آئن اسٹائن ءِ راستی
Wednesday, April 04, 2012
انسانی راجدپتر ءِ ٹوھیں کواس آئن اسٹائن 1905 ءَ وھدیکہ وتی ابدمانیں لیکہ اضافیت”(Theory of relativity) دیم ءَ آؤرت تہ ھما وھد ءِ سائنسی رھبنداں لرزگے چیر کپت۔ آئن اسٹائن یک ھساب دانی اَت۔ آئی ءَ وتی لیکہ ریاضی ءِ ڈس اِتگیں رھبندی ءِ دروشم ءَ پیش کُت، بزاں (E=mc2)..... آئن اسٹائن ءِ اے لیکہ آئی ءِ ماژگی جُھد ءُ کوشستانی ثمرو اِنت۔ آئی ءِ اے لیکہ ھمینکہ گران ءُ زمینی وھد ءُ پاسانی گپچِرّاں چکار ءُ مانگیش اِتگ اِنت، سائنسداناں ایشی ءِ سرپد ءُ پوہ بیئگ ءَ بازیں وھد درکار بیتگ۔ بلے آئن اسٹائن ءَ ابئید تجربگ ءُ چار ءُ تپاس ءَ وتی سما ءُ ھیالانی ردا ھما لیکہ کہ دیم ءَ آؤرتگ تہ آ راستیاں لھتے اِش انت۔۔۔۔1۔ رُژن ءِ گام یک سکینڈے ءَ سئے کروڈ کیلو میٹر اِنت۔ ءُ دگہ ھچ زاھریں چیز(METTER) اے گام ءَ سفر جت نہ کنت۔
2۔ بدن ءِ انرجی (ENERGY) ءِ گیشی پھنات(MASS) ءِ گیشی ءِ سوب جوڑ بیت، بزاں تچوکیں گاڑی ءِ MASS چہ اوشتوکیں گاڑی ءِ MASS ءَ گیش بیت۔۔۔۔۔
3۔ تیزگامی ءِ سھت ءَ بدن "body" ءِ دراجی کم بیت، بلے اے کمی ھما نیمگ ءَ بیت کنت کہ ھما بدن پہ پہ تیزی تچگ اِنت۔۔
4۔ وھد(Time) ءَ وجود نیست۔ وھد ءِ راستی ءَ کس پوہ بیت نہ کنت۔۔۔۔۔۔۔۔۔
آئن اسٹائن ءِ ڈس اِتگیں فارمولہ E=MC2 ءِ ردا بدن (MASS) ءِ نابود بیئگ ءَ چہ ھما ”انرجی” ئے کہ دز کپیت آئی ءِ کساس ایش اِنت۔
30000000000 X 30000000000 = 9x1020 Erg = 9X1013 J
= 25000000 Kw-hr
= 25000000 Kw-hr
اے کساس ءِ ردا اگاں کسے ءِ گِس ءِ ماھواری بِل سد یونٹ بہ بیت تہ ایشی ءَ رستگیں انرجی آئی ءَ بیست ھزار سال ءَ بس اِنت۔۔۔۔۔۔۔۔۔۔۔۔
کساس ءِ ردا ایٹم بم باز بیمناکیں بلے ھمے انرجی ءَ چہ دز کپوکیں ھائیڈروجن بم چِد ءُ گیش بیمناک تر اِنت۔۔۔۔۔۔۔
آئن اسٹائن ءِ ھمے گُشتگیں راستی اَنت کہ روچ ءِ مروچی ھم نوکیں دؤر ءِ سائنس گوں نوکیں تجربگی ئے اوزاراں اِشاں رد کُت نہ کنت۔
نو من ”وائس آف امریکہ” ءِ ردا آئن اسٹائن ءِ بابت ءَ لھتے راستی دیم ءَ آرگ لوٹاں۔۔۔۔۔۔۔۔
”آئن اسٹائن ءِ لیکہ ”اضافیت ”(Theory of relativity)” ءَ کرنے پِر گوستگ، باز جوانیں اوزار ءُ آسراتیاں ابئید ھم نوکیں دؤر ءِ سائنسداناں اے لیکہ یک تُشی ھم رد کُت نہ کُتگ اَنت۔۔آئن اسٹائن ءِ لیکہانی راستی تاں روچ ءِ مروچی برجم ءُ سرجم اِنت۔
لھتے ماھاں پیش سائنسدانانی اے گپ ءَ دُنیا یک رندی پدا ابکہ ءُ ھیران کُت کہ ما چکاسگ ءِ وھد ءَ گوں ھنچیں ”ذرات” آں دوچار کپتگ اِنت کہ آ چہ رُژن ءِ گام ءَ ھم تیزتر سفر کُت کن اَنت۔ پمیشا آھاں واجہ آئن اسٹائن ءِ لیکہ رد گُشتگ اَت۔(بلے بلوچاں گُشتگ ”کاؤکے بُور ءُ راھکے برؤ)۔۔۔۔بلے لھتے ھپتگ ءَ پیش ھمے وت دل ءَ میریں سائنسداناں اے گپ واپس زُرت کہ مئے ڈس اِتگیں نشانانی آسر ءِ ردی چہ مئے اوزارانی ھرابی ءِ سوب ءَ بیتگ۔۔۔ آئن اسٹائن ءِ راستی تہ انگت وتی جاہ ءَ برجم اِنت۔۔۔۔۔۔۔۔
بلے واجہ آئن اسٹائن ءَ انسانی زند ءُ چاگرد ءِ بابت ءَ لھتے گُشتن گُشتگ اَنت۔ باریں اے ھم راست بیت کن اَنت؟؟؟؟؟ (من گُشاں ھو)
1۔ آئی ءَ کہ کدی ردی نہ کُتگ، آئی ءَ نوکیں (کرد پیش داشت ) ھم نہ کُتگ۔۔۔۔۔
2۔ ذھین مردمانی جیڑھاں گیشّین ایت ءُ فطین( سک باز ذھین) چر ایشاں وتی جان ءَ رکّینیت۔۔۔۔۔۔
3۔ اگاں سائنس تئی وھد ءِ لوٹ ءُ گُزرانی وسیلہ مہ بیت تہ ماں جھان ءَ ایشی زیادیں ابکہ کنوکیں دگہ چیز نیست۔۔۔۔۔۔۔۔۔۔۔۔۔۔۔۔۔۔۔۔۔
4۔ پہ من اے جھان ءِ درستاں چہ مشکل تریں چیز ”انکم ٹیکس” رھبند ءَ پوہ بیئگ اِنت۔۔۔۔۔۔
5۔ من کدی آیوکیں وھد ءِ بابت ءَ چار ءُ بچار نہ کناں ، چیاکہ آ کئیت یک دم کئیت۔۔۔۔۔۔۔۔
6۔ من دِلجماں کہ خدا جھان ءِ نظام ءِ دزمانجی ءَ کم وھد نہ زوریت۔۔۔۔۔۔۔۔۔۔۔۔
7۔ منی دربرگ ءِ راہ ءَ درستاں چہ گیش منی تعلیم دزمانجن اِنت۔۔۔۔۔۔۔۔۔۔۔۔۔
8۔ دو چیز انچین اَنت کہ ایشانی شاھگانی یے اندازہ جنگ نہ بیت۔ یکے جھان ءُ دومی انسان ءِ نادانی(بے وقوفی)۔۔۔۔۔۔۔۔بلے من ءَ گمان اِنت کہ من جھان ءِ ”لامحدودیت” ءِ دعوا ءَ گوں بھیسہ ءِ گما نہ کناں۔(انسان ءِ بے وقوفی، نادانی ئیگ ءَ کناں)
9۔ راستی بس ”سراب”ئے۔( سراب؛ بلوچی ءَ جل یا شیطان ءِ آپ ءَ گُشنت۔ بزاں راستی وت دروگے۔۔۔۔۔۔۔
10۔من نہ زاناں کہ سیمی جھانی جنگ چونیں سلاھانی سرا مِڑگ بیت، بلے من ءَ یقین اِنت کہ انسان چارمی جھانی جنگ ءَ لَٹ ءُ سنگانی سرا مِڑ ایت۔۔۔۔۔۔۔
( اے نبشتانک وائس آف امریکہ ءُ آئن اسٹائن ءِ زند سرگوست ءِ منت ءَ نویسگ بیتگ۔)
Comments[ 0 ]
Post a Comment