءُ آ اردن ءَ چہ عمان  ءَ سر بیتگ۔

شامی شھر ‘‘حلب‘‘ ءَ آشوبی یاگی ءُ بشار لشکر ءِ میان ءَ جنگ ءُ چوپ یکشلا برجاہ اِنت ءُ  درملکی رسانکدر ءِ ردا بشار لشکر ءِ بمب گواری ءَ چہ یک یاگی کمانڈرے  بیران بیتگ۔