بیست ءُ شش اگست ، نمیرانیں بلوچ رھشون نواب اکبر خان ءِ ششمی سالروچ

بام: باندا 26 اگست  نمیرنیں بلوچ رھشون نواب اکبر خان ءِ ششمی سالروچ اِنت۔ بلوچ نامئیں رھشون جُھد آجوئی ءِ سرخیل  شھید واجہ  نواب اکبر خان بگٹی ءَ شش سال پیش  26 اگست 2006 ءَ بلوچستان ءِ ھند کوھلو ءِ دمگ ”تراتانی‘ ءَ گوں پاکستانی قبضہ گیریں لشکر ءَ دیم پہ دیمی  جنگ کُت ءُ نمیران بوت۔ 

نواب اکبر خان بگٹی بلوچ راجدپتر ءِ ھما نام اِنت کہ آئی ءَ اے  قبضہ گیر، ناپاکیں لشکر ءِ دیم ءَ پہ تمردی  جنگ کُت ءُ 26 اگست 2006 ءَ زالم لشکر ءِ آپریشن ءِ آسرا شھید بوت ءُ پہ پدریچاں کِشکے  رست ئے۔۔۔ پہ بلوچ راج ءَ نواب اکبر خان بگٹی ھما سِمبل اِنت کہ آئی ءِ داتگیں یات بلوچ اوبادگانی دل ءَ پہ مدامی نکش اِنت ءُ ھمے نکش اِتگیں رھبند ءِ سکین ءَ بلوچ وتی وشیں باندات ءُ وتی بُرتگیں گُلزمین ءِ دوبر آجو کنگ ءَ پہ مدامی ھمے رھبند ءِ سرا گام جنان ءَ روت۔۔

اگاں ما پہ راستی بچاریں تہ ھمے زانگ بیت کہ اکبر خان دژمن ءِ جوڑینگیں پندلانی دیم ءَ ھما بند بیتگ کہ اے رستریں لشکر ءَ ھر وھد ءَ آئی ءِ شھید کنگ ءِ توجیل سازاِتگ۔ 1990 ءَ بگر تاں شھادت ءَ دُژمنیں ریاست ءِ جھد ھمے بیتگ کہ آ اکبر خان ءَ چہ راج ءَ جتا بہ کنت۔ اے گپ ءِ پدرائی نواب اکبر خان ءَ 6 جولائی 2006 ءَ بی بی سی ءَ ھالترانے ءَ کُتگ کہ

” دُژمن ءَ گوستگیں ھپدہ سال اِنت کہ منی شھید کنگ ءِ رندا تچگ اِنت ، بلے بے سوب بیتگ“

ایشی ءَ چہ زانگ بیت قبضہ گیریں لشکر 1990 ءَ پد یکوی کماش اکبر خان ءِ شھید کنگ ءِ سرا بوتگ۔ اکبر خان ءَ اے گپ مارتگ۔

گُشنت کہ جوانیں راجی رھشون راجی مشکلانی وھد ءَ مزنیں فیصلہ کن اَنت۔ نواب اکبر خان بگٹی ایردستیں راجانی ھما ٹوھیں رھشونانی سرپ ءَ ھوار اِنت کہ تاریخ ءِ تھا آ پہ مدامی گیر آرگ بیت۔ مرگ بنی آدم ءِ زند ءِ ھمراہ اِنت۔ انسان ءَ الم مرگ لوٹیت۔ بلے زندگ اَنت ھما نمیرانیں سر کہ آ وتی پُشت ءَ تاریخی جوڑ بہ کن اَنت۔ جھان ءِ بازیں انسان تاریخ ءِ بھر بنت، بلے اکبر خان بگٹی ھما نمیرانیں انسان ءَ گوں ھساب بیت کہ آھاں راجدپتر ٹھینتگ۔۔۔۔۔

دْژمن ءَ نواب اکبر خان شھید کُت  ءُ دل ءَ جزم بوت کہ من اکبر خان کُشتگ، بلوچ راجی جنز پروش داتگ۔ بلے دُژمن اے گپ ءَ سرپد نہ اَت کہ اکبر خان ءِ وڑیں انسان کدی نہ مِر اَنت۔ تاریخ ءِ تھا مدام زندگ ماننت۔۔

جھان ءِ تاریخ ءَ بازیں زوراک گوستگ اَنت کہ آھاں وتی پُشت ءَ زُلم ءِ داستان اِشتگ۔ بلے مرچی تاریخ ءَ آھانی نام نشان نیست اَنت۔ بلے زندگ اَنت ھما کس کہ آھاں ھر دؤر ءُ ھر زمانگ ءَ زلم ءُ زوراکی ءِ ھلاپ ءَ جنگ کُتگ ءُ وتی سر بکشاتگ اَنت کہ آھانی تھا ڈاکٹر چے گویرا ءُ جھان ءِ دگہ بازیں سر ھوار اَنت کہ آھاں تاریخ ءِ دلبند ءَ نام اِشتگ ءُ آھانی فکر ءُ لیکہ پہ جھان ءِ ایردستیں راجاں ڈستگیں راھے۔ اکبر خان گوں ھمے سرا ھوار اِنت کہ راجدپتر ءِ تھا پہ مدامی زندگ مانیت ءُ نمیران اِنت۔ کماش اکبر خان ءِ ڈس اِتگیں رھبند پہ بلوچ اوبادگاں آجوئی ءِ مستاگے ءِ بستار ءَ داریت۔ آ وھد دیر نہ اِنت اے استان ءِ نام ءُ نشان ھم پشت نہ کپیت۔ چیاکہ اے راجدپتر ءِ راستی ئے کہ زلم آخر پروش وارتگ ءُ ظالم تباہ ءُ برباد بیت۔۔۔

کماش اکبر خان بگٹی زندگ اِنت۔ اکبر خان ءِ نام بلوچ راج ءِ دلانی زیمراں گوں ھوار اِنت