نود ءُ نودرسد بلوچ پاکستان ءِ غلامی ءَ نہ لوٹ اِیت ءُ یک درسد بھا بوتگ ' ھیربیار
Monday, July 23, 2012
لندن : بلوچ راھشون ھیر بیار مری ءَ گْوشتگ کہ پاکستان ءِ نوک گچین بوتگیں سر وزیر چَہ بلوچاں پاکستان ءِ بیرک ءِ شرپ کنگ ءِ گپ ءَ جنت وھدے کہ آ شموشتگ کہ نوزدہ سد ءُ چل ءُ ھشت ءَ بلوچستان ءِ بیرک دور دئیگ ءُ آ اُود ءَ پاکستان ءِ بیرک منڈینگ بوتگ ۔ بلوچستان ءِ بیرک ءِ کم شرپی کنوکیں پاکستانی فوج ءُ بیوروکریٹس چَہ بلوچاں پاکستان ءِ بیرک ءِ شرپ ءُ سلامی ءِ اُوست ءَ مہ بند اَنت ۔
ھیربیار ءَ گْوشتگ پاکستان ءِ نوکیں سروزیر آزادی پسندیں بلوچانی ریپینگ ءِ بدل ءَ وتی نوکری ءِ سدھ ءَ بہ بیت ۔ پاکستانی بیوروکریٹس ، ایجنسی ءُ واکدار چَہ رسانکدر ءِ کمک ءَ پہ دنیا ءِ ریپینگ ءَ مدام دروگ ءِ کمک زوران اَنت ۔
گّوستگیں روچاں چَہ پاکستان نیشنل ڈیفنس یونیورسٹی ءِ نیمگ ءَ پاکستانی فوجی جنرل لیفٹینٹ عمر فاروق ءَ وتی لھتیں کاسگ چٹ مُچ کرتگ ءُ کانفرنس کرتگ ءُ گْوشتگ کہ بلوچستان ءِ نود ءُ پنچ درسد مردم پاکستان پرست اَنت ءُ بلوچستان ءِ آجوئی ءَ نہ لوٹ اَنت ۔ ما چر آَئی ءَ جست کنگ لوٹ اِیں کہ اے ھساب ءُ شمار آئی ءَ چَہ کجا آورتگ اَنت ۔ پاکستانی پارلیمان ءَ نندوکیں وزیر بلوچ راج ءِ جھگیر نہ اَنت بلکیں بلوچ راج ءِ جھگیر ھما اَنت کہ زندانانی تہ ءَ سکی کشگ ءَ اَنت ، شھید بوتگ اَنت ءُ اے وھدی جھد ءِ پڑ ءَ ھوار اَنت ۔ لاھور، اسلام آباد ءُ پنڈی ءَ نندوک ءُ بلوچانی باندات ءِ شوربندوک زمینی جاوراں سرپد نہ اَنت ۔ راستی اِیش اِنت کہ نود ءُ نو درسد بلوچ پاکستان ءِ غلامی ءَ نہ لوٹ اِیت ایوک ءَ یک در سد ءُ چَہ ایشی ءَ کمتر انچیں مردم اَنت کہ پاکستان ءِ دست ءَ بھا بوتگ اَنت پمیشکا زورگریں ریاست وتی کلیں ریاستی واک ءُ آسراتیانی کارمرد کنگ ءَ ابید ھم چَہ بلوچانی دل ءَ بلوچ راج آجوئی ءِ لوٹ ءُ جوش ءَ ھلاس کنگ ءَ سوبمند نہ بوتگ ۔
پاکستان ءَ وتی کاسگ چٹیں نامے بلوچ وزیر لب ءُ لالچ داتگ اَنت ءُ آھاںی وفاداری بھا زرتگ اَنت پمیشکا آ ٹی وی ٹاک شوز ءُ روتاکی بیانانی تہ ءَ وتا پاکستانی گْوشگ ءَ اَنت ، پہ ووٹ، الیکشن ءُ کرسی ءَ وتی راجی پجار اِش پُشت جتگ ۔ پہ زر ءِ لب ءَ شموشتگ اَنت کہ آھانی واجہ آئی سی یو ءَ ساہ کندن ءَ اِنت ۔ ھما روچی آکسیجن رسگ ئِے بند بوت پاکستان ءِ ساہ ھم اُوشت اِیت ۔ بلوچ ءَ میان اُستمانی تک آگاہ کرتگ کہ اے وھدی توامیں بلوچ راج یکجا پہ آجوئی ءَ جھد ءَ اِنت ۔ پاکستان ءِ چیریں ادارہ ھزارھاں بلوچ پسگانی آوار جنگ ءُ ھزارھاں شھید کنگ ءَ چَہ آھانی دل ءَ وتی ماتیں گلزمین زگریں مِھر ءَ پُل اِت نہ کنت ۔
آئی ءَ گْوشتگ پاکستان بلوچ راج ءِ سر ءَ چَہ گْوستگیں یک دھکے ءَ بے جار ءَ لشکرکشی کنگ ءَ اِنت ۔ بلوچ راج ءِ ایرموش کنگ ءَ پاکستان ءِ بالی ءُ زمینی فوج ھوار اَنت ءُ دومی نیمگ ءَ آ اربھاں کلدار وتی کاسگ چٹ ءُ ڈیتھ اسکواڈ ءَ بھر کنگ ءَ اَنت کہ آ ھرچ تک ءُ ٹک ءِ مردماں گچینگ ءَ پد آوار جنگ ءُ شھید کنگ ءَ اَنت ۔ پُردم کنوکیں ھبرے کہ بلوچ راج آشونی پگر ءُ سنچداریں رنگے ءَ آ توامیں دژمنانی دیمپانی کنگ ءَ اِنت ۔ ما لوٹ اِیں کہ میان اُستمان بلوچ چکچینی ءُ بلوچستان ءَ انسانی حقانی لگتمالی ءِ سر ءَ بے تاھیری دْرشان کنگ ءَ گیش کار بہ کنت ۔
آئی ءَ درور دیان ءَ گْوشتگ کہ ما اُوست بند اِیں کہ انچوش مروچی سوریہ [ شام ] ءِ ایرجنگ ءَ تپاک راجیں گل ءَ یک نوکیں مسامبندی یے پیش کنگ بوتگ، بلوچستان ءِ نوفلائی زون کنگ ءَ ھم تپاک راجیں گل ءَ مسامبندی کار اَنت ۔ وھدءِ لوٹ اِنت کہ دنیا بلوچستان ءِ راجی پجار ءُ زمنی یکجاھی ءَ بہ من اِیت ءُ بلوچ آجوئی زْرمبش ءِ پلہ مرزی ءِ جار ءَ بہ جنت ۔ پرچا کہ چَہ دھشت گردی ءِ اے مِین ءِ تہ ءَ درکپگ ءَ آزاد بلوچستان ءِ جوڑ بوگ تیوکیں اُوست ءِ شھم اِنت ۔ اگاں میان اُستمان ءَ اے موہ چَہ دست ءَ روان دات گڑا بہ گندئے آھآں اوگانستان ءُ دنیا ءِ دگہ مذھبی ملکاں پاکستانی مذھبی دھشت گردی ءِ مز داں آیوکیں بازیں دھکاں دئیگ لوٹ اِیت ءُ پاکستان نود ءِ دھک ءِ پیم یک رندے پد ءَ وتی دھشت گردیں نیٹورک ءَ اوگانستاں ءَ مھکم کنگ ءَ پد دنیا ءِ ھرچ کنڈ ءَ تالان کنگ ءِ جھد کنت ۔
Comments[ 0 ]
Post a Comment