حلب، بشار لشکر ءِ بمب گواری جاری، یاگی پَد کِنز اِتگ اَنت

مزن ھور: شام ءِ شھر حلب  ءَ یاگی بُنجلانی سرا بشار لشکر ءِ بمب گواری یکشلا برجاہ اِنت۔ آیوکیں وھد ءَ بشار لشکر ءِ نیمگ ءَ گیشیں اُرش ءُ بمب گواری ءِ گمان زاھر کنگ بوتگ، ءُ یاگیانی نیمگ ءَ ھم ھمے نشون رستگ کہ آ  پہ مزنیں جنگی ئے ھاترا وت ءَ ساڑی کنگ ءَ اَنت۔بشار لشکر ءِ گُشگ ءِ ردا یاگی چہ بازیں بُنجلاں جنَگ ءُ تاچینگ بوتگ اَنت۔  وھدیکہ یاگیانی جارکش ءِ ردا آھاں وتی نگھداری ءِ ھاترا لھتے ھند یلہ داتگ اَنت۔

رسانکی ھالانی ردا شامی شھر حلب ءَ یاگیانی بُنجلانی سرا بشار لشکر ءِ اُرش یکشلا برجاہ اِنت ءُ بشار لشکر ءِ نیمگ ءَ  ٹوپ، جنگی گُراب ءُ گن شپ  ھیلی کاپٹر کارمرز کنگ بیتگ اَنت

شامی سرکار ءِ ردا یاگیانی بازیں بنجل تباہ کنگ بوتگ ءُ  یاگی تاچینگ بیتگ اَنت ءُ زوت دست ءَ دراَتگیں ھند  دوبر دست ءَ آرگ  بنت، وھدیکہ یاگیانی ردا جنگ برجاہ اِنت ءُ بازیں ھنداں یاگیاں سوبمندی رَستگ ءُ سئے پولیس بُنجل یاگیانی دست ءَ اَتکگ اَنت ءُ پہ گیشیں جنگ ءِ ھاترا یاگی وت ءَ ساڑی کنگ ءَ اَنت۔۔۔