بدنی تکلیفانی آماچی ءَ چہ زھگ ءِ ”ذھنی“ ردوم ءِ تھا کمے کئیت۔ سائینسی رپورٹ

بام: تب زانشی زانتکارانی گُشگ ءِ ردا کسانی ءَ اگاں گونڈلیں زھگ ءَ بدنی تکلیف ءُ ٹارچر دیگ بہ بیت تہ چر ایشی ءَ چہ زھگ ءِ بدنی دیمروئی ءَ ھوار ”ذھنی‘‘ دیمروئی ءَ ھم کمے کئیت۔ زانتکارانی گُشگ ءِ ردا چر ایشی ءَ زھگ سِلکار ءُ ترند تب ءُ چاگردی ھرابکاریانی آماچ بیت۔

کینیڈا ءِ ”یونیورسٹی آف مینی ٹوبا“ ءِ ” ڈپارٹمنٹ آف فیملی سوشل سائنسز“ ءِ ڈاکٹر جان ڈرنٹ ءُ اونتاریو ءِ زھگانی نادراھجاہ ءِ ڈاکٹر ”ران اینسم“ ءِ گُشگ ءِ ردا درکسانی ءَ وھدی زھگاں پہ بے سمائی گِس ءِ مردم ءُ مات ءُ پتانی نیمگ ءَ بدنی تکلیف ءُ سزا دیگ بہ بیت تہ چرایشی ءَ چہ زھگ ذھنی پدمنتگی ءِ آماچ بیت ءُ دیم ءَ چاگردی سلکاریانی آماچ بیت کنت۔ آھاں مات ءُ پتاں چہ ھمے دزبندی کُتگ کہ درکسانی ءَ زھگان ءَ بدنی ٹارچرانی آماچ کنگ مہ بیت ءُ زھگ نگھدارگ بہ بنت۔

دوئیں زانتکارانی ردا زھگان ءَ لَٹ ءُ کُٹ کنگ ءُ جنگ ءُ چوپگ زھگانی ذھنی پدمنتگی ءَ ھوار ، زھگانی ذھنی نادراھیانی سوب ھم جوڑ بیت کنت۔ چرایشی ءَ چہ زھگ  دُزی، نشہ ءُ شراب واری ءِ آماچ بیت ءُ زھگ ءِ آیوکیں وھد تباہ ءُ برباد بیت۔