سویڈن، عالمی مھلوک بلوچ آجوئی جھد ءِ پلہ مرزی ءَ بہ کن اَنت۔ بلوچ رھشون

سویڈن: سویڈش پارلیمنٹ ءَ بلوچستان ءِ جاورھال ءُ ماں بلوچستان ءَ انسانی حقانی لگتمالی ءِ سرھال ءَ برجم داشتگیں مراگش ءَ بلوچ رھشون واجہ خیر بیار مری ءَ عالمی مھلوک دزبندی کنان ءَ گُشتگ کہ سویڈش الس ءَ ھوار عالمی مھلوک بلوچ جھد آجوئی ءِ پلہ مرزی ءَ بہ کن اَنت۔ واجہ خیر بیار مری ءَ گُشتگ سویڈش الس ءَ سرجمیں سیاسی، ثقافتی ءُ قانونی حق رسگ ءَ اَنت بلے بلوچ ءِ سرجمیں حق پُلگ بیتگ اَنت۔ بلوچ جند ءِ گُلزمین ءَ درامد کنگ بیتگ ءُ بلوچاں وتی جند ءِ گُلزمین ءَ وتی ماتی زبان ءِ کارمرز کنگ ءِ حق ھم دئیگ بوئگ ءَ نہ اِنت۔ دردناکیں گپ اِنت کہ بلوچی زبان ءِ سرا بلوچستان ءَ چہ گیش سویڈن ءَ گیشتر پَٹ ءُ پول بیئگ ءَ اِنت۔ آئی ءَ تران کنان ءَ گُشتگ کہ بلوچ ءِ چک چینی ءِ کار برجاہ اِنت ءُ بلوچستان ءَ ھما زلم ءُ زوراکی بیئگ اِنت کہ دُنیا ءِ دگہ جاھاں مثال کم اِنت۔ واجہ خیر بیار مری ءَ سویڈش الس ءَ ھوار سرجمیں عالمی مھلوک ءَ گوں دزبندی کُتگ کہ آ بلوچ جھد آجوئی ءِ پلہ مرزی ءَ بہ کن اَنت۔۔بلوچ رھشون واجہ خان آف کلات ءَ برجم داشتگیں مراگش ءَ تران کنان ءَ گُشتگ کہ بلوچ ءِ گُلزمین ءِ سرا پہ زور قبضہ کنگ بیتگ۔ ایران بہ بیت یا پاکی استان، دوئیں نیمگاں بلوچ ءِ چُک چینی ءِ کار برجاہ اِنت۔ خان آف کلات ءَ گُشتگ کہ عالمی مھلوک ماں بلوچستان ءَ ایرانی ءُ پاکی لشکر ءِ زُلم ءُ زوراکیاں پوہ ءُ سرپداں، بلے انچو گُشئے  کہ پاکی استان ءُ ایرانی لشکر ءَ زُلم ءُ زوراکی ءِ موہ دیگ بیتگ۔ بلوچ رھشون ءُ بی۔این۔پی ءِ سروک واجہ اختر مینگل ءَ مراگش ءَ تران کنان ءَ گُشتگ کہ ماں بلوچ راج ءِ سرا زُلم ءُ زوراکی ءِ کِسہ ھما وھد ءَ بندات بیتگ کہ وھدی 1948 ءَ پاکی لشکر ءَ پہ زور بلوچستان آوار جتگ ءُ بلوچستان ءِ آجوئیں بستار ھتم کُتگ ءُ بلوچ ءِ سیاسی ءُ چاگردی ءُ قانونی حق پچ گِرگ بیتگ اَنت، بلوچ راج ءِ سرا روچ ءِ مروچی زُلم ءُ زوراکی برجاہ اِنت۔۔اختر مینگل  ءَ گُشتگ کہ اے زلم ءُ زوراکی ءِ گیشوار اِش اِنت کہ عالمی مھلوک دزمانجی بہ کنت۔ آئی ءَ گُشتگ بلوچ راج ءَ راجی وتواکی ءِ حق است اِنت۔ ”راجی وتواکی” ءَ چہ مئے مول ءُ مراد آوار جتگیں زمین ءِ مکملیں آجوئی اِنت ءُ دومی راجانی وڑا وت واجھی ءِ حق اِنت۔ سویڈش پارلیمنٹ ءِ مراگش بلوچ سیاسی کارندہ محمد زین الدین ءِ جھدانی منت ءَ برجم دارگ بیتگ۔ مراگش ءِ مول ءُ مراد عالمی مھلوک ءَ بلوچستان ءِ جاورھانی سرا سرپدی دیگ ءُ بوتگ۔