شال : ھنکین یازدہ اگست ءَ پُل اِتگیں آزادی ءِ درگت ءَ آگھی دیوان بہ کن اَنت ' بی این ایم

شال : بلوچ نیشنل موومنٹ ءِ جارکش ءَ گْوشتگ کہ گْوستگیں کرن ءِ نیم ءَ دنیا ءِ نکش ءَ بازیں آزاد ریاست جوڑ بوتگ رند ءَ نوکتریں نوک آبادی نظام ءِ پد ءَ آھانی آجوئی پچ گرگ بوتگ ۔ ھمے پیم یازدہ اگست نوزدہ سد ءُ چل ءُ ھپت ءَ بلوچستان چَہ برٹش ءِ چیردستی ءَ آجو بوتگ ۔ ائی ءِ لھتیں ماھاں پد میان اُستمانی پندلے ءَ بیست ءُ ھپت مارچ نوزدہ سد ءُ چل ءُ ھشت ءَ نوک جوڑ بوتگیں پاکستان ءَ بلوچستان ءِ دستیگ کنگ ءِ راھے شون دئیگ بوت ۔

بی این ایم ءِ کلیں ھنکین یازدہ اگست ءَ پچ گیپتگیں آجوئی ، بلوچ راج زْرمبش ءِ درگت ءَ زانشتی دیوان ایر کن اَنت ۔ نودربریں جھدکار ءَ دپتر، بلوچ دپتر ءُ زمینی تک ءُ پھناتانی درگت ءَ آگاھی دئے اَنت ۔

جارکش ءَ گْوشتگ کہ زورگریں ریاست پہ گچینکاری ربیدگ ءِ پیلو کنگ ءَ انچیں مردم دیم ءَ آرگ ءَ بے سوب اِنت کہ آھاں مردم دوست بہ کن اَنت ۔ آئی ایس آئی وتی کارمنداں راجی ءُ اُستانی اُمیدوار ءِ ھساب ءَ دیم ءَ آرگ ءِ جھد ءَ اِنت کہ ریاستی واڑانی تہ ءَ زند گْوازنیگ ءَ اَنت آ راستیں جاوراں سرپد نہ اَنت ، جاور ءُ جنجالاں سرپد نہ بیوکیں مردم ریاست ءِ دلپسندی اَنت ءُ پروٹوکول جھگیراں چَہ مردماں سند اِیت آھاں مھلوک ءِ تہ ءَ دوست نہ بیت ءُ آھاںی لوگ ءِ مردم ھم آھانی پلہ مرزی نہ کن اَنت ، بلوچ راج پاکستان ساچیں ھرچ وڑیں گچینکاریانی بائیکاٹ بہ کن اَنت ۔

آئی ءَ گْوشتگ کہ دوھزار ھشت ءِ گچینکاریاں ھرچ جھگیرے کہ اسمبلیاں شتگ آھاں بلوچ راج ءَ ووٹ نہ داتگ بلکیں زورگریں فرشتگاں پہ آھاں ووٹ کاسٹ کرتگ ۔ سنچداریں بلوچ گچینکاری باوستانی تہ ءَ بھر زورگ پہ وتا ضمیرکُشی سرپد بنت پرچا کہ نظام ءُ نظریہ بندر ءَ ترام اِتگیں [ ترتیب داتگیں ] گچینکاریاں تشے ھم بھر زورگ ءَ انسان ملامتی ، تبی مان اَڑ ءُ دوگانگی ءِ آماچ بیت ءُ ضمیر ملامت ءِ آماچ بیت ۔